“Шивээ-Овоо” ТӨХК-д Увсынхан “эзэн” суужээ, Ерөнхий сайд аа. Тендер болгоныг нь монопольдож, цагаан түүхтэй компаниудаараа толгой дараалан авч байгаа баримт байна. Тэгвэл Сангийн сайд асан Ч.Хүрэлбаатарын “тавиул”-ууд  “Шивээ-Овоо” ТӨХК-д хэрхэн эзэн суусан талаарх мэдээллийг хүргэж байна.

60 ХОНОГИЙН ТҮҮХТЭЙ, УВС АЙМГИЙН МАН-ЫН ДАРГА Б.ОДГЭРЭЛИЙН “ӨҮ ЖИ ЭНЕРЖИ ОЙЛ” ХХК “ШИВЭЭ-ОВОО” ТӨХК-Д МОНОПОЛЬ ЭРХТЭЙ БОЛЖЭЭ

Тайлбар: Увс аймгийн МАН-ын дарга, ИТХ-ын төлөөлөгч Б.Одгэрэл, УИХ-ын гишүүн асан Ч.Хүрэлбаатар нар, 2016 он

           Сүүлийн дөрвөн жилийн хугацаанд “Шивээ-Овоо” ТӨХК-ийн дизель түлшний тендерт “Өү Жи Энержи ойл” ХХК шалгарчээ. Уг компанийг судалж үзвэл, Увс аймгийн МАН-ын дарга, аймгийн ИТХ-ын төлөөлөгч Буянжаргалын Одгэрэлийн нэр дээр бүртгэлтэй. Б.Одгэрэл 2021 онд “Өү Жи Энержи ойл” ХХК-аа үүсгэн байгуулж, Баатархүүгийн Бат-Өлзийг гүйцэтгэх захирлаараа ажиллуулж байгаа. Хамгийн ноцтой нь, 2021 оны тавдугаар сарын 21-нд байгуулагдсан Б.Одгэрэлийн “Өү Жи Энержи ойл” ХХК 2021 оны долдугаар сараас “Шивээ-Овоо” ХХК-ийн тендерт ногоон гэрлээр шалгараад эхэлжээ. Өөрөөр хэлбэл, 60 хоногийн түүхтэй компани төрийн өмчит хувьцаат компанийн тэрбум, тэрбумын төсөвтэй тендерт шалгарсан гэсэн үг.

     Увс аймгийн МАН-ын дарга Б.Одгэрэлийн “Өү Жи Энержи ойл” ХХК нь “Шивээ-овоо” ТӨХК-д дизель түлш шахдаг монополь эрхтэй бөгөөд өнгөрсөн дөрвөн жилийн хугацаад 100 гаруй тэрбум төгрөгийн тендерт шалгарчээ.

2021 оны долдугаар сард “Шивээ-Овоо” ХК-д дизель түлш нийлүүлэх 9.4 тэрбум төгрөгийн тендер

2022 оны нэгдүгээр сард “Шивээ-Овоо” ТӨХК-д дизель түлш нийлүүлэх 9.8 тэрбум төгрөгийн тендер

2022 оны нэгдүгээр сард “Шивээ-Овоо” ТӨХК-д дизель түлш нийлүүлэх 8.4 тэрбум төгрөгийн тендер

2022 оны есдүгээр сард “Шивээ-Овоо” ТӨХК-д дизель түлш нийлүүлэх 9.7  тэрбум төгрөгийн тендер

2023 оны гуравдугаар сард “Шивээ-Овоо” ТӨХК-д дизель түлш нийлүүлэх 33.9 тэрбум төгрөгийн тендер

2024 оны хоёрдугаар сард “Шивээ-Овоо” ТӨХК-д дизель түлш нийлүүлэх 26.7 тэрбум төгрөгийн тендер

2024 оны арваннэгдүгээр сард “Шивээ-Овоо” ТӨХК-д дизель түлш нийлүүлэх- 4.0 тэрбум төгрөгийн тендер,

2025 оны хоёрдугаар сард “Шивээ-Овоо” ТӨХК-д дизель түлш нийлүүлэх- 12.8 тэрбум төгрөгийн багц тендерт тус тус шалгарсан байна.

  Ч.ХҮРЭЛБААТАР Б.ОДГЭРЭЛ, Э.ЦАСЧИХЭР НАРЫН ХОРШИЛ БУЮУ “ШИВЭЭ ГОВЬ”-ИЙН ТЕНДЕРИЙГ ХУУ ХАМСАН НЬ

Ч.Хүрэлбаатар Монголын төрд 20 жил “зүтгэсэн”. Зүтгэсэн гэхээсээ илүү “тоносон” гэвэл онож мэдэх юм. Тэрбээр 2017-2020 онд Монгол Улсын Засгийн газрын Сангийн сайдаар ажиллаж байсан. Сангийн сайдаар ажиллаж байх үедээ Увс аймгийн Засаг дарга асан Э.Цасчихэрийг “Шивээ-Овоо” ТӨХК-ийн Санхүү хариуцсан тэргүүн дэд захирлаар томилуулжээ. Өөрөөр хэлбэл, нутгийн залуу, хамаарал бүхий этгээдээ төрийн өмчит компанийн хоёрдугаар хүн болгосон гэсэн үг л дээ. Ингээд “Шивээ-Овоо” ТӨХК-ийн тендерт Увсынхан “эзэн” сууж эхэлсэн байгаа юм.     

Ч.Хүрэлбаатар, Э.Цасчихэр, Б.Одгэрэл нар эртний танил, нэг нутаг, хамаарал бүхий этгээдүүд, ойр дотныхон гээд холбогдох гуншин ихтэй.

Ч.Хүрэлбаатар Сангийн сайд байхдаа Э.Цасчихэрийг “Шивээ-Овоо” ТӨХК-ийн Санхүү хариуцсан тэргүүн дэд захирлаар томилуулсан. Э.Цасчихэр нь “Шивээ-Овоо” ТӨХК-ийн тендер шалгаруулалтын үнэлгээний хороог даргалдаг. Өөрөөр хэлбэл, тендер шалгаруулалтыг хариуцдаг гэсэн үг. Ингээд 2021 оноос Б.Одгэрэлийн цагаан түүхтэй, 60 хоногийн өмнө байгуулагдсан компанийг “Шивээ-Овоо” ТӨХК-ийн тендерт шалгаруулаад эхэлсэн гэсэн үг. Ташрамд танилцуулахад, Э.Цасчихэр нь 2008-2012 онд Увс аймгийн Засаг даргаар, Увс аймгийн МАН-ын хорооны даргаар ажиллаж байсан нэгэн.

УВС АЙМГИЙН МАН-ЫН ДАРГА Б.ОДГЭРЭЛИЙН ТӨРСӨН ЭГЧ Б.ДАРИЙМААГИЙН ХҮҮГИЙН “ЧАНДМАНЬ КРЕДИТ” ХХК “ШИВЭЭ-ОВОО” ТӨХК-ИЙН 28 ТЕНДЕРТ ШАЛГАРЧЭЭ

            “Шивээ-Овоо” ТӨХК-ийг Б.Одгэрэл ганцаараа “тонодоггүй”. Төрсөн эгч Б.Дариймаагийнх нь хүү Б.Батболдын “Чандмань Кредит” ХХК ч монополь эрхтэй. Тос тосолгооны 25 тендерт шалгарсан түүх байна. Б.Одгэрэл “Өү Жи Энержи ойл” ХХК-аараа “Шивээ-Овоо” ТӨХК-аас 2021 оноос тендер тоншиж эхэлсэн. Харин үеэл дүү Б.Батболдынх нь “Чандмань Кредит” ХХК 2019 оноос “Шивээ-Овоо” ТӨХК-аас тендер авч эхэлжээ. Энэ хугацаа нь Э.Цасчихэрийг томилогдсны дараагаас байгаа нь тохиолдол уу.

 “Чандмань Кредит” ХХК нь 2019 оноос хойш мөн л “Шивээ-Овоо” ТӨХК-ийн тос, тосолгооны материалын 28 тендерт шалгарсан байна.

2019 оны зургадугаар сард Уулын тоног төхөөрөмжийн тос тосолгооны материал- 263 сая төгрөг

2020 оны хоёрдугаар сард Тос тосолгооны материал нийлүүлэх- 146 сая төгрөг,

2022 оны нэгдүгээр сард технологийн автомашины тос нийлүүлэх 1.3 тэрбум төгрөгийн тендер

2023 оны хоёрдугаар сард технологийн автомашины тос нийлүүлэх 1.1 тэрбум төгрөгийн тендер

2024 оны хоёрдугаар сард техникийн тос, тосолгооны материал нийлүүлэх 1.2 тэрбум төгрөгийн тендер гэх мэтээр нийт 25 тендерт шалгарсан байна.