Дорнод аймгийн Цагаан-Овоо сумын харьяат 56 настай, эрэгтэй шинжилгээ өгч, хариугаа хүлээж байхдаа гудамжинд амиа алдсан харамсалтай хэрэг гарлаа. Талийгаач эмнэлгийн тусламж авч чадалгүй нас баржээ.  

         Талийгаач өнгөрсөн дөрөвдүгээр сард Цагаан-Овоо сумаас Дорнод аймагт ирж, эмчийн хяналтад оржээ. Тэрээр бие нь сульдаж, ядарч, амьсгалын дутагдалд орсон учир аймгийнхаа нарийн мэргэжлийн эмчид үзүүлэхээр сумаасаа гарсан байна. Дорнод аймгийн Бүсийн оношилгооны төвийн эмч түүнийг үзэж, нарийн шинжилгээнд хамруулсан гэнэ. Шинжилгээний хариугаар талийгаач уушгины хорт хавдартай гэж гарсан учир эмчилгээ хийж эхэлжээ. Гурван сар орчим аймгийнхаа эмчийн хяналтад байсан тэрээр өнгөрсөн долдугаар сард Хавдар судлалын үндэсний төвд ирж үзүүлжээ. Ингээд уушгины хорт хавдар нь дөрөвдүгээр шатандаа орсон учир эмчлэгдэх боломжгүй хэмээн нутаг буцсан байна.

Талийгаач өнгөрсөн дөрөвдүгээр сард эмчийн хяналтад орж, уушгины хорт хавдраа эмчлүүлж байжээ

          Талийгаач гэрээр эмчлүүлэх эмчилгээ бичүүлж, өнгөрсөн наймдугаар сард аймгийнхаа төвд очсон байна. Тэрээр аймагтаа “Ягаан цээнэ” өрхийн эмнэлгийн эмчийн хяналтад орж, эмчилгээгээ үргэлжлүүлэн хийлгэжээ. Есдүгээр сарын 1-нээс түүний ханиах нь ихсэж, өрхийн эмнэлэгтээ үзүүлэхээр очжээ. Өрхийн эмчид “Миний ханиалга өмнөхөөс эрс ихсэж, бие минь сульдаж байна” гэж хэлсэн гэнэ. Өрхийн эмч коронавирус илрүүлэх шинжилгээний цэгт очиж, шинжилгээ өгөхийг зөвлөжээ. Ингээд тэрээр шинжилгээ өгөхөөр хэсэг хугацаанд дугаарлаж зогссон байна. Энэ хугацаанд түүний биеийн байдал муудаж, бөөлжих, ханиах шинж тэмдэг илэрч байсан гэдгийг эх сурвалж мэдээлэв. Талийгаач дүүгийн хамт шинжилгээ өгч, 15 минутын дараа хариугаа авахаар хүлээж зогсож байгаад амиа алдсан байна.

Амиа алдсан иргэн өрхийн эмчид “Миний ханиалга өмнөхөөс эрс ихсэж, бие минь сульдаж байна” гэж хэлсэн гэнэ. Өрхийн эмч коронавирус илрүүлэх шинжилгээний цэгт очиж, шинжилгээ өгөхийг зөвлөжээ. 

ДОРНОД АЙМГИЙН ЭРҮҮЛ МЭНДИЙН ГАЗРЫН ДАРГА Ч.ОЮУМАА: Шинжилгээний цэгт амиа алдсан ирсэн уушгины хорт хавдартай байсан

         Талийгаач тухайн өдөр дүүгийн хамт явж байжээ. Эх сурвалжийн хэлж буйгаар “Талийгаачийн дүү тусламж гуйж, тэр хавиар зөндөө гүйсэн. Хэн ч туслаагүй. Шинжилгээний цэг өрхийн эмнэлэгт ойрхон байдаг ч эмч ирж амжаагүй. “Ягаан цээнэ” өрхийн эмнэлэг ачаалалтай байгаа болохоор тэр юм уу утсаа огт аваагүй. Тэгээд түргэний эмч ирэхэд талийгаач хэдийн амьсгал хураачихсан байсан” гэлээ. Бид “Ягаан цээнэ” өрхийн эмнэлгийн даргатай холбогдож, тухайн өдөр юу болсон талаар тодруулах гэсэн боловч өвчтэй байгаа учир ажилдаа ирээгүй гэсэн юм.

Харин Дорнод аймгийн Эрүүл мэндийн газрын дарга Ч.Оюумаагаас тодруулахад “Талийгаачийн түргэвчилсэн шинжилгээний хариу эерэг гарсан. Нас барсан учир PCR шинжилгээ авах боломж байгаагүй. Талийгаач уушгины хорт хавдартай байсан нь үнэн. Өөр мэдээлэл өгөхгүй” хэмээлээ.

      Эх сурвалжийн мэдээлж буйгаар Дорнод аймагт халдварын тохиолдол өдрөөс өдөрт ихсэж, нас барах хүний тоо нэмэгдэж байгаа гэнэ. Тэрбээр “Өмнө нь халдвар илрэхэд л хөдөлгөөн хорьж, хөл хорио тогтоож байсан. Гэтэл өдөрт хэдэн зуугаар халдвар илэрч, сумдууд нь улаан бүс болчихоод байхад манай удирдлагууд арга хэмжээ авахгүй байна. Эцэстээ шинжилгээ өгөхөөр зогсож байсан иргэн нь хүртэл гудамжинд нас барлаа. Ийм байхад хүртэл ямар ч арга хэмжээ авахгүй байгаад гайхаж байна” гэв.  

ДОРНОД АЙМГИЙН ЗДТГ-ЫН ДАРГА П.БАТ-ӨЛЗИЙ: Шинжилгээний хариу нь халдвартай гэж гарсан учир талийгаачид анхан шатны тусламж үзүүлж чадаагүй

       Энэ хэргийн талаар Дорнод аймгийн Засаг даргын Тамгын газрын дарга П.Бат-Өлзийгөөс тодрууллаа. Тэрбээр “Манай аймаг Эрүүл мэндийн яамнаас өгч буй үүрэг, чиглэлийн дагуу ажиллаж байна. Нэгдүгээрт, хөнгөн өвдсөн иргэдийг гэрийн тусгаарлалт авч, эмчилгээг нь эхлүүлж байна. Өрхийн эмнэлгийн эмч, ажилтнууд гэрийн тусгаарлалт, гэрийн эмчилгээг хариуцаж байгаа. Харин зорилтод бүлгийн буюу хүндэрсэн, архаг суурь өвчтэй, өндөр настай, жирэмсэн, бага насны хүүхдүүдийг заавал эмнэлгийн байгууллагад хүлээн авч, эмчилж байна. Шинжилгээний цэгт нас барсан иргэнийг халдвартайг нь мэдсээр байж гэр рүү нь буцаасан зүйл байхгүй. Хүмүүс буруу ойлголттой байх шиг байна лээ. Талийгаач уушгины хорт хавдартай, биеийн байдал нь хүнд хүн байсан. Тэрээр шинжилгээгээ өгсөн газартаа л амиа алдсан. Хамт явсан дүү нь шинжилгээнийх нь хариуг аваад ирэхэд нь талийгаач бөөлжиж эхэлсэн байдаг юм билээ. Тэгээд л удалгүй нас барчихсан гэсэн. Шинжилгээний хариу нь халдвартай гэж гарсан учраас хажууд нь байсан хүмүүс анхны тусламж үзүүлж чадаагүй юм шиг байна лээ” гэв.

Тэрээр шинжилгээгээ өгсөн газартаа л амиа алдсан.

Албаны хүмүүсийн хэлж буйгаар талийгаач хавсарсан өвчтэй байсан учир нас барах шалтгаан болсон гэнэ. Тэд талийгаачид эмнэлгийн тусламж үзүүлэх боломжгүй байсан талаараа ярилаа.  

Харин бид талийгаачийн төрсөн дүүтэй холбогдож, тухайн үед юу болсон талаар тодруулах гэсэн боловч мэдээлэл өгөхөөс татгалзсан юм.         Ташрамд дурдахад, Дорнод аймгийн хэмжээнд өчигдөр 395 хүнээс халдвар илэрчээ. Тодруулбал, Хэрлэн суманд 249, Баян-Уулд 28, Чойбалсанд 19, Баяндунд 16, Сэргэлэнд 14, Баянтүмэнд 13, Булган 11, Дашбалбарт 11, Хөлөнбуйрт 12, Халхголд 12, Чулуунхороотод зургаа, Цагаан-Овоод дөрөв, Матад суманд хоёр хүнээс халдвар илэрсэн байна.