Н.Энхбат нь “Жэм молл” худалдааны төвд гэр бүлийн хамаарал бүхий харилцаатай хүн болох эхнэр З.М-тэй маргалдаж, улмаар хутгаар хохирогчийг гэмтээж, цочмог цус алдалтын шокт оруулж, амийг нь хөнөөсөн ноцтой хэрэг гарсан. Прокуророос түүнийг онц харгис хэрцгийгээр, гэр бүлийн хүчирхийлэл үйлдэж хүнийг алсан гэмт хэрэгт холбогдуулан яллах дүгнэлт үйлдэж, хэргийг шүүхэд шилжүүлсэн юм. Анхан шатны шүүхээс Н.Энхбатад бүх насаар нь хорих ял оноож, хаалттай хорих ангид ялыг нь эдлүүлэхээр болсон байдаг. Мөн Н.Энхбатаас сэтгэцийн хохирол хор уршгийн зардалд 162,360,000 төгрөгийг гаргуулж, амь хохирогчийн төрсөн хүүхэд Э.Д-д олгохоор шийдвэрлэсэн.

            Энэ оны дуулиант, ноцтой хэргийн нэг болох Н.Энхбатын хэргийн хавтаст хэргийг хүргэж байна.

Шүүгдэгчийн биеийн байцаалт:

Монгол Улсын иргэн Н.Энхбат нь оны гуравдугаар сарын 31-ний өдөр *** хотод төрсөн, эрэгтэй, дээд боловсролтой, Эдийн засагч мэргэжилтэй, хувиараа хөдөлмөр эрхэлдэг гэх, ам бүл тав, эхнэр, 3 хүүхдийн хамт дугаар тоотод оршин суух хаягтай,  хэрэг хариуцах чадвартай, улсаас авсан гавьяа шагналгүй, урьд эрүүгийн хариуцлага хүлээж байгаагүй гэх,

Холбогдсон хэргийн талаар:

Шүүгдэгч Н.Энхбат нь Баянгол дүүргийн

ажиллагаа явуулдаг “Жэм молл” худалдааны төвийн нэгдүгээр давхарт гэр бүлийн хамаарал бүхий харилцаатай хүн болох эхнэр З.М-тай гэр бүлийн таарамжгүй харилцааны улмаас маргалдаж, улмаар түүний ажлын байр болох 108 дугаартай лангууны ард байсан хар хөх өнгийн бариултай хутгаар хохирогч З.М-ын эрүү, хүзүү, цээж, нуруу, хэвлий, шуу, сарвуу, гуя хэсэгт олон тооны зүсэгдсэн шарх үүсгэж, цээж, хэвлий хөндий рүү нэвтэрч дотор эрхтэн гэмтээсэн шарх, биеийн гадаргуугийн олон тооны хатгагдаж зүсэгдсэн шархны улмаас цочмог цус алдалтын шокд оруулж амь насыг нь хохироосон буюу онц харгис хэрцгийгээр, гэр бүлийн хүчирхийлэл үйлдэж хүнийг алсан гэмт хэрэгт холбогджээ.

 Эрүүгийн хэрэг хянан шийдвэрлэх тухай хуулийн 34.14 дүгээр зүйлийн 1, 36.2 дугаар зүйлийн 1, 2, 4, 36.3 дугаар зүйлийн 1 дэх хэсэг, 36.6, 36.7, 36.8 дугаар зүйлийн 1, 4, 36.10 дугаар зүйлийн 4, 36.13 дугаар зүйлийн 1, 37.1 дүгээр зүйлийн 1, 2, 38.1 дүгээр зүйлийн 1, 38.2 дугаар зүйлийн 1 дэх хэсэгт заасныг тус тус заасныг удирдлага болгон

ТОГТООХ нь:

1. Шүүгдэгч Н.Энхбатыг онц харгис хэрцгийгээр, гэр бүлийн хүчирхийлэл үйлдэж хүнийг алах” гэмт хэрэг үйлдсэн гэм буруутайд тооцсугай.

2. Шүүгдэгч Н.Э***ад Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.1, 2.8 дахь заалтад тус тус зааснаар бүх насаар хорих ял шийтгэсүгэй.

3. Эрүүгийн хуулийн ерөнхий ангийн 5.6 дугаар зүйлийн 5 дахь хэсэгт зааснаар шүүгдэгч Н.Э***ад оногдуулсан бүх насаар хорих ялыг хаалттай хорих байгууллагад тусгаарлаж эдлүүлэхээр тогтоосугай.

4. Эрүүгийн хуулийн ерөнхий 6.10 дугаар зүйлийн 1 дэх хэсэгт зааснаар шүүгдэгч Н.Э***ын цагдан хоригдсон нийт 82 (наян хоёр) хоногийг түүний эдлэх ялд оруулан тооцсугай.

5. Иргэний хуулийн 497 дугаар зүйлийн 497.1 дэх хэсэг, 510 дугаар зүйлийн 510.1, 511 дугаар зүйлийн 511.5 дахь хэсэгт тус тус зааснаар шүүгдэгч Н.Э***аас сэтгэцийн хохирол хор уршгийн зардалд 162,360,000 (нэг зуун жаран хоёр сая гурван зуун жаран мянга) төгрөгийг гаргуулж, амь хохирогчийн төрсөн хүүхэд Э.Д***д олгосугай.

- Эрүүл мэндийн даатгалын тухай хуулийн 12 дугаар зүйлийн 12.1.1 дэх заалтад зааснаар 1,477,000 (нэг сая дөрвөн зуун далан долоон мянга) төгрөгийг шүүгдэгч Н.Э***аас гаргуулж, иргэний нэхэмжлэгч Эрүүл мэндийн даатгалын Ерөнхий газарт олгосугай.

- Эрүүгийн хэрэг хянан шийдвэрлэх тухай хуулийн 36.4 дүгээр зүйлийн 1 дэх хэсэгт зааснаар хохирогчийн хууль ёсны төлөөлөгч З.Э***ын өмгөөллийн хөлс 10,000,000 (арван сая) төгрөгийн нэхэмжлэлийг хэрэгсэхгүй болгосугай.

6. Эрүүгийн хэрэг хянан шийдвэрлэх тухай хуулийн 36.4 дүгээр зүйлийн 2-т зааснаар хохирогчийн хууль ёсны төлөөлөгчийн ажилгүй байсан хугацааны цалин хөлс, хүүхдийн сургалтын зардал, гэр бүлийн сэтгэл заслын эмчилгээний нэхэмжлэлийг хэлэлцэхгүй орхиж, тэдгээртэй холбоотой баримтаа бүрдүүлэн иргэний хэрэг шүүхэд хянан шийдвэрлэх ажиллагааны журмаар жич нэхэмжлэл гарган шийдвэрлүүлэх эрхийг нээлттэй үлдээсүгэй.

7. Гэр бүлийн тухай хуулийн 66 дугаар зүйлийн 66.1 дэх хэсэгт зааснаар амь хохирогчийн хүүхэд болох охин Э.Э*** (12 настай), охин Э.Э*** (7 настай) нарт асран хамгаалагч томилох асуудлыг шийдвэрлэхийг Баянгол дүүргийн Засаг даргад үүрэг болгосугай.

8. Эрүүгийн хэрэг хянан шийдвэрлэх тухай хуулийн 21.5 дугаар зүйлийн 1 дэх хэсгийн 1.1, 1.2, 1.4 дэх заалт, 6 дахь хэсэгт тус тус зааснаар хэрэгт эд мөрийн баримтаар хураагдан ирсэн “I-Phone” загварын гар утас 1 ширхгийг шүүхийн шийдвэр хүчин төгөлдөр болмогц шүүгдэгч Н.Э***ад олгосугай.

- хөвөн бамбар 5 ширхэг, цустай марл 1 ширхэг, хутга 1 ширхэг (хар хөх өнгийн иштэй , 20см урт, ажлын хэсэг нь 9см урттай), шар өнгийн төмөр 1 ширхэг, хар өнгийн сандал 1 ширхэг,  “I-Phone” загварын гар утас 1 ширхэг,  хүрэн өнгийн платье 1 ширхэг, хүрэн өнгийн тэлээ, хар өнгийн бүс, хөхний даруулга, дотуур өмд тус бүр 1 ширхэг, хүрэн хар өнгийн гутал 1 хос, хар өнгийн цамц 1 ширхэг,  саарал өнгийн өмд 1 ширхэг, ногоон өнгийн футболк 1 ширхэг,  2 ширхэг чиптэй түлхүүр, “Camel” гэх бичиглэлтэй чихэр тус бүр 1 ширхэг, хар өнгийн оймс 1 хос, цагаан өнгийн пүүз 1 хос зэргийг устгахыг “Эд мөрийн баримт устгах комисс”-т даалгаж, 2 ширхэг компакт дискийг хэргийн хадгалах хугацаа дуустал хэрэгт хавсарган үлдээж, хэрэгт битүүмжлэгдсэн эд хөрөнгөгүй, шүүгдэгчийн иргэний бичиг баримт шүүхэд шилжиж ирээгүй, хэрэг хянан шийдвэрлэх ажиллагааны зардалгүйг тус тус дурдсугай.

9. Шийтгэх тогтоолыг уншиж сонсгосноор хүчинтэй бөгөөд шүүгдэгч Н.Э***ад урьд авсан цагдан хорих таслан сэргийлэх арга хэмжээг хэвээр үлдээж, эдлэх ялыг энэ өдрөөс эхлэн тоолсугай.

10. Шийтгэх тогтоолыг шүүгдэгч, хохирогч, тэдгээрийн хууль ёсны төлөөлөгч, өмгөөлөгч, улсын яллагч, дээд шатны прокурор гардан авсан эсхүл хүргүүлснээс хойш 14 хоногийн дотор Нийслэлийн Эрүүгийн хэргийн Давж заалдах шатны шүүхэд гомдол гаргах, эсэргүүцэл бичих эрхтэй болохыг мэдэгдсүгэй.

11. Эрүүгийн хэрэг хянан шийдвэрлэх тухай хуулийн 37.1 дүгээр зүйлийн 2 дахь хэсэгт зааснаар давж заалдах гомдол гаргах, эсэргүүцэл бичсэн тохиолдолд тогтоолын биелэлтийг түдгэлзүүлж, шийтгэх тогтоол хүчин төгөлдөр болтол Н.Э***ад урьд авсан цагдан хорих таслан сэргийлэх арга хэмжээг хэвээр үргэлжлүүлсүгэй.