-ХОМ-ТЭЭ ХОЁРХОН КОМПАНИТАЙ ГЭЖ МЭДҮҮЛСЭН Ч ЭХНЭРИЙНХЭЭ НЭР ДЭЭР 20 ГАРУЙ КОМПАНИТАЙГ НЬ БАРИМТААР ТОГТООЖЭЭ-

Чанга хашхирч, чарлаж явдаг УИХ-ын гишүүн С.Ганбаатарын суудал донсолгоотой байгаа. Хууль хяналтын байгууллагынханд хоёр жил ээрэгдэж, хөрш айлынх нь хаусыг мөрдөгчид нэгжих үеэр “Хууль бусаар намайг шалгалаа, би бөөс, хуурсаа бүгдийг нь шалгуулсан. Одоо гэмгүй залуучуудын гэрийг нэгжиж байна. Би эндээс гарахгүй”  гээд оройжин дөвчигнөсөн. Тэгээд тэмцэгчийн дүрээр эргэж ирээд, өөрийг нь захиалсан этгээдтэй хатуу үзнэ гэдгээ ч илэрхийлсэн. Гэхдээ тэр одоо чимээгүй байна, гарцаагүй баримтын өмнө унасан уу, гэм хор нь илэрсэн үү, сураг алга. Ямартай ч бүрэн эрхийнх нь хугацаа бүх мөсөн дуусаж ч мэдэх эргэлзээтэй, эгзэгтэй мөчид байна, тэр.

   Өнгөрсөн жилээс УИХ-ын гишүүн С.Ганбаатар уран, усан цахилгаан станцын төслүүдийг шүлс үсчүүлэн шүүмжлэх болсон. Монголыг хөгжүүлэх том төсөл яригдаад эхэлмэгц л “эх оронч”-ийн дүрд хувираад гараад ирдэг нь түүний гэм биш зан. Түрийвчээ түнтийлгэдэг технологи нь гээд хэлчихэд ч хилсдүүлсэн болохгүй. Өөрөөр бол, том төслүүдийг жадлан эсэргүүцэж, жагсаалаар сүрдүүлж, төрийг айлгаж түрийвчээ түнтийлгээд сурчихсан хүн.

      Тэгвэл “эх оронч” дүрээр халхавчилсан С.Ганбаатарын үнэн төрхийг хууль хяналтынхан илчилж, ноцтой баримтуудыг илрүүлсэн талаар эх сурвалж мэдээллээ. Өөрөөр бол, С.Ганбаатар “эх оронч”-ийн дүрээрээ авлига, албан тушаалын хэрэгт холбогдож, хууль бусаар хөрөнгөжиж, хөрөнгөө нуун дарагдуулж, Монголын үйлдвэрчний эвлэлийн хөрөнгийг хувьдаа шамшигдуулсан нь баримтаар илрээд байгаа гэнэ. Ийм ч учраас тэр чимээгүй байж мэдэх юм. 

БАРИМТ-1: УИХ-ЫН ГИШҮҮН С.ГАНБААТАР ХОМ-ТЭЭ ХОЁРХОН КОМПАНИ БҮРТГҮҮЛСЭН Ч ЭХНЭР Б.ТУНГАЛАГИЙНХ НЬ НЭР ДЭЭР 29 КОМПАНИ, АЖ АХУЙН НЭГЖ БҮРТГЭЛТЭЙ БАЙСАН НЬ ТОГТООГДЖЭЭ

      С.Ганбаатарын хувьд хөрөнгө орлогын мэдүүлэгтээ хоёрхон компанитай гэж мэдүүлсэн байдаг. Гэвч эхнэр Б.Тунгалагийнхаа нэр дээр үйл ажиллагаа явуулдаг 29 орчим компани, ТББ бүртгүүлжээ. Тухайлбал, аялал жуулчлалын чиглэлээр 2005 онд байгуулсан “Андискауред Монголиа” ХХК-ийг эхнэр Б.Тунгалагтайгаа хамтран эзэмшдэг ч, хөрөнгө орлогодоо мэдүүлээгүй байх жишээтэй. Цаашлаад  гадаад худалдаа, бизнесийн зөвөлгөө өгөх чиглэлээр байгуулсан  “Дархан ургах наран зүг” ХХК, аялал жуулчлалын чиглэлээр үйл ажиллагаа явуулдаг “Альпс ПНҮ”, “Ворлд плас файв”, “Монгол малын бэлчээрийн менежмент” ХХК,  “Боорчи баатар” ХХК, “Адвант трейд” ХХК зэрэг компаниа  эхнэр Б.Тунгалагийнхаа нэрээр  удирддаг байна. Гэвч эхнэрийнхээ нэр дээрх бүртгэлтэй 20 гаруй компани, ТББ-ын алийг нь ч тэр хөрөнгө орлоготоо дурдаагүй бөгөөд хөрөнгөө нуун дарагдуулсан ноцтой баримтын сэжүүр эндээс олджээ. Одоогийн байдлаар хууль хяналтын байгууллагаас С.Ганбаатар, Б.Тунгалаг нар дээр нэр дурдагдсан 29 компани, аж ахуйн нэгжид хэрхэн оролцоотой ажиллаж, амьдрач байсныг нь дэлгэрүүлэн шалгаж байгаа ажээ.

УИХ-ын гишүүн С.Ганбаатар, эхнэр Б.Тунгалаг нарын нэр дээр бүртгэлтэй  аж ахуйн нэгжийг танилцуулбал,

1. “Андискауред” ХХК- С.Ганбаатар 10 хувь, Б.Тунгалаг 90 хувийг нь эзэмшдэг
2. “Гурван анаг” ХХК- Б.Тунгалаг 50 хувийг нь эзэмшдэг
3. “Дархан ургах наран зүг” ХХК- Б.Тунгалаг 50 хувийг нь эзэмшдэг
4. “Ворлд плас файв” ХХК- Б.Тунгалаг 18 хувийг нь эзэмшдэг
5. “Монгол малын бэлчээрийн менежмент” ХХК- Б.Тунгалаг 20 хувийг нь эзэмшдэг
6. “Боорчи баатар” ХХК- Б.Тунгалаг 30 хувийг нь эзэмшдэг
7. “Адвант трейд” ХХК- Б.Тунгалаг 95 хувийг нь эзэмшдэг
8. Тогтвортой хөгжлийн төлөөх хариуцлагатай уул уурхайн санаачлага НҮТББ
9. Монголын Үйлдвэрчний эвлэлийн холбоо ҮЭБ
10. Боловсролын стандарт үнэлгээний төв НҮТББ
11. Индаго бодлогын судлалын хүрээлэн НҮТББ
12. Улс төр манлайллын хүрээлэн НҮТББ
13. Монголын бэлчээрийн хөгжлийн үндэсний нийгэмлэг НҮТББ
14. Монголын улс төрчдийн үндэсний хүрээлэн НҮТББ
15. Монголын Угсаатны цэрэг дайчдын эд хэрэглэл судлалын үндэсний нийгэмлэг НҮТББ
16. Монголын бэлчээрийн хөгжил технологийн үндэсний хүрээлэн НҮТББ

Тойрог сэлгэж, тохой нийлүүлсэн гишүүдээсээ удаа дараа урваж, улс төрийн нам, эвсэл болгоныг дамжиж яваа түүнээс юу хүлээх вэ, иргэд

БАРИМТ-2: МҮЭХ-Г С.ГАНБААТАР ӨӨРИЙНХӨӨ НЭР ДЭЭР БҮРТГҮҮЛЖ, АВТО БААЗЫН ГАЗРЫГ НЬ ЗАРЖЭЭ

        С.Ганбаатар МҮЭХ-ны газраас завшсан байж болзошгүй хэрэгт холбогдон шалгагдаж байгаа. Тодруулбал, тэрбээр МҮЭХ-ны газрыг “МДТОФ” ХХК-д хууль бусаар шилжүүлж, их хэмжээний авлига авсан байж болзошгүй гэх мэдээлэл түүнийг олон жил сүүдэр шиг нь дагаж байгаа. Үүнийг нь ч хууль хяналтын байгууллагаас шалгаж, сэжүүр олжээ. МҮЭХ-нд Сүхбаатар дүүргийн I хорооны нутаг, Замын цагдаагийн газрын зүүн талд байрлалтай 13.5 га газар бүртгэлтэй байдаг байлаа. Гэтэл С.Ганбаатар “МДТОФ” ХХК-ийн Ерөнхий захирал асан Ц.Энхцогттой “Хөрөнгө оруулалт, барилгын ажлын гүйцэтгэлийн гэрээ” гэгчийг байгуулж, МҮЭХ-ны харьяа Тээвэр үйлчилгээний төвийн 13.5 га талбай бүхий газрыг шилжүүлээд өгчихсөн. Ингэхдээ МҮЭХ-ны дэд ерөнхийлөгч асан Х.Амгаланбаатараар төлөөлүүлэн гарын үсэг зуруулсан байдаг юм билээ. Үнэн хэрэгтээ, С.Ганбаатарын даалгавраар Х.Амгаланбаатар МҮЭХ-ны газрыг зарсан гэсэн үг.

“МДТОФ” ХХК-тай гэрээ байгуулах ажлыг Л.Цогбадрах гэгч гардан зохион байгуулжээ. Л.Цогбадрах нь 2007-2014 онд МҮЭХ-д Ерөнхий зөвлөлийн гишүүнээр ажиллаж байжээ. Тэрбээр УИХ-ын гишүүн С.Ганбаатартай “халаас” нэгтэй ч байж болзошгүй баримт бий гэнэ. Тэд МҮЭХ-ноос хамт ажиллаж, ойр дотны хүрээллийнхэн болжээ. Тодруулбал, Л.Цогбадрахын хүү Ууганбаяр нь С.Ганбаатарын эхнэр Б.Тунгалагтай “Дархан ургах наран зүг” ХХК-ийг хамтран эзэмшдэг ажээ. Уг компани нь 2010 онд ашгийн төлөө байгуулагджээ. Хамгийн хоржоонтой нь, С.Ганбаатарын эхнэр Б.Тунгалаг нь Л.Цогбадрахын эзэмшлийн “Ус био инженеринг” ХХК-д байгаль орчны инженерээр ажилладаг гэх бүртгэлтэй бөгөөд таван жилийн өмнөөс нийгмийн даатгал төлж байгаа гэнэ.

БАРИМТ-3: С.ГАНБААТАРЫН “ЗАРСАН” ГАЗАРТ “UNION BUILDING” БАРИЛГА СҮНДЭРЛЭЖ, ЭХНЭР Б.ТУНГАЛАГ НЬ ТУС БАРИЛГАД КОМПАНИЙНХАА ҮЙЛ АЖИЛЛАГААГ ЯВУУЛЖ БАЙЖЭЭ

Хотын А бүсэд байрлалтай, МҮЭХ-ны газрыг зарсныхаа хариуд “Үйлдвэрчин” орон сууцны хороолол, зочид буудал барьж өгсөн түүхтэй. Тодруулбал, үүний нэг нь “Union building” барилга. Энэ барилгад МҮЭХ эзэн суусан гэхээс илүүтэй С.Ганбаатар болон түүний эхнэр Б.Тунгалаг нар эзэн сууж байсан. Уг барилгыг ашиглалтад орсны дараа С.Ганбаатарын эхнэр Б.Тунгалагийн нэр дээр бүртгэлтэй байдаг “Адвант трейд” ХХК үйл ажиллагаа явуулж байсан нь баримттайгаа бий. Өөрөөр хэлбэл, газрын наймаанд нэр холбогдсон даруйдаа С.Ганбаатар эхнэрийнхээ компанийг МҮЭХ-ны эзэмшлийн байгууламжаас шилжүүлсэн ч үйл ажиллагаа явуулж байсан баримт нь үлджээ. С.Ганбаатар хөрөнгө орлогын мэдүүлэгтээ гутлаа чирсэн “гуйлгачин” мэт харагдаж, хоёрхон компанитай, компаниуд нь цагаан цаас шиг харагддаг ч эхнэр Б.Тунгалагынхаа нэр дээр 20 гаруй ХХК, ТББ нээчихээд, төрийн тендер, төсөл хөтөлбөрөөс ингэж хөлжиж суудаг нэгэнт тодорхой болжээ.

Тодруулбал, “Union building” барилгын А блокын гурван давхрын 304 тоотын 100 гаруй мкв талбайг С.Ганбаатарын эхнэр Б.Тунгалаг түрээсэлж, компанийнхаа үйл ажиллагааг явуулж байсан ч нэг ч төгрөгийн түрээс төлдөггүй байжээ.

    Эцэст нь, УИХ-ын гишүүн С.Ганбаатар хөрөнгө орлогоо нуун дарагдуулсан, эхнэрийнхээ нэр дээрх компани, аж ахуйн нэгжийг хуулийн дагуу мэдүүлээгүй ноцтой зөрчил хууль хяналтын байгууллагад шалгагдаж байна. Үүнээс гадна, “Альфа” зочид буудлын захирал Н.Энхманлайгаар дамжуулан МҮЭХ-ны эзэмшлийн зочид буудлаас орлого олж, хувийн эзэмшлийн аж ахуй нэгжүүүдээрээ дамжуулан татвараас зайлсхийж, мөнгө угааж, хувьдаа завшсан байж болзошгүй ноцтой хэргийн сэжүүрийг хууль хяналтынхан атгаад авчээ.

Үргэлжлэл бий.