Баянзүрх дүүргийн 97 дугаар сургуулийн V ангийн сурагч И-г тус сургуулийн биеийн тамирын багш Ш гэгч зодож, хамт явахыг шаардан автомашин руугаа чирсэн хэрэг гарчээ. Энэ хэргийн талаар хүүгийн ээж О манай редакцад хандаж, мэдээлэл өгсөн юм.

-Таны арван настай хүүг биеийн тамирын багш нь зодож, автомашин руугаа чирсэн хэргийн талаар та бидэнд мэдээлсэн шүү дээ. Хэргийн талаар тодорхой мэдээлэл өгөхгүй юү?

-Аравдугаар сарын 10-нд буюу бямба гарагт хүүтэйгээ ярилцаад сууж байтал биеийн тамирын багш нь машин руу авч явахыг оролдсон талаар эхлээд хэлсэн. Хүүгээсээ лавшруулаад асуутал өнгөрсөн жилээс хойш тус багш нь миний хүүг удаа дараа цохиж, загнаж байсан гэсэн. Хүү минь “Биеийн тамирын багш надад үнэхээр дургүй. Намайг харах болгондоо бусад хүүхдээс илүү загнаж, заримдаа цохидог. Сүүлд намайг сургуулийн хонгилд явж байхад “Хоёулаа миний машин руу яваад ирье” гэхээр нь би зөвшөөрөөгүй. Би бодохдоо багш гадуур хувцастай, би фромтой байгаа юм чинь гээд зөвшөөрөөгүй юм. Гэтэл багш “Сүртэй ш дээ, миний машин ойрхон байгаа” гэж хэлсэн. Би биеийн тамирын хичээлд дургүй, дахиж явахаас айж байна” гэсэн. 

-Тухайн багш нь танай хүүхдийн ангид хичээл орж байсан юм уу?

-Үгүй, миний хүүд хичээл ордоггүй багш юм билээ. Олон ангитай нийлж ордог өдөр нь тэр багш ийм асуудал гаргасан. Бид гурав хоногийн дараа сургуулийн нийгмийн ажилтанд энэ талаар хэлсэн. Тухайн өдөр биеийн тамирын багштай нь уулзах гэсэн боловч ажлын байрандаа байгаагүй  учир нийгмийн ажилтан тухайн багш руу залгаад “Эцэг, эх хоёр ирээд гомдол гаргалаа. Чи яагаад хүүхдийг машин руугаа чирж, авч явах гэж оролдсон юм бэ” гэж асуухад “Би зүгээр тоглож, маазарч байсан” гэж хариулсан. Би үүнийнхээ дараа тус сургуулийн захирал Б.Алтанцэцэгтэй уулзаж, “Энэ асуудлыг 3-4 хоногийн дотор шийдэж өгнө үү” гэсэн өргөдөл бичиж өгсөн. Өргөдөлдөө “Миний хүүхдийг машин руу чирж явахыг оролдсон багшдаа хариуцлага тооц.

Хүүхдийг аюулгүй, хүчирхийлэлгүй орчинд сурч боловсрох эрхийг нь хангаж өг. Миний хүү одоо маш их айдастай байна” гэж бичсэн. Нэг хоногийн дараа сургуулийн нийгмийн ажилтан над руу залгаад “Биеийн тамирын багш танай хүүхдэд гар хүрэхийн хувьд хүрсэн байна. Гэхдээ энэ тохиолдолд бэлгийн чиг хандлага харагдаж байгаа тул та өргөдлөө сольж бичиж өгөх үү” гэх утгатай зүйл хэлээд таг болчихсон. 

-Та энэ хэргийг цагдаагийн байгууллагад мэдэгдсэн үү?

-Би яахаа мэдэхгүй Гэр бүл, хүүхэд, залуучуудын хөгжлийн газар, Баянзүрх дүүргийн Цагдаагийн II хэлтэст болсон хэргийн талаар өргөдөл гаргаж, хандсан. Тэгээд Гэр бүл, хүүхэд, залуучуудын хөгжлийн газрын байцаагч 97 дугаар сургуулийн бага ангийн нийгмийн ажилтантай холбогдоход “Энэ асуудлыг манай сургууль аравдугаар сарын 16-нд дотооддоо бүрэн шийдвэрлэх хугацаатай үүрэг өгсөн” гэсэн. Үүний дараа нийгмийн ажилтан нь над руу залгаад “Юу болж байгаа юм бэ. Бид энэ асуудлыг дотооддоо шийдвэрлэх гээд байхад 102, 108 дугаарт хандаад байхдаа яадаг юм” гээд уурласан. 

-Дотооддоо хэрхэн шийдвэрлэсэн юм бэ? 

-Нийгмийн ажилтан  “Та болон бусад холбогдох албаныхан хамт байж байгаад энэ асуудлыг шийдвэрлэх хэрэгтэй” гэсэн. Тэр хуралд манай нөхөр бидэнд хамт оролцоход нөгөө биеийн тамирын багш маазарч, тоглож, хүүхдийг машин руу дагуулж явах гэж оролдоогүй гэсэн. Нийгмийн ажилтан нь бид хоёрт “Би биеийн тамирын багшийг өөр хүнтэй ярьж байхад нь андуураад танай хүүхдийг гээд ойлгожээ. Тэр нэг тийм асуудал болсон шүү” гэж хэлсэн. Анх хэргээ хүлээж байсан багш нь гэнэт “Би хүүхэд зодоогүй” гээд гүрийгээд байсан. Гэтэл энэ хэргийг шалгасан цагдаагийн алба хаагчид тухайн багшийг буруутайг тогтоож, 300 мянган төгрөгөөр торгосон байна лээ. Буруугүй хүнийг цагдаагийн байгууллага буруутай гэж тогтоохгүй шүү дээ. Мөн тэр багш нь буруугүй байж буруутай гээд хүлээн зөвшөөрөөд, гарын үсгээ зураад, торгуулийн арга хэмжээ авахуулна гэж байх уу. Мөн багш нар нь хурлын үеэр “Таны хүүхдийг зодсон, машин руу авч явахыг оролдсон гэдгийг хэн батлах юм” гэж доромжилсон.

-Тухайн багштай та бүхэн уулзсан уу. Ямар шалтгаанаар хүүг нь цохиж, машин руугаа авч явахыг оролдсон талаараа тайлбар өгсөн үү?

-“Би танай хүүхдийг спорт зааланд зохисгүй гутал өмссөн байхаар нь “Миний хүү өндөр сайхан нуруутай юм чинь бусдад үлгэрлэж, зөв зохистой гутал өмс” гэж хэлсэн. Харин бөмбөг авчруулах гэж машин руугаа дагуулж явах гэж байсан” гэсэн.

-Одоо хүү нь сургуульдаа явж байгаа юу?

-Тэр өдрөөс хойш хүү минь сургуульдаа яваагүй. Хэдийгээр хичээлдээ явах дуртай  ч багшаасаа айгаад мөн найзуудаасаа ичээд явж чадахгүй айдастай байна. Сургууль нийтээрээ багшид зодуулсан нь миний хүүхдийн буруу юм шиг ойлгосон болохоор хүү минь яаж тийм орчинд сурах юм бэ. Бид уг нь тэр багшийн мууг үзэх гээгүй. Зөвхөн миний хүүхдээс уучлалт гуйгаад, “Дахиад ийм зүйл хийхгүй” гэдгээ хэл гэж хэлсэн. Гэтэл тэр багш миний хүүхдээс уучлалт гуйхдаа  “Би чамайг зодоогүй. Зодсон гэж уучлалт гуйгаагүй шүү. Би жаахан муухай ааш гаргасан байна. Харин хүүхэд сургуульд завсардахгүй явах ёстой учраас уучлалт гуйж байна” хэлсэн.  Ийм юм байж болох уу. 

-Биеийн тамирын багш нь тус сургуульд хэдэн жил ажиллаж байгаа юм бэ. Танай хүүгээс гадна бусад хүүхдэд гар хүрч байсан тохиолдол бий юү?

-Залуухан багш. Хоёр жил гаруй хугацаанд ажиллаж байгаа байх. Би хүүгийнхээ асуудлын талаар тус сургуулийн сурагчдын эцэг, эхийн группэд бичсэн. Гэтэл миний хувь чатаар олон аав, ээж хүүхэд нь багшид цохиулж, зодуулсан талаар мэдээлсэн. Тэр багш хүүхдүүдийг номхон зогсоож байгаад элэг рүү нь цохидог гэсэн. Мөн хүүхдүүд рүү бөмбөг хүчтэй шидэх, цохих асуудал удаа дараа гаргаж байсан юм билээ. Гэхдээ энэ талаар хүүхдүүд хэлж байгаагүй бөгөөд өнгөрсөн жил нэг хүүхэд тухайн багшид зодуулж, арга хэмжээ авахуулж байсан гэсэн. Хүүхдүүдийг камергүй газарт зоддог байж магадгүй. 

Аравхан настай хүү нь багшдаа зодуулж, улмаар сэтгэл зүйн гүн хямралд орсонд түүний аав, ээж гомдолтой байгаагаа бидэнд хэлсэн юм. Б.Алтанцэцэг захирлаа, хүүхдүүдийг соён гэгээрүүлэх багш нар тань энэ мэт сурагчаа зодож, хүчирхийлж байхад та яагаад та дуугуй сууна вэ. Ёс бус үйлдэл гаргаж, бяцхан сурагчаа зодсон багшдаа хариуцлага тооцно уу.