Баянзүрх дүүргийн 21 хороонд хүчтэй аадар борооны улмаас үер бууж, таван иргэн амиа алдсан харамсалтай хэрэг гарсан. Тухайн үед Хэнтий аймгийн хоёр иргэн нийслэлд ирсэн байх үедээ цахилгаанд цохиулж, амиа алдсан. Уг гэрт дөрвөн иргэн байсан бөгөөд цахилгаанд цохиулсан 18 настай хоёр хүүгийн биеийн байдал хүнд байгаа юм. Энэ талаар бид хүүгээс болон түүний гэр бүлээс тодрууллаа.

ЦАХИЛГААНД ЦОХИУЛСАН ХҮҮ: ХӨЛ ДЭЭРЭЭ УДААН ЗОГСОЖ, АЛХАЖ ЧАДАХГҮЙ, ТОГТОЙ ЗҮЙЛИЙН ХАЖУУД БАЙХААР ХАТГУУЛЖ ӨВДӨӨД БАЙГАА

            Газар хэвтэж байсан чинь  гэнэт гэрт ус ороод ирсэн.  Тэгээд босоод, гал хамгаалагчаа унтраах гэсэн ажлаагүй. Тэгээд л тогонд цохиулах шиг болж, хоёр хөл минь чинэрч, өвдөж эхэлсэн. Найз минь намайг ор луу татахад, ор болон гэр доторх зүйлс хөвж байсан. Тэр үед талийгаач хоёр эгч маань гэнэт унаад өгсөн.  Бид хоёрыг ортойгоо хөвж байхад, хажуу айлын ах гэрийн тооноор дээш татаж гаргасан. Тэгээд ээж рүү залгаад нөхцөл байдлыг хэлсэн. Нэг мэдэхэд л бүх зүйл болж өнгөрсөн байсан. Найзын маань хоёр гуяанд нүх гараад, тарианаасаа харшлаад, улаан зүйл туурсан. Бид хоёр хоёулаа хөл дээрээ удаан зогсож, алхаж чадахгүй. Тогтой зүйлийн хажууд байхаар хатгуулж өвдөөд байгаа.

ЦАХИЛГААНД ЦОХИУЛСАН ХҮҮГИЙН ЭЭЖ: БИДЭНТЭЙ ОДООГООР ЯМАР НЭГЭН БАЙГУУЛЛАГА, ХОРОО, ДҮҮРГЭЭС ХОЛБОГДООГҮЙ

 Тухайн үед нөхөр бид хоёр ээлжийн ажилтай байсан.  Хүү минь 19:00 цагийн үед залгаад “Ээж ээ гэрт үер ороод ирлээ. Тогоо гал хамгаалагчаар нь салгах гэсэн болохгүй, гэрт тог цохиод байна” гэсэн. Тэгээд ажлаасаа ирж явах явцдаа хүүтэй дахин холбогдоход “Хоёр эгч унаад өгсөн. Та тог салгаад өгөөч” гээд орилоод утас тасарсан.  Гэртээ ирэхэд  манай хашаанд гурван машин урсаад ороод ирсэн. Нөхцөл байдал маш  хүнд байсан. Хүү минь гэр дээрээ суугаад “Ээж ээ та цаашаа бай” гээд л хашгирсан. Буулгаж ирэхэд  ухаан нь балартсан байдалтай байсан. Тэгээд Түлэнхийн төвд хүргэгдсэн.  Өнөөдрийн байдлаар бид хоёр талийгаачаа нутагт нь аваачиж, ажил явдлыг нь хийгээд ирсэн. Хүүгийн минь хөл мэдээгүй. Гэрээсээ авах боломжтой зүйлсээ шавраас салгаж авсан.  Бид орох газаргүй болсон болохоор айлын амбар түрээслээд, өмссөн хувцастайгаа байж байна. Байгалийн гамшигт хэнийг ч буруутгах аргагүй. Хүүгээ л хөл дээр нь босгохыг хүсэж байна. Бидэнтэй одоогоор ямар нэгэн байгууллага, хороо, дүүргээс холбогдоогүй. Хоёр хүүхэд маань одоо болтол шоктой, сэтгэл санаа нь хүнд байгаа. Аргагүй ч байлгүй дээ хоёр хүн нас барахыг нүдээрээ харсан хүүхдүүд.

ЦАХИЛГААНД ЦОХИУЛСАН ХҮҮГИЙН ААВ: БИ ГАНЦААРАА ГАМШИГТ ӨРТӨӨГҮЙ, ОЛОН ХҮН ХОХИРСОН ШҮҮ ДЭЭ

            Тухайн өдөр 20:00 цагийн орчимд эхнэр залгаад “Манай гэр үерт автаад, эгч дүү хоёр нас барлаа” гэсэн. Би тулгамдаад юу ч хэлж чадаагүй. Намайг ирэхэд орох боломжгүй их ус болчихсон. Эгч, дүү хоёрыг минь эмнэлэгт аваад явсан байсан. Байгалийн гамшигт хэнийг ч буруутгахав, хөдөө явж ажилд явдлыг нь хийгээд ирлээ. Одоо хүүгээ сэргээн засах эмчилгээнд явуулж, хөл дээр нь босгож авахыг л бодож  байна. Би ганцаараа гамшигт өртөөгүй, олон хүн хохирсон шүү дээ.

            Бидний энэ мэдээллийн мөрөөр Нийслэл болон Баянзүрх дүүргийн алба хаагчид шалгалт явуулж, тухайн айлын хүүг найзын хамт дүүргийн эмнэлэгт хэвтүүлж, тэдэнд шаардлагатай тусламжийг үзүүлэхээр болжээ.