Д.И.Менделеевийн химийн 55 дугаар олимпиадад “Орчлон” сургуулийн 11а ангийн сурагч О.Тэмүүжин амжилттай оролцож, мөнгөн медаль хүртсэн юм. Тэрбээр дэлхийн хамгийн чансаа өндөр олон улсын олимпиадаас Монгол Улсаа төлөөлөн оролцож, анхны медалийг нь хичээл зүтгэл, оюун ухаанаараа авч, аав, ээж, багш, ард олноо баясгаж, хүндлэл хайрыг нь хүлээж чадлаа. Ийнхүү оюун ухаан, эрч хүч, авхаалж самбаатай, эрдэм номд шамдан суралцагч О.Тэмүүжинг энэ удаагийн “Монголын гэрэлт ирээдүй” буланд урьж ярилцлаа.

-Сайн уу. Олон улсын Д.И.Мендлеевийн химийн 55 дугаар олимпиадаас мөнгөн медаль хүртсэнд баяр хүргэе.

     -Баярлалаа. Энэхүү нэр хүндтэй олимпиадад Монгол Улсаа төлөөлөн оролцож, анхны медалийг анх удаа медаль хүртсэндээ маш их баяртай байна.

-Тус олимпиадад цахимаар оролцсон уу. Олимпиадын онцлог нь юу байв. Хэдий хугацаанд хэчнээн бодлого бодож гүйцэтгэсэн бэ?

     -Энэхүү олимпиад цар тахлын улмаас хоёр дахь жилдээ цахимаар зохион байгуулагдсан. Дэлхийн хамгийн анхны олон улсын химийн олимпиад гэдгээрээ онцлогтой. Мөн Орос, Хятад, Румын, Украин гэх зэрэг дэлхийн чансаатай орнуудаас олон сурагч оролцдог учраас медалийн болзол хангахад нэлээд хэцүү. Энэ удаагийн олимпиад дөрөвдүгээр сарын 20-26 хүртэл хугацаанд зохион байгуулагдсан. Энэ сарын 22, 23-нд хоёр шаттай таван цагийн хугацаатай бодлогууд бодсон. Нэгдүгээр шат нь 10 онооны найман бодлого, хоёрдугаар шатанд 15 оноотой 15 бодлогоос тавийг нь сонгож бодсон. 155 онооноос 105.15 оноо авч, хоёрдугаар байрт шалгарлаа.

-Олон улсын химийн олимпиадад оролцохын тулд хэдий хугацаанд, хэрхэн бэлдсэн бэ. Хүндрэл, бэрхшээлтэй зүйл байв уу. Түүнийг хэрхэн даван туулсан бэ?

    -Есдүгээр ангид байхад манай сургуулийн химийн багш С.Хүрэлбаатар намайг химийн сонгоны ангид оруулж, олимпиадад бэлдэж эхэлсэн.

Есдүгээр ангийн улсын химийн олимпиадад мөнгөн медаль хүртсэний дараа 10 дугаар ангидаа Олон улсын Д.И.Менделеевийн 54 дүгээр олимпиадад оролцож, 0.5 оноо дутаж, медалиас мултарч байлаа. Тухайн үед төрсөн мэдрэмж энэ удаад намайг хурцалж, мөнгөн медаль хүртэхэд нөлөөлсөн. Илүү хурцалж өгсөн гэж болно.

-Олон улсын олимпиадад оролцохын тулд хичээлээ ямар агуулгаар бэлддэг вэ?

    -С.Хүрэлбаатар багш маань энэ амжилтыг гаргахад хамгийн чухал үүрэг гүйцэтгэсэн. Багш маань намайг зөв чиглүүлж, чөлөөтэй сэтгэх, өөрөөр минь байх боломж олгодог. Бодлого бодоход маш их урамшуулж, магтдаг хүн байгаа юм. Бид маш сайн ойлголцож чаддаг. Мөн манай “Орчлон” сургууль Кембриджийн хөтөлбөртэй учраас миний суурь мэдлэг сайн тавигдсан гэж боддог. Тэгээд Кембриджийн A шатны хөтөлбөрийг түрүүлж судлаад мөн Оросын бодлогуудыг бодож эхэлсэн.

-Тус олимпиадад хэдэн орны хэчнээн сурагч оролцсон бэ. Өөрийнхөө гаргаж байсан амжилтаасаа ярьж өгч болох уу. Химийн олимпиадаас гадна өөр хичээлээр бэлдэж байв уу?

   -Энэхүү олимпиадад 30 гаруй орны 145 сурагч өрсөлдсөн. Намайг зургадугаар ангид байхад “Орчлон” сургуулийн биологийн багш Э.Энхсайхан, химийн багш Э.Хулан, Физикийн багш С.Одонцацрал нар олон улсын математик, шинжлэх ухааны олимпиад (IMSO)-д бэлдэж оролцуулж байсан. Би тус олимпиадаас Монголын анхны мөнгөн медалийг хүртсэн. Дараа нь С.Хүрэлбаатар багштайгаа химийн олимпиадыг гүнзгийрүүлсэн түвшинд судалж, бэлдэж Олон улсын хот хоорондын V олимпиадад Монгол Улсын анхны медаль буюу мөнгөн медаль, STEMCO-Олон улсын Стандарт химийн олимпиадад алтан медаль хүртэж байлаа.

-Дараа жил дунд сургуулиа төгсөх юм байна. Химийн хичээлээс гадна ямар хичээлд сонирхолтой вэ. Ямар мэргэжилтэй болохоор бэлдэж байгаа вэ?

     -Би химийн хичээлээс гадна физик, математик, мэдээлэл зүйн хичээлдээ сонирхолтой. Би Theoretical Chemist буюу Онолын химичийн мэргэжил эзэмшихээр төлөвлөж байгаа. Би ирээдүйд Нобелийн шагнал хүртэнэ гэж мөрөөддөг.

-Чи яагаад химийн хичээлд сонирхолтой болсон бэ. Химийн хичээл чиний амьдралд хэрхэн нөлөөлдөг вэ?

    -Дунд сургуульд ороход манай сургуулийн химийн Э.Хулан багш маань хичээлээ маш сонирхолтой зааж туршилт хийдэг байсан. Урвалжуудын өнгө хэрхэн өөрчлөгдөж байгааг анх хараад их гайхан учир шалтгааныг нь олохын тулд химийн хичээлд дурласан. 

-Чиний суралцах, олимпиадад бэлдэх арга барил юу вэ. Өөрийгөө хэрхэн дайчилдаг вэ?

     -Би шинжлэх ухаанд маш дуртай учраас түүндээ автан олон цагаар, тууштай хичээлээ хийдэг. Энэ нь миний гол давуу тал, арга барил байх гэж боддог. 

-Орчлон сургуульд хэддүгээр ангиасаа суралцаж байгаа вэ. Сургуулийн зүгээс чамайг хэрхэн дэмжиж, урамшуулдаг вэ?

     -“Орчлон” сургуульд цэцэрлэгээсээ суралцаж байгаа. Өмнөх жилийн  Олон улсын Д.И.Менделеевийн олимпиадад медалийн яг доогуур жагсаж, медаль авч чадаагүй ч манай сургуулийн зүгээс надад урам өгч, сургалтын 100 хувийн тэтгэлэг олгосон.

Мөн “Орчлон” сургуулийн сурагчид сүүлчийн зургаан жилд математик, физик, хими, биологи, мэдээлэл зүйн Олон улсын олимпиадуудаас тасралтгүй медаль хүртэж байгаа. Энэхүү буухиаг үргэлжлүүлэн авч явж байгаадаа баяртай байна.

-Чөлөөт цагаараа юу хийх сонирхолтой вэ?

   -Би чөлөөт цагаараа компьютер, хөл бөмбөг, сагсан бөмбөг тоглож, дугуй унах дуртай. Миний үеийн хүүхдүүд ер нь надтай адилхан сонирхолтой байдаг гэж боддог.   

-Олон улсын олимпиадаас мөнгөн медаль хүртэхэд нь гэр бүлийнхэн нь урмын сайхан үг хэлсэн байх. Аав, ээж нь чамайг хэрхэн дэмждэг вэ?

    -Аав маань нисэхийн мэргэжлээр ажилладаг байсан. Ээж маань “Ачтан” эмнэлэгт зүрхний эмчээр ажилладаг. Намайг гэрийнхэн маань маш их дэмжиж, урмын үг хайрладаг. “Гэр бүлийнхэндээ, багш нартаа маш их баярладаг шүү, хайртай шүү” гэж хэлмээр байна.

-Цаг гарган ярилцсанд баярлалаа. Цаашдын сурлага, хөдөлмөрт нь өндөр амжилт хүсье.

    -Баярлалаа.