Монгол Улсаас нүүрс ачсан галт тэрэг анх удаа БНХАУ-ын Цайфэйндянь далайн боомтод хүрсэн талаар “CCTV” агентлаг мэдээллээ. Тодруулбал, Чойр өртөөнөөс 100 чингэлэг бүхий 3200 тонн коксжих нүүрс тээвэрлэсэн галт тэрэг урд хөрш рүү Эрээн боомтоор нэвтэрч, улмаар Цайфэйдянь боомтод хүрсэн гэнэ.

      Уг үйл явдлын дараа Хятадын Цайфэйдянь боомтын удирдлагууд бүс нутгийн зам болон Бээжин-Тяньжин-Хэбэй чиглэлийн төмөр замуудыг хөгжүүлж, Монгол Улстай хамтран ажиллаж, галт тэрэгний байнгын маршрут бий болгохоор идэвхтэй ажиллаж буй гэнэ. Энэ үйл явдал нь Монголын нүүрс далайн боомтуудад шууд хүрч, нүүрсээ гуравдагч зах зээлд гаргах боломжтой байгааг харуулж буй талаар шинжээчид дурдаж байна.