“Эрдэнэт, Булганы цахилгаан түгээх сүлжээ” төрийн өмчит хувьцаат компанийн удирдлагуудыг хууль хяналтын байгууллагаас шалгаж байна. Тодруулбал, өнгөрсөн хоёрдугаар сард “Эрдэнэт, Булганы цахилгаан түгээх сүлжээ” ТӨХК-ийн гүйцэтгэх захирал Б.Адъяа, ерөнхий инженер Б.Эрдэнэцогт, төслийн инженер Х.Азжаргал нарыг хойшлуушгүйгээр баривчилж, 48 цаг саатуулсан байдаг. Тэгвэл мөрдөн шалгах ажиллагааны явцад ноцтой хэд хэдэн сэжүүр илэрчээ. Өөрөөр хэлбэл, дээрх нэр бүхий бүхий үгсэн тохиролцож, эрх мэдэл албан тушаалын байдлаа урвуулан ашиглаж, бусдад давуу байдал олгож, их хэмжээний хахууль авсан байж болзошгүй гэнэ.

            АТГ-ын мөрдөгчид В.Адъяа, Б.Эрдэнэцогт, Х.Азжаргал нарт холбогдох хэргийг шалгаж, шүүхэд шилжүүлэх саналтайгаар прокурорт хүргээлээд байна. Одоогийн байдлаар уг хэрэг прокурорт шалгагдаж байгаа бөгөөд хэрхэх нь тодорхойгүй байгаа аж.

АТГ: “ЭРДЭНЭТ, БУЛГАНЫ ЦАХИЛГААН ТҮГЭЭХ СҮЛЖЭЭ” ТӨХК-ИЙН УДИРДЛАГУУД ХАДАМ ДҮҮ, ЖОЛООЧ НАРЫНХАА ДАНСААР 100 САЯ ТӨГРӨГИЙН ХАХУУЛЬ АВСНЫГ ТОГТООСОН

АТГ-аас өгсөн мэдээллээр “Эрдэнэт, Булганы цахилгаан түгээх сүлжээ” төрийн өмчит хувьцаат компанийн удирдах албан тушаалтан А, А, Э нар нь “Орхон аймгийн төв Баян-Өндөр сумын 6-0,4 кВ-ын цахилгаан түгээх сүлжээг шинэчлэх, сайжруулах ажил”-ыг гүйцэтгэгч компанийн дутуу хийсэн ажлыг “Эрдэнэт, Булганы цахилгаан түгээх сүлжээ” ТӨХК гүйцэтгэхээр гэрээ байгуулан ажил гүйцэтгэж, албаны чиг үүргээ хэрэгжүүлсний хариуд бусдаас нийтдээ 100,000,000 төгрөгийн хахууль авсан гэх 2602000000115, 2501000070071, 2602000000114 дугаартай эрүүгийн гурван хэрэгт мөрдөн шалгах ажиллагаа явуулсан. Дээрх нэр бүхий удирдах албан тушаалтнууд нь Дэлхийн банкны олон улсын хөнгөлөлттэй зээлийн санхүүжилтээр хэрэгжиж буй “Эрчим хүчний төсөл-2” хөтөлбөрийн хүрээнд “РИ” компанийн гүйцэтгэж байгаа Орхон аймгийн төвд баригдах цахилгаан түгээх сүлжээг шинэчлэх, сайжруулах ажлыг дутуу хийсэн, мөн улсын комиссоос ажиллуулах боломжгүй гэж дүгнэсээр байхад гүйцэтгэлийн хяналт баталгаажуулах тооллогын комиссын дүгнэлтийг гаргуулах, эрчим хүчний барилга байгууламжийг ашиглалтад оруулах улсын комиссын гишүүнээр ажиллахдаа саналын эрхтэй шийдвэр гаргасан байна. Улмаар албаны чиг үүргээ хэрэгжүүлсний хариуд “Р.И” компанийн захирал Г-ээс хадам дүүгээрээ дамжуулан бэлнээр 50,000,000 төгрөг, танил дүүгийнхээ дансаар 45,000,000 төгрөг, жолоочийнхоо дансаар 5,000,000 төгрөгийг хахуульд авсан 4 удаагийн үйлдлийг мөрдөн шалгах ажиллагааны явцад тогтоолоо. Уг эрүүгийн гурван хэрэгт хахуульд авсан нийт 100,000,000 төгрөгийг Төрийн сангийн Авлигатай тэмцэх газрын хохирлын дансанд төлүүллээ” гэсэн байдаг.

“ЭРДЭНЭТ, БУЛГАНЫ ЦАХИЛГААН ТҮГЭЭХ СҮЛЖЭЭ” ТӨХК-ИЙН ЗАХИРАЛ В.АДЪЯА: ДӨРВӨН УДААГИЙН ҮЙЛДЛЭЭР 100 САЯ ТӨГРӨГ АВСАН ГЭДЭГ НЬ ОЛОН ХЭРГИЙГ ХОЛЬЖ СОЛЬЖ БАЙНА

            Тэгвэл бид энэ талаар “Эрдэнэт, Булганы цахилгаан түгээх сүлжээ” ТӨХК-ийн гүйцэтгэх захирал Б.Адъяатай холбогдож тодрууллаа.

            -Таныг 100 сая төгрөгийн хахуулийн хэрэгт холбогдуулан шалгаж байгаа юм байна. Энэ талаар тодруулах гэсэн юм?

            -Өнгөрсөн хоёрдугаар сараас хууль хяналтын байгууллагаас шалгаж байгаа нь үнэн. АТГ-аас шалгаж, хэргийг прокурорт шилжүүлээд байгаа. Одоогийн байдлаас прокурор хянах, шалгаж тогтоох, тодруулах арга хэмжээ авагдаж байна. Тийм учраас биднийг мэдээлэл өгч болохгүй гэсэн. Харин хэрэг шалгагдаад дуусахаар нарийн, тодорхой мэдээлэл өгч болох байх.

            -Та ажлаа хийж байгаа юу. Мөн тантай хамт шалгагдаж байгаа Б.Эрдэнэцогт, Х.Азжаргал нар албан тушаалаасаа чөлөөлөгдсөн үү?

            -Түр хугацаанд ажлаасаа түдгэлзсэн байгаа. Хэрэг хянан шийдэгдэх хүртэл ажлаа хийхгүй, энэ ч зөв байх. Б.Эрдэнэцогт, Х.Азжаргалын тухайд мөн ажлаасаа түдгэлзсэн болов уу. Нэг нь ажлаа хийж байж магадгүй. Би сайн мэдэхгүй байна.

            -Таныг “Эрчим хүчний төсөл”-2 хөтөлбөрийн хүрээнд ажил гүйцэтгэсэн компаниас дөрвөн удаагийн үйлдлээр хахууль авсан гэсэн. Энэ үнэн үү?

            -Хэрэв дөрвөн удаагийн үйлдлээр гэж тогтоосон болон олон хэргийг хольж сольжээ. Би тийм зүйл хийгээгүй, аваагүй.