УИХ-ын гишүүн С.Ганбаатар “Дубайн гэрээ”-г өөрчлөхийг шаардаж, төрийн ордны өмнө өлсгөлөн зарласан билээ. Энэ үеэр Монгол Улсын Ерөнхийлөгч асан Н.Энхбаяр талбай дээр очиж, С.Ганбаатарыг дэмжиж буйгаа илэрхийлэн гарын үсгээ зурсан. Мөн тэрбээр “Оюутолгойн гэрээ бол луйвар, булхай. Үүнийг С.Ганбаатар Монголын ард түмний өмнөөс эсэргүүцэж байгаа. “Рио Тинто” Монгол Улсын төр засгийг удирдаж байгаа” хэмээсэн юм. Улмаар энэ нь олон нийтийн дунд “Монгол Улс үнэхээр “Рио Тинто”-д удирдуулж байгаа юм биш биз” гэх хардлагыг төрүүлээд буй. Иймээс бид Монголын далд “удирдагч” гэгдэж буй “Рио Тинто” группийн талаарх мэдээллийг хүргэж байна.

-Канадын “Turquiose Hill” компани манай орны “Оюу толгой” ХХК-ийн 66 хувийг эзэмшдэг. Харин “Дубайн гэрээ”-нд хамтран ажиллаж буй Австралийн “Рио Тинто” групп “Turquiose Hill” компанийн 50.79 хувийг эзэмшдэг байна.

-“Рио Тинто” групп нь анх 1873 онд байгуулагдсан, 148 жилийн түүхтэй. Метал олборлолт, уул уурхайн салбартаа дэлхийд хоёрт жагсдаг аж.

-Тус групп нь 2019 онд гаргасан судалгааны дүнгээр нэг жилд дунджаар 43 тэрбум гаруй ам.долларын цэвэр ашиг олдог.

-Их Британи Улсын Лондон болон Австрали Улсын Мельбурн хотод төв байр нь байрладаг бөгөөд нийт 40 мянга гаруй ажилтантай.

-“Рио Тинто” группийг анх 1873 онд Хью Матенсон үүсгэн байгуулсан. Өдгөө ерөнхийлөгчөөр нь Сэм Волш, Төлөөлөн удирдах зөвлөлийн даргаар нь Жан Ду Плесмс нар ажиллаж буй.

-Группийн нийт хөрөнгийн 43 хувь нь АНУ, Канад Улсад төвлөрдөг бол 33 хувь нь Австрали, үлдсэн хөрөнгө нь Африк, Индонези, Өмнөд Америк болон Европын улсуудад тархан байршдаг аж.

-Зургаан тивийн 40 гаруй улсад цайр, төмрийн хүдэр, нүүрс, уран, зэс, алт, титан, давс болон алмаз олборлох үйл ажиллагаа явуулдаг.

-2008 онд Хятадын “Chinalco” корпораци “Рио Тинто” группийн есөн хувийг 14 тэрбум ам.доллароор худалдан авсан. “Chinalco” корпораци “Рио Тинто” группийн есөн хувийг авснаар өнөөг хүртэл хамгийн нөлөө бүхий хувьцаа эзэмшигч нь болоод байна.

-Монгол Улстай 2006 оноос хойш хамтран ажиллаж буй бөгөөд сүүлийн 10 жилийн хугацаанд “Оюу толгой” ХХК-д нийт 11 тэрбум ам.долларын хөрөнгө оруулжээ.

-Монгол Улсаас 2015 онд “Дубайн гэрээ”-г байгуулах ёслолд Ерөнхий сайд асан Ч.Сайханбилэг, “Оюу толгой” ХХК-ийн ТУЗ-ийн дарга Г.Батсүх оролцож, “Эрдэнэс Монгол” компанийн гүйцэтгэх захирал асан Б.Бямбасайхан, “Эрдэнэс Оюу толгой” компанийн захирал асан П.Ганболд нар гэрээнд гарын үсэг зурсан юм.