33 НАСТАЙ ЭМЭГТЭЙ 6-14 НАСНЫ ГУРВАН ХҮҮХЭДТЭЙГЭЭ УГААРТАЖ, НАС БАРЖЭЭ 

  33 настай эмэгтэй бага насны гурван хүүхэдтэйгээ гэртээ угаартаж, амиа алдсан харамсалтай хэрэг гараад байна. Бид сэрэмжлүүлэг болгох үүднээс талийгаач бүсгүйн ар гэрийнхэнтэй уулзаж, зарим зүйлийг тодрууллаа. 

ТАЛИЙГААЧ БҮСГҮЙН ЭГЧ: БИД ГОМДОЛТОЙ БАЙГАА УЧИР ДҮҮ НАРЫНХАА ЦОГЦСЫГ ШИНЖЛҮҮЛЭХЭЭР ЭМНЭЛЭГТ ХҮРГЭСЭН 

               Тэрбээр “Дөрвөн хүнээ алдчихсан бид уй гашууд автаад хэцүү байна. Дүү минь 14 настай эрэгтэй, 10 настай эмэгтэй, зургаан настай эрэгтэй хүүхэдтэйгээ хамт биднийг орхиод явчихлаа. Тэднийхээ тухай бодохоор итгэж чадахгүй, зүрх зүсээд байна. Дүү нар минь сайжруулсан шахмал түлш гэх хортой түлшинд ганц шөнийн дотор амиа алдчихлаа гэж бид хардаж байна. Бидэнд үнэхээр хүнд байна. Ялангуяа аавд нь ямар хэцүү байгаа гэж санана. Бид дүү нарынхаа цогцсыг шинжлүүлэхээр эмнэлэг рүү шилжүүлчихсэн байгаа. Шинжилгээний хариу гарахаар бүх зүйл тодорхой болох байх. Бид маш их гомдолтой байна. Энэ хэцүү үед би өөр зүйл ярьж чадахгүй нь” гэв.

               Өөр нэг хамаатан нь болох Б “Би энэ аюултай мэдээг дуулаад өглөө Дорнодоос ирсэн. Айж, сандраад хүмүүстэй ч уулзаж чадахгүй байна. Юу болоод байгааг ч сайн ойлгохгүй байна. Тэдэнтэй хамт байсан муур хүртэл угаартсан байсан гэж сонссон. Гэр бүлийнх нь хүн тэр шөнө хөдөө ажлаар явчихсан байсан юм билээ. Харамсаад барахгүй юм даа. Ар гэрийнхнийх нь зүгээс сайжруулсан түлшний угаарт тэднийг хордсон гэж үзэж байгаа. Түлж байсан түлшийг нь шинжлүүлэх, ямар хор агуулж байгааг нь тогтоолгохыг хүсэж байна” гэв.

БАЯНЗҮРХ ДҮҮРГИЙН НАЙМДУГААР ХОРООНЫ ЗАСАГ ДАРГА Б.ТУЛГА: ГУРВАН ХҮҮХЭДТЭЙГЭЭ УГААРТАЖ, НАС БАРСАН ЭМЭГТЭЙН МЭДЭЭЛЭЛТЭЙ ТАНИЛЦААГҮЙ  БАЙНА

Угаартаж нас барсан талийгаач нарын хашаа 

      Бид талийгаачийнхыг утаа мэдрэгчтэй байсан эсэх талаар тус хорооны Засаг даргаас тодруулсан юм. Тэрбээр “Манай хорооны иргэд угаартаж нас барсан нь үнэн. Гэхдээ би нөхцөл байдалтай бүрэн танилцаж, тодорхой мэдээлэл аваагүй байна. Хороогоо төлөөлж мэргэжлийн хүмүүс талийгаачийнд очсон. Манай хорооны айл болгон утаа мэдрэгчтэй, түлшний карттай. Бусад мэдээллийг цагдаагийн газраас тодруулах хэрэгтэй” гэсэн юм.

     Манай улсад он гарснаас хойш 1800 гаруй хүн сайжруулсан гэх шахмал түлшинд угаартаж, хордсон байна. Түүнээс 440 орчим бага насны хүүхэд гэх тоон мэдээлэл бий. Харин сүүлийн зургаан сарын дотор 50 хүн угаарын хийнд хордож,  амиа алдсан харамсалтай мэдээлэл байгаа юм. 

ЖИЛ БҮР САЙЖРУУЛСАН ШАХМАЛ ТҮЛШИНД ХОРДОЖ, ХҮҮХДҮҮДТЭЙГЭЭ НАС БАРДАГ ХАРАМСАЛТАЙ ХЭРЭГТ ХЭН ХАРИУЦЛАГА ХҮЛЭЭХ ВЭ

       Сайжруулсан шахмал түлшинд жил бүр зуу зуун хүн гэр бүлийнхэнтэйгээ, нялх хүүхдүүдтэйгээ угаартаж, хордож нас барж байна. Тэгвэл шахмал түлшний талаар Эрчим хүчний сайд Б.Чойжилсүрэн “Бид утааг бүрэн алга болгоно гэсэн гоё зүйл ярихгүй. Харин үүнийг багасгана гэж байгаа юм. Ингэхдээ БНХАУ-аас коксжих нүүрс оруулж ирж, туршилт хийнэ. Туршилтаас айхгүй байгаа.Тодруулбал, ирэх арванхоёрдугаар сарын 1-нээс нэгдүгээр сарын 1 хүртэл туршилт хийнэ. 177 тэрбум төгрөгийн 30 орчим төгрөгөөр нь асаагч байна. Түүхий эдээ үйлдвэрлэнэ. Нэгэнт энэ жил үйлдвэр байхгүй учраас нэг тонн шахмал түлшний үнэ 1.5 сая төгрөгөөр импортлоно. 150-200 мянган төгрөгөөр бид нэг тонныг нь боловсруулна. Сайжруулсан түлшинд хэрэглэж байгаа мидлингийг хагас коксоор сольж үйлдвэрлэнэ. Харин хагас коксыг БНХАУ-аас импортлох юм. Хагас коксжсон түлшийг хэрэглэснээр агаарын бохирдлыг өнөөгийн түвшнээс хоёр дахин бууруулна” хэмээх тайлбар өгөхөөс өөрийг шийдэж чадахгүй өдийг хүрээд байна. Сайжруулсан шахмал түлшинд угаартаж, хордож нас барсан хүмүүсийн ар гэрийнхэн төр засгийнханд илүүтэй гомдолтой байгаа юм. Сайжруулсан шахмал түлшинд хэд хэдээрээ хордож нас барж байгаа хэргийг тэдний хэн нь  хариуцах вэ.

       Иймд иргэд та бүхнийг хүйтэн, сэрүүний улирал эхэлж байгаатай холбогдуулан гэр, байшин, орон сууцныхаа агаарыг хоёр цаг тутамд сэлгэн, яндангаа хөөлөх, түлш бүрэн шатаж дуустал яндангийн хаалтыг хаахгүй байх, пийшин, зуухны онгорхой, цоорхой цууралтыг шалгаж бөглөх, угаарын хийн мэдрэгч суурилуулах, уг төхөөрөмжийн хэвийн ажиллагааг тогтмол шалгах, дохиоллыг унтраахгүй байх зэргээр угаарын хийнд хордохоос урьдчилан сэргийлэхийг мэргэжлийн байгууллагаас сэрэмжлүүлж байна.