Ерөнхий сайд нүүрсний хулгайн асуудлаар дуулиан тарьснаас хойш дөрвөн сарын хугацаа өнгөрлөө. Тэсгэм хүйтэнд Төв талбайд иргэдийг нүцгэлүүлсэн, Төрийн ордонд суугаа түшээд нарыг сандаргасан мөн ч их дуулиантай, хүлээлттэй асуудал даа.            

          Нүүрсний хулгайн хэрэг УИХ-ын хамгийн эмзэг сэдэв нь болоод байгаа. Уг асуудлаас болж МАН-ын томчууд хоорондоо түнжин хагарч, сайнгүй харилцаатай байгаа гэдэг. Одоогийн УИХ-д суугаа гишүүдийн олонх нь нүүрсний хулгайн хэрэгт холбогдсон гэх баримтууд ч бий. Үүний хамгийн том нотолгоо нь УИХ-ын гишүүн Т.Аюурсайхан бүрэн эрхээсээ түдгэлзэх үеэрээ чуулганы хуралдаан дээр “Намайг огцруулбал олон гишүүнийг араасаа дагуулна” хэмээн уурласан гэх яриа Саарал ордноор дуулиан тариад буй. Ерөнхий сайд ч энэ талаар “Нүүрсний хулгайн хэрэгт холбогдсон олон гишүүн бий. Түүнийг нь илчилж, хариуцлага” тооцно хэмээн мэдэгдэж байв. Энэ талаар УИХ дахь МАН-ын бүлгийн дарга Д.Тогтохсүрэн ч “Шалгуулах гишүүд ганц нэгээр тогтохгүй” хэмээн мэдэгдэж байсан.

        Нүүрсний хулгайн асуудлаар УИХ-аас байгуулсан Түр хороо сонсгол явуулахаар төлөвлөөд байв. Тодруулбал, Хилийн боомтоор ачаа, тээвэр, нүүрс нэвтрүүлэх болон чөлөөт бүсийн үйл ажиллагаанд учирч байгаа хүндрэлийг шалган тогтоох Түр хороо энэ сарын 10-12-ны өдрүүдэд нээлттэй сонсгол зохион байгуулахаар товоо баталсан билээ. Гэвч уг сонсголын  товыг түр хойшлуулсан талаар Түр хорооноос мэдэгдэв. Энэ талаар УИХ-ын гишүүн Г.Ганболд "Түр хороо есөн сар гаруй хугацаанд ажиллахдаа 20 мянга гаруй хуудас нотлох баримтуудыг холбогдох байгууллагуудаас авч, шинжлэн судалсан. Хуулийн дагуу нээлттэй сонсголд гэрчээр дуудах хүмүүсийн нэрийг долоо хоногийн өмнө зарлах ёстой байдаг.  Хуралдаанд Авлигатай Тэмцэх Газрын төлөөлөл оролцож "УИХ-ын Хяналт шалгалтын тухай хуулийн 33.9 дэх заалтын дагуу түр хорооны үйл ажиллагаа нь шүүх болон эрх бүхий бусад байгууллагын хэрэг, маргаан хянан шийдвэрлэх ажиллагаанд саад учруулах, хөндлөнгөөс оролцохыг хориглоно гэсэн заалтыг зөрчиж байна. Нээлттэй сонсгол зохион байгуулснаар мөрдөн байцаах ажиллагааны нууц задруулах магадлалтай, шүүх хурлаас өмнө зарим хүнийг гэм буруутайд тооцох зэрэг эрсдэлтэй. Тиймээс хуульд заасан үндэслэлээр түр хорооны сонсголыг хойшлуулах хүсэлтэй байна” гэсэн юм.

         Үндсэндээ УИХ-ын гишүүдийн олонх нь нүүрсний хулгайн хэрэгт холбогдож, шалгуулж байгаа энэ үед УИХ өөрсдөө нийтийн сонсгол явуулна гэдэг нь тун эргэлзээтэй асуудал. Өөрөөр хэлбэл, нүүрсний хулгайн асуудлаар одоогийн парламент нийтийн сонсгол явуулбал хамаг булхай, авлигын хэрэг нь илэрчих гээд тэр чигтэй айж байна. Иймд тэд нүүрсний сонсголыг мөрдөн шалгах ажиллагааны нууц гэх шалтгаанаар явуулахгүй байх сонирхолтой байгаа гэнэ. Тиймдээ ч нүүрсний сонсголын товыг тодорхойгүй хугацаагаар хойшлуулаад байна.  Уг сонсголд нийт 114 хүн гэрчээр дуудагдсан. Үүнээс Монгол Улсын төрийн тэргүүнээр ажиллаж байсан хийгээл УИХ-ын нэр бүхий гишүүд, төрийн өндөр дээд албан тушаалтнууд, Төрийн өмчит компанийн захирлууд зэрэг нөлөө бүхий улстөрчид сонсголд гэрчээр дуудагдаад байв.

      Нүүрсний хулгайн хэрэгтэй холбоотой 17 хүний нэрийг АТГ-аас ил болгож, УИХ хоёр гишүүний бүрэн эрхийг түдгэлзүүлсэн бол уг хэрэгт нэр холбогдсон нэг гишүүн нь өөрийн бүрэн эрхээсээ татгалзаж, нэг гишүүний бүрэн эрх хөндөгдсөн гээд мөн ч дуулиантай асуудлууд ар араасаа хөвөрч байгаа. Түүнчлэн гурван ч гишүүн яллагдагчаар татагдан шалгуулж байгаа гэдгийг хуулийн байгууллагаас мэдэгдээд буй.

        Ерөнхий сайдын зүгээс нүүрсний хулгайн асуудлаар намын гишүүдээ “шахаж” эхэлсэн.Түүнчлэн намын гишүүд нь ил далдаар нүүрсний хулгайн хэргээс бултаж, булзааруулж, зарим нь намын даргынхаа эсрэг ажиллаж эхэлсэн гэх нь бий. Тодруулбал, УИХ-ын гурван гишүүний бүрэн эрхийг өнгөрсөн долоо хоногт түдгэлзүүлэх үеэр нууц санал хураалт эвгүйдэж, өөрөө чуулганы хуралдаанд орж суугаад ч нэг гишүүн нь сугарч үлдсэн удаатай.

     Тиймээс УИХ дээр нээлттэй сонсгол явуулахад Их хурлын гишүүд ихээхэн дургүйцэж, бултаж, булзааруулах арга саам эхнээсээ хэрэглэж эхэлсэн гэнэ. Харин Л.Оюун-Эрдэнэ нүүрсний хулгайн асуудлаар ард түмнээс дэмжлэг авахад ч бэлэн намынхаа гишүүдийг шавдуулж эхэлсэн сурагтай. Тэрбээр саяхан Сар шинийн өмнөхөн хэвлэлд яриа өгөх үеэрээ “Авлигатай тэмцэх амаргүй. Бид шаардлагатай бол ард түмнээсээ дэмжлэг” авна гэх агуулгатай яриаг өгч байлаа. Хэдийн Касгийн газар нүүрсний хулгайн асуудлаар шүгэл үлээсэн ч өнөөдөр МАН доторх улс төрөө дийлэхгүй, нүүрсний хулгайн хэргийг ор үндсээр тасалж чадахгүй л сууна.

        Үндсэндээ нүүрсний хулгайн хэрэгт улс төрийн томчууд холбогдсон, олон холбогдогчтой, хаалттай сэдэв. Тэгэхээр бид Хөгжлийн банкны нээлттэй сонсгол шиг дуулиантай, маргаантай, нээлттэй сонсголыг нүүрсний хулгайн сонсголоос хүлээгээд хэрэггүй л болов уу.