Олон нийтийн сүлжээнд Б.Баасанцогт өмгөөлөгчийн бичлэг цацагдаж, улмаар нэр бүхий 11 шүүгчийн харилцах дансанд мөнгө шилжүүлсэн баримт нь ил болсон билээ. Шүүхийн ёс зүйн хороо өнөөдөр хуралдаж, өмгөөлөгч Б.Баасанцогттой холбоотой шүүгч нарын асуудлыг авч хэлэлцжээ. Хуралдаанаас С.Соёмбо-Эрдэнэ, Т.Өсөхбаяр, М.Алдар, З.Болдбаатар, Б.Халиун, Б.Ариунхишиг нарын зургаан шүүгчид сахилгын хэрэг нээхээр шийдвэрлэсэн байна.

Дээрх шүүгч нар нь өнгөрсөн 2020 оны арванхоёрдугаар сарын 8-ны өдөр “Энканто” хотхоны 305-ын 106 тоотод өмгөөлөгч Б.Баасанцогтын хамт хонож, архидан согтуурсан байж болзошгүй асуудлаар ДМНН, ННБЗХ-ноос гаргасан нэхэмжлэлийн дагуу өнөөдөр Шүүхийн ёс зүйн хороо ийн хуралдсан юм.