Олон улсад зэсийн хомсдол үүссэн нь зэсийн үнийг эрчимтэй өсгөж, сүүлийн дөрвөн сарын хугацаанд 40 гаруй хувиар нэмэгдэж, Лондонгийн металлын биржид найман мянган ам.доллар хүрсэн билээ. Оны эхэнд шинжээч, судлаачид “Энэ жилийн зэсийн дундаж үнэ 6050 ам.долларт хүрнэ” гэж таамаглаж байсан юм. Гэтэл коронавирусийн цаг үеийн эдийн засагт түүхий эдийн хомсдол үүссэн нь шинжээчдийн таамгийг няцаалаа.

       Коронавирусийн хүнд, хэцүү цаг үеийг ашиглаж, ажил албаа зогсоогоогүй Хятадын түүхий эдийн салбар байгууллагуудын ашиг, орлогын чадамж өндөр болж буй тухай эх сурвалжууд дурдаж байна. Зэсийн хомсдол, үнийн өсөлт нь бусад салбартаа нөлөөлж буй хамгийн том жишээ нь нэг торх нефтийн үнэ 50 ам.долларт хүрсэн явдал юм. Зэсийн үнийн өсөлт нефтийн үнэд хүчтэй нөлөөлж байгаа нь ам.долларын ханшийг сулруулж, бууруулах хандлагатай байгааг “Блүүмбэрг” онцолсон юм. Өнгөрсөн гуравдугаар сараас хойш идэвхтэй өсөж буй зэсийн үнийг түүхий эд судлаачид “Зэсийн үнэ ирэх онд 10 мянган ам.долларт хүрэх магадлалтай” хэмээжээ.