-С.Эрдэнэд холбогдох хэргийг гурван цагийг дотор хэрэгсэхгүй болгож, дахин сэргээсэн-

Сүүлийн үед нэр бүхий прокурорууд улс төрчдийн гар хөл болж, тэдний хүссэн шийдвэрийг гаргадаг болсон тухай яриа гарах боллоо. Ялангуяа тэр ярианы дийлэнх нь Нийслэлийн Прокурорын газрын орлогч прокурор Ц.Насанбатад хамаарч байна. Тэгэхдээ түүнийг Монгол Улсын Ерөнхийлөгч Х.Баттулгын “халаасны” хүн гэжээ.

УИХ-ын гишүүн, АН-ын дарга асан С.Эрдэнийг хоёр ч хэрэгт яллагдагчааар тооцож, АТГ-ын Мөрдөн шалгах хэсэгт шалгаж байгаа. С.Эрдэнийн хэлснээр, Монгол Улсын Ерөнхийлөгч Х.Баттулгын шадар туслах Г.Түвшинжаргал өөр рүү нь залгаж, “Танд бичиг өгөх хэрэгтэй байна” гэжээ. Харин өгсөн бичиг нь Нийслэлийн прокурорын газрын орлогч прокурор Ц.Насанбатын гарын үсэгтэй С.Эрдэнэд үүсгэсэн хоёр хэргийг хэрэгсэхгүй болгох тогтоол байсан аж.

Гэвч үүний дараагаар Нийслэлийн прокурорын газрын ерөнхий прокурор Ш.Нямдорж С.Эрдэнэтэй холбогдох хэргийг хэрэгсэхгүй болгосон тогтоолыг хэрэгсэхгүй болгож хэргийг дахин сэргээсэн байна. Гуравхан цагийн дотор шийдвэр гаргаж, шийдвэр солигдож буй энэ “тоглоом”-ын цаадах эзнийг Ерөнхийлөгч Х.Баттулга гэх үзэж буйгаа УИХ-ын гишүүн асан, АН-ын дарга асан С.Эрдэнэ мэдээлсэн юм.

-Ц.Насанбат Б.Баасанцогттой уулзсан уу-

АН-ын дарга асан С.Эрдэнийг “Дархан гурил тэжээл” ХК-ийн элеватортой холбоотой асуудлаар шалгаж байгаа. Харин С.Эрдэнэ “Манай охин Э.Содгэрэлийн эзэмшилд байсан  “Дархан гурил тэжээл” ХК-ийн 150 мянган ширхэг хувьцааг 2013 онд одоогийн Монгол Улсын Ерөнхийлөгч Х.Баттулга өөрийн нөөц хөрөнгөөрөө худалдан авсан. Харин дараа нь худалдан авсан хувьцаагаа надтай холбож байгаа. Ерөнхийлөгч Х.Баттулга намайг энэ хэрэгтэй холбох гэж хэтэрхий улайрч байна” гэх тайлбар өгөөд буй.

Түүнчлэн С.Эрдэнийн хэлснээр бол Нийслэлийн прокурорын газрын ерөнхий прокурор Ш.Нямдорж болон орлогч прокурор Ц.Насанбат хоёр нь Ерөнхийлөгчийн үгээр хэнд хэрэг тохох, тохохгүй шийддэг болсон гэнэ. Тэрбээр ийн итгэлтэй хэлж байгаа шалтгаан нь энэ сарын эхээр прокурор Ц.Насанбат, өмгөөлөгч Б.Баасанцогт нарын уулзаж байгаа зураг цахим сүлжээгээр тархсан. Б.Баасанцогтын хувьд Ерөнхийлөгч Х.Баттулгын шүүгч, прокурортой холбоотой “бохир” ажлыг гүйцэтгэдэг байсан гэх баримтууд тараад байгаа. Энэ сэжмээр Ц.Насанбат прокурор Ерөнхийлөгч Х.Баттулгын “халаасны” хүн гэж үзэхэд хүрчээ.