“Нүүрний хулгай”-н хэрэгт нэр цохогдож, АТГ-т шалгагдаж буй албан тушаалтнууд яг адилхан технологиор хулгайн мөнгөө угаасан нь эхнээсээ илчлэгдэж буй. Жишээ нь, “Эрдэнэс тавантолгой” ХК-ийн гүйцэтгэх захирал асан Б.Ганхуяг Жаргалантын аманд “Жаргалант вилла” гэх хаус хотхон, түүний хамсаатан “Хишиг арвин индустриал”-ын Б.Хишигдорж Нүхтийн аманд хаус хотхон барьсан бол тэд хамтдаа хотын төвд 20 давхар орон сууц, оффисын барилга барьсан баримтыг бид илчилсэн. “Нүүрсний хулгайч” нар дотроо “жараахай” гэгдэж байсан Х.Нурлат л гэхэд Казакстанд хаус хотхон нэгийг, орон сууцны хороолол нэгийг барьсан нь ил болсон. Мөн АТГ-аас “Нүүрсний хулгай”-н хэрэгт нэрийг нь зарласан Ардын намынхнаас Ц.Анандбазар Бага тэнгэрийн аманд “Бага тэнгэр сити” хаус хотхон, Ш.Раднаасэдийн хадам аав, хүргэн ах нь Арцатын аманд орон сууц, үйлчилгээний цогцолбор хотхон, Х.Мандахбаяр Сэлбийн аманд “Гранд маршал” хаус хотхон барьсан зэргээр цааш үргэлжилнэ.
Тэгвэл “Нүүрсний хулгай”-н мөнгийг хаус хотхон, орон сууц, оффисын барилга болгож угаасан улстөрчдийн жагсаалтыг УИХ-ын гишүүн, ХНХ-ын сайд Т.Аюурсайхан түүчээлж буй бололтой. Тодруулбал, Т.Аюурсайхан "Нүүрсний хулгай"-н хэрэгт шадар туслах И.Даваадоржийгоо ашигласан. Өдгөө И.Даваадорж нь Ар гүнт, Арцатын аманд хаус хорооллын хоёр том төсөл эхлүүлж, эхнийхийг нь зах зээлд зараад эхэлчихсэн байгаа юм.
Т.АЮУРСАЙХАН, ТҮҮНИЙ ШАДАР ТУСЛАХ И.ДАВААДОРЖ НАР “НҮҮРСНИЙ ХУЛГАЙ”-Н ХАМСААТАН ГЭДГИЙГ ИЛЧЛЭХ ЭХНИЙ БАРИМТУУД БУЮУ 8.9 ТЭРБУМ ТӨГРӨГИЙН ТЕНДЕР, 500 МЯНГАН ТОНН НҮҮРСНИЙ ХҮСЭЛТ
“Шударга тав”-ын нэг, УИХ-ын гишүүн, ХНХ-ын сайд Т.Аюурсайхан “Нүүрсний хулгай”-н дуулиан дэгдэхтэй зэрэгцээд “Би ЭТТ-гоос нэг ширхэг хадаасны ч тендер, нэг шанага нүүрс ч аваагүй” гэх мэдэгдэл хийсэн. Харамсалтай нь, хулгайн мөнгө мөрөө үлдээдэг хойно Т.Аюурсайхан “Нүүрсний хулгай”-н хэргийн гол хамсаатан гэдэг нь хөдөлшгүй баримтаар илчлэгдэж, үнэнд гүйцэгдэж байна.
Жишээ 1. Бид өчигдрийн дугаартаа Т.Аюурсайханы хоёр шадар туслах буюу Б.Отгонжаргал, И.Даваадорж нар хэрхэн хуйвалдаж, “Эрдэнэс тавантолгой” ХК-ийн “Уурхайн ажилчдын хотхон барих” 8.9 тэрбум төгрөгийн тендерийг будилаантуулж, өөрсдийнхөө “Лаки лайф” компанид авсан баримтыг дэлгэсэн. Энэхүү 8.9 тэрбум төгрөгийн тендер бол Т.Аюурсайханы туслах Б.Отгонжаргал “Эрдэнэс тавантолгой” ХК-ийн Худалдан авалтын албаны дарга болсныхоо “шид”-ийг үзүүлсэн ердөө нэгхэн л жишээ гэдгийг сануулах нь зүйтэй. Ердөө ганцхан энэ ганц жишээгээр л Т.Аюурсайханы “Би ЭТТ-гоос нэг ширхэг хадаасны ч тендер аваагүй” гэх мэдэгдэл няцаагдаж буй.
Жишээ 2. Хоёр хоногийн өмнө АТГ-ын мөрдөгчид Т.Аюурсайханы туслах, зөвлөхүүд болон хамаарал бүхий этгээдүүдийнх нь орон сууц, оффист нэгжлэг хийсэн. Бидний олсон мэдээллээр АТГ-ынхан Т.Аюурсайханы шадар туслах, ЧД-ийн ИТХ-ын төлөөлөгч, ХНХ-ны харьяа Хөгжлийн бэрхшээлтэй хүний хөгжлийн ерөнхий газрын дарга гэх олон давхар сэтэртэй И.Даваадоржийн гэрээс “Эрдэнэс тавантолгой” ХК-иас 500 мянган тонн нүүрс авах хүсэлтийн хуулбар олсон мэдээлэл байна. Өөрөөр бол, энэ баримтаар Т.Аюурсайханы “Би ЭТТ-гоос нэг шанага нүүрс ч аваагүй” гэх мэдэгдэл нь мөн л няцаагдаж буй юм.
Т.АЮУРСАЙХАНЫ ШАДАР ТУСЛАХ И.ДАВААДОРЖИЙН АР ГҮНТ ДЭХ 69 ХАУС
Хамгийн ноцтой нь, УИХ-ын гишүүн, ХНХ-ын сайд Т.Аюурсайхан болон түүний шадар туслах И.Даваадорж нар 2018 оноос хойш “Эрдэнэс тавантолгой” ХК-ийн нүүрсний квотыг дамлах, тендерүүдийг нь түүх гэх мэтээр хулгайгаар, хууль бусаар хөрөнгөжиж, улмаар 2020 оноос эхлэн хэд хэдэн газарт хаус хотхон барих замаар хулгайн мөнгөө угааж эхэлсэн байж болзошгүй баримтууд байна.
ХНХ-ын сайд Т.Аюурсайхан бүх “бохир” буюу “Эрдэнэс тавантолгой” ХК-аас нүүрсний квот, тендер авах, хулгайн мөнгөө угаах тэргүүтэй ажлуудаа шадар туслах И.Даваадорждоо хариуцуулж, хариуд нь түүнд албан тушаал өгч “шагнадаг” дүр зураг харагдаж байгаа. Харин Т.Аюурсайханы татаасаар туслахаар төлөөлөгч, төлөөлөгчөөр агентлагийн дарга болж, тултлаа дэвшсэн И.Даваадорж нь Т.Аюурсайхан даргынхаа даалгасан “бохир” ажлуудыг гүйцэтгэхдээ Ганболдын Гантөмөр гэгчийг ашиглаж байгаа схем харагдаж буй. Тодруулбал, И.Даваадорж нь Г.Гантөмөрийг 2019 онд өөрийнхөө эгч И.Чанцалдуламын “Асгат ресурс” ХХК-ийн хувьцаа эзэмшигч болгосон. Дараа нь 2021 онд эхнэр Д.Дэлгэрмаагийнхаа “Мон версус” ХХК-ийн хувьцаа эзэмшигч болгосон. Ингэж Г.Гантөмөрийг өөрийн тал болгомогцоо түүний “Лаки лайф” ХХК-ийг нь “Эрдэнэс тавантолгой” ХК-аас тендер авах болон хаус хотхон барих ажилдаа ашиглаж эхэлсэн байгаа юм.
Өдгөө Т.Аюурсайханы туслах И.Даваадоржийн хамаарал бүхий “Лаки лайф” ХХК нь Ар гүнтийн аманд “Ар гүнт вилла” нэртэй, нийт 69 хаус бүхий тансаг зэрэглэлийн хотхон барьж байгаа. Хаусууд нь 56-112 м2 талбайтай, нэг м2 нь 3.3 сая төгрөгийн үнэтэй. Дунджаар 90 м2 талбайтай 69 хаус гэж тооцвол 20.4 тэрбум төгрөгөөр зарж борлуулах тооцоо гарч байгаа. Тухайн 69 хаусыг энэ оны зургадугаар сард ашиглалтад оруулахаар төлөвлөсөн бөгөөд захиалга нь ид явагдаж байгаа.
Т.АЮУРСАЙХАНЫ ШАДАР ТУСЛАХ И.ДАВААДОРЖ БОГДХАН УУЛЫН АРЦАТЫН АМАНД ТАНСАГ ЗЭРЭГЛЭЛИЙН 39 ХАУС БАРИХААР БЭЛТГЭЛ ХАНГАСАН БАЙЖЭЭ
ХНХ-ын сайд Т.Аюурсайханы шадар туслах И.Даваадорж 2020 оны зургадугаар сард өөрийн эхнэр Д.Дэлгэрмаа болон Г.Гантөмөр нарын хамтран эзэмшдэг “Мон версус” ХХК-ийн нэр дээр БОАЖЯ-наас Богдхан уулын Арцатын аманд 1.5 га газар авчээ. Улмаар 2021 онд Арцатын амны 1.5 га газар дээрээ “Лаки лайф” ХХК-аараа 39 ширхэг хаус бүхий хотхон бариулахаар бүх бэлтгэл ажлаа хангасан байна. Тухайн 39 хаус нь тус бүр 204 м2 талбайтай, хоёр автомашины зогсоолтой, тансаг зэрэглэлийн хаус байхаар төлөвлөж, ажилдаа ороод байжээ. Бас нэг ноцтой мэдээлэл нь, тухайн 39 хаус баригдаж дуусмагц И.Даваадорж өөртөө найман хаусыг нь авахаар гэрээ байгуулаад байсан ажээ.
.jpg)
Ямартай ч УИХ-ын гишүүн, ХНХ-ын сайд Т.Аюурсайхан “Нүүрсний хулгай”-н хэргийн нэг төлөөлөл төдийгүй, бусадтайгаа яг ижил замаар буюу хаус хотхоноор мөнгө угаасан байж болзошгүй баримтууд нь ийнхүү илчлэгдсээр байна. Нэг зүйл тодорхой байгаа нь, Т.Аюурсайхан, И.Даваадорж нар хулгайгаа нуухын тулд маш нарийн төлөвлөгөөтэй ажиллаж, хөндлөнгөөс хэн ч харсан өөрсөдтэй нь огт хамааралгүй харагдах барилгын компанийг хүртэл ашигласан схем харагдаж байгаа юм.
| “НҮҮРСНИЙ ХУЛГАЙ”-Н МӨНГӨ УГААЛТЫГ Т.АЮУРСАЙХАН “ТҮҮЧЭЭЛЖ”, АР ГҮНТ, АРЦАТЫН АМАНД ХАУС ХОРООЛОЛ БАРИУЛЖ БАЙНА УУ |
|
.JPG)
"ЕВРО 2024" тэмцээнд шигшээ багууд 26 тоглогчтой оролцохоор боллоо
Нийтийн тээврийн гурван чиглэлд өөрчлөлт
ДУУЧИН НЭНЭГИЙН ДУУНААС ОНЦЛОХ ТАВАН ДУУ
Бараа, ажил, үйлчилгээ худалдан авах тухай хуулийн хэрэгжилт, тулгамдаж буй асуудлын талаар хэлэлцлээ
Хичээл хийхэд тохиромжтой найман газар
Нөөцийн махны өргөтгөсөн худалдаа болж байна
Бага насны хоёр хүүхдийг муу усны нүхнээс эсэн мэнд оллоо
Нэгдүгээр ээлжийн цэрэг татлага үргэлжилж байна
Дорнод аймагт гарсан хээрийн түймрийг унтраажээ
XII ТОЙРОГ: “ХӨРӨНГӨТНИЙ ТОЙРОГ” ГЭГДЭХ ХАН-УУЛД МАН-ААС Ч.НОМИН, Т.МӨНХСАЙХАН, Ж.АЛДАРЖАВХЛАН ГОРИЛЖ БАЙНА
ААВЫНХАА ЗАХИАСЫГ БИЕЛҮҮЛЖ ЯВАА Н.АРИУНБОЛД ГАВЬЯАТ
ТҮМНИЙ НЭР БАРЬСАН ТӨРИЙН ДЭЭРЭМ БУЮУ БАЯЛГИЙН САН
Ц.ШИЙРЭВ: Сайн тамирчин болгохоос өмнө бие хүн болгон төлөвшүүлэх хэцүү
Ч.АВИРМЭД: ТӨРИЙН ШАГНАЛТ, СОЁЛЫН ГАВЬЯАТ ЗҮТГЭЛТЭН Д.БАТБАЯР ЗОХИОЛЧИЙН "ХАЙРЫГ ХАЙРЛА" ЖҮЖГИЙН ГОЛ ДҮРИЙГ БҮТЭЭХ НЬ ЗАЛУУ ЖҮЖИГЧНИЙ ХУВЬД БАХАРХАЛТАЙ БАЙЛАА
“КОЙНЧИН”, ХҮЧИРХИЙЛЭГЧ Ч.ГАНХУЯГИЙН НОЦТОЙ БАРИМТУУД
