-МЧБХ-г шинэчлэн зохион байгуулах түр хороо Д.Дагвадоржийг шахсаар байгаад гаргасан ч, түүнийхээ дараах үйлдлийг бодоогүй юм биш үү-

Бразил Улсын Рио хотод зохион байгуулсан олимпын наадмыг Монголын чөлөөт бөхийн Үндэсний шигшээ баг медальгүй өндөрлүүлсэн. Гэтэл олимпын наадмын сүүлийн өдөр дэвжээн дээр шүүгчийн шийдвэртэй санал нийлэхгүй, бухимдлаа илэрхийлж Үндэсний шигшээ багийн дасгалжуулагч Ц.Цогтбаяр, Б.Баяраа нар хувцсаа тайлан шидэж, олон улсын нүдэн дээр “шившгээ” тарьсан цагаас хойш таван жил өнгөрчээ. Тухайн үед МЧБХ-ны Ерөнхийлөгчөөр Асашёрюү Д.Дагвадорж ажиллаж байв. МЧБХ-ны Удирдах зөвлөлийн хурлаар түүнийг холбооныхоо Ерөнхийлөгчөөр сонгосноос хойш гурав дахь жилээ үзэж байлаа.

Олимпын наадмын өмнөөс л МЧБХ дотроо хагаралтай, Ерөнхийлөгч Д.Дагвадоржийгоо “огцруулах” санаатай хүмүүс холбоонд олон байжээ.

“Рио-2016” олимпын наадам зохион байгуулагдахаас нэг жилийн өмнө буюу 2015 онд тус холбооны чөлөөт бөхийн эрэгтэй тамирчдаас бүрдсэн ахлах дасгалжуулагч, гавьяат тамирчин Д.Цогтбаяр, гавьяат тамирчин О.Пүрэвбаатар, гавьяат дасгалжуулагч Б.Баяраа, шигшээ багийн дасгалжуулагч Л.Энхбаяр нар МЧБХ-г шинэчлэн зохион байгуулах түр хороо зохион байгуулсан. Тэгмэгцээ холбооныхоо Ерөнхийлөгч Д.Дагвадоржийг “МЧБХ-г санхүүгийн асуудалтай, дарамт шахалт ихтэй болгосон, хууль бусаар Ерөнхийлөгч болсон” зэрэг баримтуудыг дэлгэж, МЧБХ-ны удирдах зөвлөлийг “Тав хоногийн дотор бүрэн бүрэлдэхүүнээрээ огцор” хэмээн шаардаж байсан юм.

Үүнийх нь дараа тухайн үеийн МЧБХ-ны Ерөнхийлөгч Д.Дагвадорж өөрийн нэр төрийг сэргээлгэхээр Иргэний хэргийн анхан шатны шүүхэд гомдол гаргаад байв.

Түүнээс хойш нэг ч их удалгүй уг хэрэг намжиж, Д.Дагвадоржийг унагаах хүсэлтэй хүмүүс “далдуур” яриа хийж явсан нь бий. Харин “Рио-2016” олимпын наадмын дэвжээн дээр гаргасан дасгалжуулагч нарын болчимгүй үйлдэл нь Монгол Улсын чөлөөт бөхийн тамирчид тив, дэлхий, олон улсын холбогдолтой тэмцээн, уралдаанд оролцох боломжийг нь хаах дөхөж байсан. Олимпын наадмын дараа ДБНХ-ноос МЧБХ-ноос хариу мэдэгдэл хүссэн “Монголын чөлөөт бөхийн баг, тамирчдыг олон улсын холбогдолтой тэмцээнд оролцохыг хориглож, эрхийг нь хаасан” тухай нууц мэдэгдэл ирсэн гэдэг. Үүнийг нь МЧБХ-ны Удирдах зөвлөлөөс хэвлэлийн хурлын үеэр мэдэгдэж, “Ард түмнээсээ өршөөл эрье” хэмээн толгойгоо гудайлгаж байсан цаг саяхан. Гэтэл энэ мэдэгдлээс хойш төд удалгүй Асашёрюү Д.Дагвадорж МЧБХ-ны Ерөнхийлөгчийн суудлаа өгч байгаагаа цахим сүлжээгээрээ дамжуулан мэдээлснээр тус холбооны асуудалд дахиж “хошуу” дүрээгүй.

Энэ үеэс л МЧБХ-ны асуудал “дундрахаа” больсон аж. Д.Дагвадоржийг холбооны Ерөнхийлөгчийн суудлаас өгснөөс хойш нэг их удалгүй эмэгтэйчүүдийн 72 кг жингийн тамирчин П.Орхоны допингийн асуудал шуугиан тарьсан. Түүнийг Азийн наадамд барилдаж, алтан медаль хүртсэнийх дараа допингийн шинжилгээний хариу нь гарчээ. П.Орхоныг станозолол гэх нэртэй хориотой бодис буюу допин хэрэглэсэн гэж үзсэн байна. Энэ асуудлаар МЧБХ-ноос мэдэгдэл хийхгүй явсаар ДБНХ-ноос Монголын Чөлөөт бөхийн холбоог торгож, П.Орхон 2022 он хүртэл барилдах эрхээ хасуулсан.

П.Орхоны допингийн “шуурга” намжаагүй байхад шигшээ багийн тамирчдаа төлөвлөөгүйгээр сольж, унагааж, халдаг “том толгойтой” МЧБХ-ныхны “булай” хэдэн сарын турш сүрийг үзүүлэв. Тухайн үед УАШТ-д түрүүлсэн тамирчдад ДАШТ-д оролцох эрх олгоно гэсэн юм билээ. Гэтэл улсын аваргад түрүүлсэн “Женко” клубын тамирчин М.Пүрэвтунгалагийг шигшээ багаас хасаж, оронд нь Э.Сумъяа гавьяатыг явуулна хэмээн “бужигнуулж" байлаа. М.Пүрэвтунгалагийн гэр бүлийнхний мэдээлснээр түүнийг “Бие дээр нь хатиг гарсан, бэлтгэл дутуу” гэх шалтгаанаар хассан юм гэнэ. Удалгүй М.Пүрэвтунгалаг ч “таг” болж, Э.Сумъяа ДАШТ-д оролцсон юм.

Д.Дагвадоржийг л “зайлуулчихвал” холбооны ажил цэгцрэх гээд байна гэсэн МЧБХ өнөөг хүртэл болж, бүтэхгүй хэвээр л байна. Чөлөөт бөхийн тамирчдаа тив, дэлхий, олон улсын чанартай тэмцээн, уралдаанд явуулах битгий хэл тэмцээнийхээ сургыг ч дуулгахаа больсон гэнэ. Хаа нэг аймаг, суманд нэрэмжит тэмцээн зохион байгуулж, түрүү бөхөө шалгаруулаад түүндээ “ханадаг” болсон аж. 

МЧБХ Д.Дагвадоржийг “зайлуулах” гэж мөн ч их үзэж, зорьсондоо ч хүрсэн. Гэтэл өнөөг хүртэл өөдөлсөн юм нэг ч алга. Монгол Улсын чөлөөт бөхийн тамирчид олон улсын чанартай тэмцээнд чадахгүй, улс доторх хэдэн нэрэмжит тэмцээнүүд дотроо эргэлдсээр л байх. Харин эсрэгээрээ жүдо бөхийн баг, тамирчид олон тэмцээнд оролцож, үзэгчдэдээ медалийн “нүүр” үзүүлээд л байгаа харагдана. “Токио-2020” олимпын наадам “хаяанд” ирлээ. Энэ жил ч гэсэн “Дахиад л олимпоос медальгүй ирлээ” гээд сууж байх хэрэг үү.