Дорнод аймгийн Баян-Уул сумын иргэн Ц.Ганболд ОХУ-д саатуулагдсан тухай мэдээлэл цацагдсан. Монгол Улсын иргэнийг тагнуулын хэрэгт сэжиглэж, Чита мужийн цагдан хорих байранд сарын хугацаатай саатуулсан гэх. Бид энэ хэргийн эргэн тойронд дараах эх сурвалжуудтай холбогдож, мэдээлэл бэлтгэлээ.

        Ц.Ганболд эхнэрийн хамт Баян-Уул сумаас 50 км-ийн зайд байрлах Ульхан боомтод ажиллаж, амьдардаг. Мал маллахын сацуу цахилгааны монтёроор ажиллаад жил гаран болж байгаа. Ульхан боомтоор долоо хоног бүр шахуу гарч, хэрэглээний хүнс, эд зүйлсээ худалдан авдаг. Үүний адилаар сар шинэдээ бэлдэхээр хоёрдугаар сарын 10-даар хил гарч явахдаа ОХУ-ын хууль хяналтын байгууллагынханд саатуулагджээ. Ингээд сураг алдрахаар нь ар гэрийнхэн нь араас нь явсан ч Чита хотын цагдан хорих ангид саатуулагдсан тухай мэдээлэл авсан байна. Ц.Ганболдын ар гэрийнхэнд ОХУ-ын хууль хяналтынхан “Тагнуулын хийсэн байж болзошгүй зүйл ангиар шалгаж байна. Сарын хугацаанд саатуулж шалгана” гэсэн мэдээллийг өгчээ. Ингээд ар гэрийнхэн нь шинийн дөрвөнд хилээр нэвтэрч, сум орон нутгийн удирдлагадаа хандсан байна. Мөн Улаан-Үд хот дахь Ерөнхий консулын газраар дамжуулан Гадаад харилцааны яаманд ханджээ. Мөрдөн шалгах ажиллагаа үргэлжилж байгаа, ирэх сарын дундуур цагдан хорионы хугацаа дуусна гэнэ. Иймд албаныхан болон ар гэрийнхэн нь хүлээлтийн байдалтай байгаа ажээ.

БАЯН-УУЛ СУМЫН ЗАСАГ ДАРГА М.БАТТУЛГА: МАНАЙ СУМЫН ИРГЭН ЧИТА ХОТОД ХОРИГДОЖ БАЙГАА НЬ ҮНЭН

       Энэ асуудлын талаар бид Дорнод аймгийн Баян-Уул сумын Засаг дарга М.Баттулгатай холбогдож тодрууллаа. Ц.Ганболдын хувьд Баян-Уул сумын уугуул, ах, дүү, хүүхдүүд нь сумандаа амьдардаг ажээ.

М.Баттулга “Манай сумын иргэнийг ОХУ-д явж байхад нь тагнуул хийсэн хэргээр баривчилсан. Ингээд Чита хотын хорих ангид хорьжээ. Энэ иргэн төрд ажиллаж үзээгүй, суманд цахилгааны монтёр л хийдэг хүн. Цагаан сарын өмнө л саатуулсан юм байна. Ар гэрийнхэн нь ОХУ-д очоод мөрдөн байцаагчтай нь уулзсан юм билээ. Гэхдээ тагнуулын хэрэг гээд байгаа л болохоос ямар тагнуул, юу болсон гэдгийг нь огт хэлээгүй гэсэн. Ар гэрийнхэн нь Гадаад харилцааны яаманд хандсан байгаа. Эндээс нарийн мэдээллийг тодруулах нь зүйтэй болов уу. Хэдийгээр манай сумын хүн, бид хүнийхээ араас явах ёстой ар гэрийнхэн нь мэдээллийг нууцлахыг хүссэн. Мөн буруу, ташаа мэдээлэл цацагдаад, ОХУ-ын талд хүрчихвэл тус биш, ус болно гэж болгоомжилж байгаа” гэлээ.

         Энэ асуудлыг Баян-Уул сумын Засаг даргаас гадна Дорнод аймгийн ЗДТГ-ын удирдлагууд хэлэлцэж, ар гэрийнхэнтэй холбогдож, шаардлагатай арга хэмжээг авч байгаа гэнэ.

ГАДААД ХАРИЛЦААНЫ ЯАМНЫ МЭРГЭЖИЛТЭН: АР ГЭРИЙНХЭН НЬ МЭДЭЭЛЛИЙГ НУУЦЛАХЫГ ХҮССЭН. БИД ШААРДЛАГАТАЙ АРГА ХЭМЖЭЭГ АВЧ БАЙГАА

        ОХУ-ын Улаан-Үд хот дахь Ерөнхий консулын газраар дамжуулан Гадаад харилцааны яамныхан Ц.Ганболдын асуудалд анхаарал хандуулж байгаа гэнэ. Мөн шаардлагатай албан бичиг, мэдээллийг хүргүүлжээ.

       Энэ талаар Гадаад харилцааны яамны мэргэжилтэнгээс тодруулахад “Ар гэрийнхэн нь хувь хүний нууцтай холбоотойгоор мэдээллийг нууцлахыг хүссэн. Бид шаардлагатай арга хэмжээг авч хэрэгжүүлж байгаа. Ямартай ч манай улсын иргэн саатуулагдсан, шалгагдаж байгаа нь үнэн” гэлээ.

Ц.ГАНБОЛДЫН ОХИН: БУРУУ ТАШАА МЭДЭЭЛЭЛ ТАРААЖ БАЙНА

          Үргэлжлүүлэн бид ОХУ-ын талд саатуулагдаад байгаа Ц.Ганболдын охинтой холбогдож, энэ талаар тодруулахад “Энэ бол буруу ташаа ойлгогдсон мэдээлэл. Худал мэдээлэл тарааж байгааг хууль хяналтын байгууллагад өгнө. Буруу, ташаа мэдээлэл тараахгүй байхыг хүмүүсээс хүсэж байна. Хувь хүний нууц, эмзэг мэдээлэл шүү дээ. Энэ бүхний ард ар гэрийнхэнд нь хэцүү байна” хэмээлээ.