"ХӨВСГӨЛ ДАВАЛГАА" ХХК 2017 ОНД УЛСЫН ТУСГАЙ ХАМГААЛАЛТТАЙ ГАЗАР ҮЙЛ АЖИЛЛАГАА ЯВУУЛАХ ЗӨВШӨӨРӨЛ АВЧЭЭ 

       Хөвсгөл аймгийн Чандмань-Өндөр суманд жуулчны бааз барьж байгаа “Хөвсгөл давалгаа” ХХК-ийн хордуулсан уснаас уусан олон тооны үхэр хорогджээ. Тодруулбал, тус суманд үйл ажиллагаа явуулж байгаа “Хөвсгөл давалгаа” ХХК-ийн ажилчид барилгынхаа суурийг хөлдөөхгүй байх зорилгоор хорт бодис хэрэглэж, орчныг бохирдуулсны улмаас 30 орчим үхэр үхэж, малчид өнчин тугалтай хоцорсон гэх. Тус компани нь “Хөвсгөл аймгийн Алаг-Эрдэнэ сумын Алагцар, Чандмань-Өндөр сумын Хөндийн даваа, Хар хад хэмээх газар уул ухаж, мод тайрч, байгаль орчныг сүйтгэж байна” хэмээн иргэд шүүмжлэлтэй хандаж, Улаанбаатар хотоос сэтгүүлчид ирэх сургаар малчдын хохирлыг барагдуулж, амыг нь хаасан хэмээн нутгийн иргэд ярьж байна. “Хөвсгөл давалгаа” ХХК нь 2017 онд 11.7 га талбайд үйл ажиллагаа явуулах буюу мод тайрч, уул ухаж, хайрга зөөх зөвшөөрөл авч Хөвсгөл нуурын зүүн эрэгт байрлах Хөндийн давааны орчмыг хэрхэн сүйтгэж байгаа талаар нутгийн удирдлагуудаас тодруулсан юм. 

ХӨВСГӨЛ АЙМГИЙН ЗАСАГ ДАРГА: “ХӨВСГӨЛ ДАВАЛГАА” ХХК 2017 ОНД ЖУУЛЧНЫ БААЗ БАРИХ ЗӨВШӨӨРЛӨӨ АВЧИХСАН ЮМ БИЛЭЭ

         Тэрбээр “Манай аймгийн Чандмань-Өндөр сумын Хөндийн даваа гэх газар Бодь даатгал буюу Голомт банкны эздийн охин компани болох “Хөвсгөл давалгаа” ХХК жуулчны бааз барихаар үйл ажиллагаагаа явуулж байгаа. Өнгөрсөн аравдугаар сарын 7-нд тус барилгын хордуулсан уснаас мал ууж, олноороо хорогдсон асуудал гарсан. Тухайн бүс нутгаас хөрс, усны шинжилгээ авч, Улаанбаатар хот руу явуулсан. Хариу нь удахгүй гарна. Тус компани үйл ажиллагаа явуулах буюу жуулчны бааз барих зөвшөөрлөө 2017 оны үед авчихсан юм билээ. Бид тус компанид ямар ч газар нэмж олгоогүй. Байгалын тусгай хамгаалалттай газар үйл ажиллагаа явуулах зөвшөөрлийг хэн өгсөнийг мэдэхгүй. Шинжилгээний хариугаар хортой ус уусан нь тогтоогдох юм бол мэргэжлийн байгууллагыг татан оролцуулахаас гадна хоргүйжүүлэх, ариутгах арга хэмжээг авна” гэсэн юм. 

ХӨВСГӨЛ НУУРЫН УЛСЫН ТУСГАЙ ХАМГААЛАЛТТАЙ ГАЗРЫН МЭРГЭЖИЛТЭН Э.ЭНХБАТ: “ХӨВСГӨЛ ДАВАЛГАА” ХХК-ИЙН БОХИРДУУЛСАН УСНААС УУСАН 19 ҮХЭР ХОРДОЖ, ҮХСЭН НЬ ҮНЭН

        Харин энэ талаар Хөвсгөл нуурын улсын тусгай хамгаалалттай газрын мэргэжилтэн Э.Энхбатаас тухайн үед юу болсон талаар тодруулсан юм. Тэрбээр “Хөвсгөл давалгаа” ХХК-ийн хордуулсан байж болзошгүй уснаас уусан 19 үхэр хордож, үхсэн нь үнэн. Малын сэг, зэмийг яаралтай устгаж, компанийн зүгээс иргэдийн хохирлыг мөнгөөр барагдуулсан. Ганц шөнийн дотор 19 үхэр хордож үхсэн. Өвөл болж байгаа учир тус компани шавар хөлдөөдөггүй бодис хэрэглэсэн юм билээ. Тэгээд барилгын ойролцоо бэлчиж байсан үхэр, барилгын гаднах шавартай ус ууснаас хордсон гэж үзэж байгаа. Тус бодисыг зөвхөн “Хөвсгөл давалгаа” ХХК хэрэглэдэггүй юм билээ. Барилгын бүх компани өвлийн цагт хэрэглэдэг гэсэн. Өнөөдрөөс хөрс, усны шинжилгээний хариу гарна. Хариу гарсны дараа ямар арга хэмжээ авахыг шийднэ. Тус компани 2017 онд үйл ажиллагаа явуулах 11 га газар авчихсан байсан. Тухайн газартаа барилгын ажлаа эхлүүлчихсэн байгаа нь энэ. Байгалийн тусгай хамгаалалттай газар зөвшөөрөл авчихсан үйл ажиллагаагаа эхлүүлж байгаа газрыг бид хэчнээн хориглоод дийлэхгүй” гэв. 

    Ийнхүү улсын тусгай хамгаалалттай газар барилга байшин барих зөвшөөрөл авсан "Хөвсгөл далай" ХХК жилийн дөрвөн улирал уул, ус, мод ургамлыг тасдаж, ухаж, сүйтгэж, нутгийн иргэдийн амгалан тайван байдлыг алдагдуулж, малыг нь хүртэл хордуулж байгаа асуудлыг хууль хяналтынхан болон хамаарал бүхий байгууллагын сайд, дарга нар анхааралдаа аваач ээ. Нутгийн иргэдийн амгалан тайван байдал алдагдаж, мал нь хүртэл хордож үхлээ. Үүнд хэн, хэзээ хариуцлага хүлээх вэ.