Сар шинийн өдрүүдээр УИХ-ын гишүүн М.Нарантуяа-Нарагийн гэрт хулгай орсон хэрэг гарлаа. Тодруулбал, М.Нарантуяа-Нарагийн Сэлэнгэ аймгийн Түнхэл тосгон дахь гэрт хулгай орж, тодорхой тооны архи, виски, цахилгаан үүсгүүр, мөнгөн аяга кофе чанагч машиныг нь хулгайлж, гэрийг нь сандаачиж, эд хөрөнгийг нь эвдэж, сүйтгэжээ. Тэгвэл бид улстөрчдийн гэрт хулгай орж, дуулиан тарьж байсан өмнөх хэргүүдийг эргэн сануулж байна.

УИХ-ын гишүүний гэрт нэвтэрч, эд хөрөнгийг нь хулгайлсан хэрэг М.Нарантуяа-Нарагийнхаас өмнө Хууль зүй, дотоод хэргийн сайд асан Ц.Нямдорж, УИХ-ын гишүүн Л.Гүндалайд тохиолдож байлаа. Тэр ч бүү хэл Ц.Нямдорж,  Л.Гүндалай нарын гэрийг хоёр ч удаа хулгайчид тоносон байдаг.

УИХ-ЫН ГИШҮҮН Л.ГҮНДАЛАЙМӨНГӨН АЯГА, ҮНЭТ ЭДЛЭЛЭЭ ХУЛГАЙЧДАД ХОЁР УДАА АЛДАЖ БАЙЛАА

       БНСУ-ын “зартай” эр сайтар төлөвлөж, судалгаа хийж байгаад Монголын толгой “баячууд”-ын гэрээс алтан бурхан, их хэмжээний үнэт эдлэл хулгайлж, шуугиан дэгдээж байлаа. Тодруулбал, өдийгөөс арав гаруй жилийн өмнө Хан-Уул дүүргийн IV хорооны нутагт дэвсгэр Нүхтийн аманд байрлах зургаан айлын гэрт хулгай орсон хэрэг гарсан. Гэмт хэрэгтнүүдийг УИХ-ын гишүүн асан Л.Гүндалай нарын гэрээс нийт 900 орчим сая төгрөгийн эд зүйл хулгайлсан байдаг. Уг хэргийг Монгол Улсын иргэн Т.Хүрэлжанжин, БНСУ-ын иргэн Бак Жун Хёонг (Bak Jong Yeo­ng) нар үйлдсэн нь тогтоогдож, шүүхээс ял сонссон байдаг.

УИХ-ын гишүүн Л.Гүндалай хууль хяналтын байгууллагад мэдүүлэхдээ “...Манай эхнэрийн улаан шигтгээтэй ээмэг нэг хос, бөгж нэг ширхэг, алсаас удирддаг түлхүүр, эхнэрийн минь бэлэглэж байсан гурван бугуйн цаг, мөнгөн тоногтой хэт хутга, гурван ширхэг сувдан даруулга, гэрт цуглуулж байсан гадаад улсын мөнгөн дэвсгэртүүд, дөрвөн бурхан, Ариг банкны карт, гоо сайхны жижиг цүнх, эрэгтэй, эмэгтэй хүзүүний гинж, “Bulgariа” гэсэн бичигтэй ээмэг нэг хос, миний эхнэртээ худалдаж авж өгсөн шаргал өнгийн бугуйн цагууд, бугуйвч, ээмэгний хэлтэрхий, дөрвөн буланд улаан, цагаан, ногоон өнгөөр зүү ороож оёсон угалз хээтэй, бор өнгийн даалимба ба дотор талд нь 12.5 см өндөртэй, 7.8 см өргөнтэй, 4.5 см зузаантай, улаан хүрэн өнгийн толгойтой, шаргал өнгийн метал нуухтай, цагаан өнгийн халбагатай, их бие нь цагаан цайвар өнгийн хөөрөг, “Омега” гэсэн бичигтэй, улаан элгэн материалтай уут, дотор нь улаан алаг өнгийн толгойтой, шаргал өнгийн метал нуухтай, цагаан өнгийн халбагатай хөөрөг, зүү ороож оёсон бөөрөнхий хээтэй, хоёр зах болон амсарын хэсэг нь шаргал алаг өнгийн зүү ороож оёсон даалимба, метал нуухтай, шаргал өнгийн метал халбагатай, бор алаг өнгийн хөөрөг, хөөрөгний толгой, цагаан өнгийн сувдан шигтгээтэй шигтгэдэг ээмэг, гурван одны хэлбэртэй цагаан өнгийн жижиг шигтгээтэй ээмэг, А-14 гэж дугаарласан 56 см урттай, цайвар өнгийн нарийхан, төмөр металл зүүлт, “Nikon” зургийн аппарат, бугуйвч,  зүүлтний клон, гарын бугуйн эрхи, япон шүрэн ээмэг, алтан бөгж, “channel” брэндийн шаргал өнгийн алтан бөгж, бриллиантан шигтгээтэй цагаан алтан бугуйвч, сваровский бугуйвч, Сваровский урт гинжтэй хүзүүний зүүлт зэргийг алдсан. Эд зүйл таньж олуулах ажиллагаагаар заримыг нь буцааж авсан. Манай эхнэрийн зарим эд зүйл олдоогүй” гэж мэдүүлж байсан түүхтэй.

Тэрбээр ганцхан удаа хулгайн хэргийн хохирогч болоогүй. Тодруулбал, 2017 оны нэгдүгээр сарын 19-нд Хан-Уул дүүргийн дөрөвдүгээр хорооны нутаг дэвсгэр Нүхтийн аманд байрлах гэрт нь хулгай орж, олон тооны мөнгөн аяга, үнэт зүйлсийг нь хулгайлж байлаа. Хэргийг эрхэлсэн тодорхой ажилгүй Э, Г нар үйлдсэнийг илрүүлж, хуулийн байгууллагаас шалгаж байсан түүхтэй.

СҮҮЛД ХУУЛЬ ЗҮЙ, ДОТООД ХЭРГИЙН САЙД АСАН Ц.НЯМДОРЖИЙН ГЭРТ НЭВТЭРСЭН ХУЛГАЙЧ ОЛДООГҮЙ

       Хууль зүй, дотоод хэргийн сайд асан Ц.Нямдоржийн гэрт хоёр ч удаа хулгайч нэвтэрч, эд зүйлсийг нь тоносон хэрэг бүртгэгдэж байжээ. Тодруулбал, 2014 онд Ц.Нямдоржийн хаусыг эрхэлсэн тодорхой ажилгүй, Баянзүрх дүүрэгт оршин суух Б гэх залуу тоносон хэрэг гарсан. Тухай үедээ хулгайч Б нь олон тооны хаус ухаж, 115 сая төгрөгийн эд хөрөнгийн хохирол учруулсан нь тогтоогдсон байдаг. Ташрамд дурдахад, Ц.Нямдорж тухайн үед УИХ-ын гишүүнээр ажиллаж байлаа.

      Хоёрдугаарт, хэдхэн жилийн өмнө буюу 2022 онд Ц.Нямдоржийн гэрт мөн л хулгайч нэвтэрсэн байдаг. Тодруулбал, 2022 оны арванхоёрдугаар сарын 30-нд цагдаагийн байгууллагад “Зуслангийн байшинд хулгай орж, орон гэр тоносон байна” гэх мэдээлэл ирсэн. Дуудлагын дагуу Чингэлтэй дүүргийн цагдаагийн албан хаагчид шалгалтын ажиллагаа явуулж, хэрэг бүртгэл нээн шалгасан. Гэхдээ хэчнээн төгрөгийн эд зүйлсийг, хэн гэгч этгээд тоносон нь тодорхой болоогүй. Өөрөөр хэлбэл, Ц.Нямдоржийн зуслангийн байшинд сүүлд нэвтэрсэн хулгайч юу авсан, ямар эд хөрөнгө хулгайлсан гэдэг нь тодорхой болооогүй юм.