УИХ-ын гишүүн асан Ц.Цэрэнпунцаг, “Эрэл”-ийн Б.Эрдэнэбат, “Таванбогд”-ын Ц.Баатарсайхан нарын хүүхдүүд бүлэглэж, мансуурсан үедээ 25 настай залууг зодож хүнд гэмтэл учруулсан ноцтой хэрэг гараад дөрвөн сар өнгөрлөө. Тодруулбал, өнгөрсөн долдугаар сард Сүхбаатар дүүргийн нутаг дэвсгэрт байрлах нэгэн цэнгээний газрын гадаа уг зодоон болсон байдаг. Хохирогч залуу гадаад улсад эмчилгээ хийлгэж, УИХ-ын гишүүн асан Ц.Цэрэнпунцагийн хүү Санжаачойпэл, “Эрэл”-ийн Б.Эрдэнэбатын хүү Тэмүүлэн нарыг цагдан хорьсон. Харин зодоонд хамжигчаар оролцсон “Таванбогд”-ын Ц.Баатарсайханы хүү, “Говь” ХК-ийн гүйцэтгэх захирал Амарсайхан хэрэг гардаг өдөр Монгол Улсын хилээр гаран зугтсан билээ. Хуулийн байгууллагынхан Б.Амарсайханыг эрэн сурвалжилж, өнгөрсөн сард Монгол Улсад авчирсан. Одоогийн байдлаар УИХ-ын гишүүн асан Ц.Цэрэнпунцагийн хүү Санжаачойпэлийн шинжилгээнээс мансууруулах бодис илэрч, шалгалтын ажиллагааг үргэлжлүүлж байгаа юм.

     Хохирогч залуугийн тухайд биеийн байдал нь хүнд, нүд, тархи нь хүнд гэмтсэн байдаг.  Тэгвэл хохирогч залуугийн аав Д.Дашзэвэгтэй хэд хоногийн өмнө холбогдож, хүүгийнх нь биеийн байдлын талаар тодруулахад “Миний хүүгийн биеийн байдал дээрдэж байгаа. Хүү минь эдгэж байна. Бүрэн эдгэрэхэд цаг хугацаа шаардлагатай. Мэс засалд орж, амжилттай болсон. Мэс заслын эмч хэлэхдээ “Хүүгийн чинь нүдний харааг бүх боломжоороо дахин сэргээсэн. Одоо давгүй болж байна. Хэрэг нь прокурор руу шилжиж байгаа байх” гэсэн юм.