ЕРӨНХИЙ САЙД Г.ЗАНДАНШАТАР “ДЦС-4” ТӨХК-ИЙН ЗАХИРАЛ АСАН Ү.ТӨМӨРХУЯГИЙГ АТГ-Т ШАЛГУУЛАХЫГ ҮҮРЭГДСЭН Ч ҮНЭНДЭЭ ШАГНАЖЭЭ

Б. Цогтбаяр:
Эрэн сурвалжлах

2026-01-27, 85

Нийслэлийн тог, дулааны талаас илүүг дангаараа хангадаг “ДЦС-4” ТӨХК-ийн Тэргүүн дэд захирлаар дөрвөн жил, гүйцэтгэх захирлаар долоон жил ажиллаж, тус станцыг үндсэндээ 11 жил дангаараа эзэгнэж, эрхшээсэн Ү.Төмөрхуяг авлига, албан тушаалын хэрэгт холбогдож, өнгөрөгч арванхоёрдугаар сард ажлаасаа чөлөөлөгдсөн.

Тодруулбал, 2025 оны арваннэгдүгээр сарын 28-ны Засгийн газрын хуралдааны үеэр Ерөнхий сайд Г.Занданшатар “Асуудал нь илэрчихээд байгаа “ДЦС-4” ТӨХК-ийн захирал Ү.Төмөрхуягийн хэргийг хуулийн байгууллагад шилжүүл. Үр ашиггүй тендерүүд зарлаж, хэт өндөр үнээр баахан бараа материал шахчихсан. Тэнд бүх төрлийн хулгай, луйвар байна. Шахаа байна, борлуулалт байна, гэрээнүүд байна. Тэгсэн мөртөө цахилгаан, дулааны үнийг нэмэх ёстой гэж яриад сууж байж болохгүй. Дээрээс нь “ДЦС-4” ТӨХК-ийн хэд хэдэн инженер авлига авсан нь тогтоогдож, эрүүгийн хэрэгт шалгагдаад явж байгаа. Одоо энэ хулгай, луйвартай холбоотой асуудлуудыг цэгцэл, хариуцлага тооц” гэж үүрэг болгосон байдаг.

Улмаар гурав хоногийн дараа буюу 2025 оны арванхоёрдугаар сарын 1-нд Ерөнхий сайд Г.Занданшатар ЭХ-ний сайд Б.Чойжилсүрэнг дагуулан "ДЦС-4" ТӨХК-д очиж, тус станцын нөхцөл байдалтай танилцсан. Ерөнхий сайд Г.Занданшатарыг очиход "ДЦС-4" ТӨХК-ийн захирал Ү.Төмөрхуяг угтан авч, уруулаа унжуулан зовлонгоо тоочиж байв.

Ингээд маргааш нь буюу арванхоёрдугаар сарын 2-нд Засгийн газраас “ДЦС-4” ТӨХК-ийн захирал Ү.Төмөрхуягийг чөлөөлж, түүний оронд Н.Тавинбэхийг “ДЦС-4” ТӨХК-ийн гүйцэтгэх захирлаар томилсон байдаг.

Хамгийн ноцтой нь, Н.Тавинбэх “ДЦС-4” ТӨХК-ийн захирлаар томилогдоод 10 хоногийн дараа буюу 2025 оны арванхоёрдугаар сарын 12-нд Б/843 дугаартай тушаал гаргаж, Үржиндоржийн Төмөрхуягийн Хаан банкны 56224872.. дугаарын данс руу 98.7 сая төгрөгийг “Өндөр насны тэтгэвэрийн тэтгэмж” утгатайгаар шилжүүлжээ.

Өөрөөр хэлбэл, "ДЦС-4" ТӨХК-д хэт өндөр үнэтэй бараа материал шахаж, тус станцыг бүхэл бүтэн 98 тэрбум төгрөгийн алдагдалд оруулж, дампууралд хөтөлсөн Ү.Төмөрхуяг АТГ-ын хаалга татаж дээлээ нөмрөх биш, эсрэгээрээ 98.7 сая төгрөгөөр шагнуулаад тэтгэвэртээ суужээ гэсэн үг.

ЕРӨНХИЙ САЙД Г.ЗАНДАНШАТАР “ДЦС-4” ТӨХК-ИЙН ЗАХИРАЛ АСАН Ү.ТӨМӨРХУЯГИЙГ АТГ-Т ШАЛГУУЛАХЫГ ҮҮРЭГДСЭН Ч ҮНЭНДЭЭ ШАГНАЖЭЭ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид