Дорнод аймгийн Булган суманд зам засварын ажил гүйцэтгэж байсан компанийн ажилтнууд цогцос олжээ. Тодруулбал, Хөлөнбуйр сумаас Булган сумын чиглэлийн 20 км автозамыг засварлаж байх үед хүний араг яс олдож, цагдаагийн байгууллагад ханджээ. Уг хэргийг Дорнод аймгийн цагдаагийн газарт шалгаж, бүрэлдэхүүн ажиллаж байгаа аж.

ДОРНОД АЙМГИЙН ЦАГДААГИЙН ГАЗРЫН МӨРДӨГЧ: ЗАМ ЗАСВАРЫН АНГИЙН МЕНЕЖЕР Ш ГЭХ ХҮНЭЭС ДУУДЛАГА ИРСЭН. НАС БАРААД УДСАН БӨГӨӨД ХИРГЭСҮҮР БИШ

      Энэ талаар Дорнод аймгийн цагдаагийн газрын мөрдөгч Д.Дашхүүгийн өгсөн мэдээллээр “Наймдугаар сарын 23-нд Дорнод аймгийн Булган сумын гуравдугаар багийн нутагт зам засварын ажил гүйцэтгэж байсан “Чандмань тал” компанийн менежер Ш гэх хүнээс цогцос олсон тухай дуудлага цагдаагийн байгууллагад ирсэн. Ингэхдээ техникээр шороо малтлага хийж байхад цогцос гарч ирлээ гэсэн. Дуудлагын дагуу цагдаагийн албан хаагчид хэргийн газарт ажиллаж, мөрдөн шалгах ажиллагааг явуулсан. Шалгалтын явцад он удаан жил болсон, нас бараад удсан, өгөршсөн байсан. Одоогийн байдлаар талийгаачийг хэзээ нас барсан зэрэг нарийн цаг хугацааг тогтоох боломжгүй. ДНК, насыг тогтоох шинжээч томилж, шинжилгээ хийгдэж байна. Хэргийг шалгах, шинжилгээ хийх прокурорын зөвшөөрөл гарсан тул шалгалтын ажиллагааг эхлүүлсэн. Орон нутгийн зарим хэвлэлээр эртний түүхийн булш, хиргэсүүр олдлоо гэх ташаа мэдээлэл гарч байна. Хиргэсүүр биш гэдгийг онцолж хэлье. Цогцсыг шинжилгээний байгууллагад шилжүүлээд байна” гэлээ.

ДОРНОД АЙМГААС СУРАГГҮЙ АЛГА БОЛСОН ХҮМҮҮСИЙН БҮРТГЭЛИЙГ ХИЙЖ ЭХЭЛЖЭЭ

         Шүүхийн шинжилгээний хариу 14-21 хоногийн дараа гарна. Холбогдох  албаныхан цогцсыг хэн болох, хэдэн настай, хэзээ барсан зэрэг мэдээллийг тодорхой болгосныхоо дараа ар гэрийнхэнд мэдэгдэнэ. Тэгвэл Дорнод аймгийн хэмжээнд сураггүй алга болсон хүмүүсийн бүртгэлийг дахин хийж эхэлжээ.

Энэ талаар эх сурвалж мэдээлэхдээ “Сураггүй алга болсон хүмүүсийн бүртгэл аймаг, сумын архивт бий. Дорнод аймгийн цагдаагийн газрын нэгдсэн мэдээллийн санд ч тодорхой байгаа. Зам засварын ангийнхны олсон цогцостой холбогдуулан энэ мэдээллийг дахин баталгаажуулж, бүртгэжүүлж байгаа юм билээ. Одоогийн байдлаар Дорнод аймгийн хэмжээнд сураггүй алга болсон хэчнээн хүн байдаг нь тодорхойгүй байгаа” гэв.

ОРОН НУТГИЙН ИРГЭД: ЦОГЦОС ОЛДСОН ГАЗАР НЬ ДОРНОД АЙМГААС УЛААНБААТАР ХОТ РУУ ЯВДАГ ТӨВ ЗАМ. ТИЙМ УЧРААС ТАЛИЙГААЧАА ЭНД ХӨДӨӨЛҮҮЛЭХ УЧИРГҮЙ

       Орон нутгийн иргэдийн ярьж буйгаар цогцос олдсон хэсэгт зам тээврийн осол үргэлж гардаг гэнэ. Мөн цогцос олдсон газар нь Дорнод аймгаас Улаанбаатар хот руу явдаг төв зам учраас иргэд талийгаачаа энэ хэсэгт хөдөөлүүлэх боломжгүй гэж үзэж байгаа ажээ. Ийм учраас уг хэргийг сайтар шалгаж, хүн амины ноцтой хэрэг байх вий гэж таамаглаж байгаа гэнэ.

Энэ талаар орон нутгийн иргэн хэлэхдээ “Булган сумаас сураггүй алга болсон хэд хэдэн хүн байдаг. 100 гаруй жилийн түүхтэй сум шүү дээ. Түүнээс гадна төв зам дагуу байдаг учраас хөдөлгөөн ихтэй. Уугуул, суугуул оршин суугч олонтой. Мөн явуулын хүмүүс тасардаггүй. Ийм учраас энэ хэргийг сайтар шалгаж, мэдээлэх хэрэгтэй. Орон нутгийн иргэд айдастай байна. Сумын төвийнх нь төв зам доороос хүний цогцос олдсон шүү дээ” гэсэн юм.