-1.2 тэрбум төгрөгийн үнэтэй Соёлын төвийн барилга нуржээ-

БСШУСЯ-наас өнгөрсөн оны аравдугаар сарын 22-нд Дундговь аймгийн Цагаандэлгэр суманд 240 хүний суудалтай Соёлын төвийн барилга барих тендер зарлажээ. Тендерт “Хэрмээдэй” хэмээх барилга угсралтын компани ялж, өнгөрсөн тавдугаар сарын 1-нээс ажлаа эхлүүлсэн байна. Гэтэл улсын төсвийн 1.2 тэрбум төгрөгрийн хөрөнгө оруулалтаар барьж байгаа Соёлын төвийн барилга өчигдөр нурж унажээ. Тус барилга нь тэнхлэгээрээ 27х27м хэмжээтэй, цутгамал төмөр бетонон суурь, төмөр бетон арагт бүтээцэн хийцтэй, зоорьгүй хоёр давхар аж. Сумын иргэд “Уржигдар хоёр давхарын цутгалт хийж байсан. Гэтэл өчигдөр хоёр давхарын хэсэг нь нураад уначихсан байна лээ. Арматур төмөр нь муу байсан юм уу, цемент нь ч болоогүй юм уу, бүү мэд. Ажлын хэсэг байгуулагдаад шалгаад явсан. Одоогийн байдлаар ажилчид нь ажлаа үргэлжлүүлж байна” гэв.

“Хэрмээдэй” компани: Хэв хашмал нурж унасан

Тус барилгын ажлыг Улсын төсвийн 1.228.346.087 төгрөгийн хөрөнгө оруулалтаар “Хэрмээдэй” компани гүйцэтгэж байгаа. Энэ талаар тус компанийн удирдлагуудаас тодруулахад, “Соёлын төвийн барилгын явц 50 хувьдаа хүрэх гэж байгаа. Хоёр давхарын цутгалт хийх гээд хэв хашмалаа угсарч байхад бага зэргийн техникийн саатал үүсээд ийм зүйл болчихлоо. Барилга нурсан зүйл байхгүй. Одоогийн байдлаар хоёр давхарын хэв хашмалаа буулгаад янзалж байна. Хэв хашмал нурах нь сүйдтэй зүйл биш ээ. Дахиад л шинээр хийнэ шүү дээ. Барилга хот байгуулалтын газраас долоо хоногийн өмнө шалгалт хийсэн. Цутгалт хийхэд ямар ч асуудалгүй гэдэг нь шалгалтаар тогтоогдсон. Мөн өнөөдөр (өчигдөр) тус газраас шалгалт ирж хийгээд “Энэ нь танай компанийн дотоод асуудал учир үүнийгээ засаад ажлаа үргэлжлүүл” гэсэн. Тус барилга нь 2021 оны долдугаар сард ашиглалтад орно” гэлээ.

Тус компани нь Завхан аймгийн Улиастай суманд 2014 оноос үйл ажиллагаагаа явуулж байгаа юм байна. Ингэхдээ аймгийн орон нутгийн өмчийн газраас зарласан барилга угсралтын чиглэлийн 20 орчим тендерт оролцож, аравт нь ялжээ. Тухайлбал, Завхан аймаг дахь Доной нисэх буудлын барилгын дээврийн засварын ажлыг 121 сая төгрөгөөр хийж гүйцэтгэсэн байна. Мөн тус аймгийн нэгдсэн эмнэлгийн тусгай хог хаягдлыг устгах барилгыг 50 сая төгрөгөөр барьж өгсөн байх. Түүнчлэн Сэлэнгэ аймгийн Сайхан суманд 500 метрийн урттай явган хүний зам барих тендерт ялж, улсаас 53 сая төгрөгийн санхүүжилт авч байжээ.