Бага насны хүүхэд ээжтэйгээ хамт шатаж, нас барсан харамсалтай хэрэг гараад байна. Иймд бид галлагааны улирал эхэлсэн энэ үед сэрэмжлүүлэг болгох үүднээс энэхүү мэдээллийг бэлтгэлээ.

      Тодруулбал, Сонгинохайрхан дүүргийн 40 дүгээр хорооны нутаг дэвсгэрийн дугаар тоотод энэ сарын 22-нд буюу хоёр хоногийн өмнө 19:42 цагийн үед гал гарч, 25 настай эмэгтэй гурван настай охинтойгоо шатаж, нас барсан байдаг. Тус дүүргийн Онцгой байдлын хэлтсийн 29 дүгээр ангийн алба хаагчдыг очиход иргэн Б-гийн эзэмшлийн таван  ханатай гэр эд зүйлийн хамт бүрэн шатсан байжээ. Харин тухайн гэртэй зэрэгцүүлж барьсан иргэн А-гийн таван ханатай гэрийн хойд талын хэсэг хайрагдан шатаж байсныг онцгой байдлынхан ажиллаж унтраасан байдаг. Уг түймэрт амь үрэгдсэн 25 настай эмэгтэй Н, гурван  настай эмэгтэй А нарыг Сонгинохайрхан дүүргийн Цагдаагийн хоёрдугаар хэлтэст шилжүүлэн өгөөд байна. Уг харамсалтай хэргийг Сонгинохайрхан дүүргийн цагдаагийн хэлтэст хэрэг нээн шалгаж байгаа ажээ.

ТАЛИЙГААЧ ЭМЭГТЭЙ НӨХӨР,  ХОЁР ХҮҮХДИЙН ХАМТ АЙЛЫН ХАШАА ТҮРЭЭСЛЭЖ АМЬДАРДАГ БАЙЖЭЭ

Талийгч эмэгтэй хоёр хүүхэдтэй байжээ. Гал гарах үед бага охинтойгоо гэртээ байсан аж. Ингээд харамсалтайгаар галд өртөж, тусламж авч амжилгүй амиа алдсан байна.

            Уг харамсалтай хэргийн талаар Сонгинохайрхан 40 дүгээр хорооны Засаг даргаас тодруулахад “Охинтойгоо шатаж, нас барсан иргэн хоёр сарын өмнө манай хороонд нүүж ирж, айлын хашаа түрээслэн амьдардаг байсан. Манай хороонд түр оршин суугчийн бүртгэлтэй байсан. Өнгөрсөн хоёр хугацаанд хорооны эмнэлэгт хүүхдээ үзүүлсэн байдаг юм билээ. Ийм л бүртгэлээс өөр мэдээлэл алга. Хүний амь эрсэдсэн харамсалтай хэрэг гарсанд бид маш их харамсаж байна. Иймд галлагааны улирал эхэлсэн учир сонор, сэрэмжтэй байхыг анхааруулж байна. Гал гарсан хашаанд хоёр ам бүл амьдардаг байсан. Хашааны эзэн А-гийн гэр галд өртсөн учир бид шаардлагатай арга хэмжээг авч байгаа. Талийгаач эмэгтэйнх өмнө нь Сонгинохайрхан дүүргийн 33 дугаар хороонд айлын хашаа түрээслэн амьдардаг байсан юм билээ. Талийгаач Сэлэнгэ аймгийн гаралтай хүн байсан. Талийгаачийн нөхрөөс цагдаа нар байцаалт авахаар авч явсан учир бид ар гэрийнхэнтэй нь холбогдож чадаагүй байгаа. Тиймээс хэргийн талаар дэлгэрэнгүй мэдээлэл өгөх боломжгүй байна. Галын дүгнэлт гарсны дараа хэргийн талаарх мэдээллийг өгөх боломжтой” гэлээ.

ТАЛИЙГААЧИЙН НӨХРӨӨС МЭДҮҮЛЭГ АВЧЭЭ

            Түрээсийн хашааны эзэн А-гийнд хүүхдүүд нь байжээ. Тэд галын дуудлага өгч, түргэн тусламж, онцгой байдал, цагдаагийн албан хаагчид хэргийн газарт очсон байна. Цагдаагийн албан хаагчид талийгаачийн нөхрөөс мэдүүлэг авч, мөрдөн шалгах ажиллагааг эхлүүлжээ. Шүүх шинжилгээний хариу 14-21 хоногийн дараа гарах ажээ.