ТАНИЛЦ: ТӨРИЙН ӨМЧИТ КОМПАНИУДЫН ТЭРБУМ ДАВСАН ОРЛОГОТОЙ ЗАХИРЛУУД

2025-08-07, 659

Өчигдөр ТӨБЗГ-ын дарга Б.Цэнгэл “Төрийн өмчийн компанийн захирлууд 20-30 сая төгрөгийн цалин авч байна” гэх мэдээлэл хийж, хариуд нь Ерөнхий сайд Г.Занданшатар “Төрийн өмчит компаниудын захирлуудын цалинг бууруулна” гэж мэдэгдсэн.

Төрийн өмчит компанийн захирлуудын сарын цалин буюу 30 сая төгрөг өнөөгийн нийгэмд хэр их мөнгө вэ гэдгийг маш энгийн жишээгээр тайлбарлъя. Манайхны нийтлэг хэрэглээ буюу 2015 онд үйлдвэрлэгдсэн, 2025 онд орж ирсэн Toyota Prius 30 автомашин одоо 30 сая төгрөгийн үнэтэй байна. Энэ автомашиныг ихэнх монголчууд 3-4 сая төгрөгийн урьдчилгаатай, 2.5 хувийн хүүтэй, 2-3 жилийн хугацаатай лизингээр арай гэж өөрийн болгодог. Харин төрийн өмчийн компанийн захирал бол энэ автомашиныг ердөө ганцхан сарын цалингаараа л шууд худалдаад авах боломжтой гэсэн үг.

Иймд жилд хамгийн их орлоготой захирлуудыг жагсааж үзлээ. Хувьдаа компанитай буюу цалингаас гадуур орлоготой захирлуудаас 1.4 тэрбум төгрөгийн орлогоороо “Барилгын хөгжлийн төв” ТӨҮГ-ын захирал Т.Пүрэвхатан тэргүүлж буй бол, хувьдаа нэг ч компанигүй буюу зөвхөн цалингийн орлогоороо “Эрдэнэт үйлдвэр” ТӨХК-ийн Ерөнхий захирал Г.Ёндон тэргүүлж байна.

“Барилгын хөгжлийн төв” ТӨҮГ-ын гүйцэтгэх захирал Төрмөнхийн Пүрэвхатан

Түүний жилийн орлого 1.4 тэрбум төгрөг. Төрийн өмчийн компанийн захирлуудыг зөвхөн орлогоороо тэргүүлээд зогсохгүй, 5.7 тэрбум төгрөгийн гурван орон сууц, 480 сая төгрөгийн Lexus 570, Lexus RX 350 загварын хоёр жийп зэргээрээ ч тэргүүлж байна. Түүний цалингаас гадуурх орлогын хувьд, өмгөөллийн “Партнерс консалтинг” фирмийн 50 хувь, “Девелопмент роуд ложистик” ХХК-ийн 15 хувийг эзэмшдэг. Түүний хувьд, 2020, 2024 оны УИХ-ын сонгуульд АН-аас нэр дэвшээд угсраа унасан. Улмаар АН-ынхан нь түүнийг гудамжинд үлдээхгүйн тулд “Барилгын хөгжлийн төв” ТӨҮГ-ын захирлаар томилсон байдаг.

“Эрчим хүчний үндэсний төв” ТӨХК-ийн гүйцэтгэх захирал Дашийн Бямбасүрэн

Түүний жилийн орлого 1.1 тэрбум төгрөг. Түүнээс гадна 4.7 тэрбум төгрөгийн гурван орон сууц, 2.3 тэрбум төгрөгийн хадгаламж, 1.7 тэрбум төгрөгийн авлагатай зэргээрээ төрийн өмчит компанийн захирлууддаа зиндаархдаг. Хувьдаа “Тэнгэр апат” ХХК, “Та финанс” ББСБ, “Ойн хөндий” ХХК, “Тайгын хөндий” ХХК-тай. Эрчим хүчний сайд Б.Чойжилсүрэнгийн 10 жилийн ангийн найз бөгөөд түүний татаасаар “Эрчим хүчний үндэсний төв” ТӨХК-ийн гүйцэтгэх захирлаар томилогдсон байдаг.

“Эрдэнэт үйлдвэр” ТӨХК-ийн Ерөнхий захирал Гэлэнгийн Ёндон

Нэр дээрээ нэг ч бизнесгүй, нядлаад зарах ч малгүй атлаа хамгийн их орлого олдог төрийн өмчит компанийн захирлаар Г.Ёндон тодров. Түүний жилийн орлого 620 сая төгрөг. Хувьдаа бизнесгүй учраас энэ 620 сая төгрөг нь зөвхөн цалингийнх буюу сард 51.6 сая төгрөгийн цалин авдаг гэсэн үг. Тэр “Эрдэнэт үйлдвэр” ТӨХК-ийн Ерөнхий захирал болохоосоо өмнө жилд 31 сая төгрөгийн орлоготой байсныг дурдах нь зүйтэй болов уу.

“УБТЗ” ХНН-ийн дарга Хишигжаргалын Хэрлэн

Түүний жилийн орлого 610 сая төгрөг. Сард 50.8 сая төгрөг олдог гэсэн үг. Мөн тэрбээр 792 сая төгрөгийн хоёр орон сууц, 650 сая төгрөгийн Mercedes Benz G500, 1.7 тэрбум төгрөгийн хадгаламж зэргээрээ төрийн өмчит компанийн захирлуудыг толгойлдог. Хувьдаа “Эйч Ти Эм” ХХК, “Герман цонх” ХХК-иудыг эзэмшдэг гэх боловч ямар үйл ажиллагаа явуулдаг нь тодорхой бус.

Төрийн банкны гүйцэтгэх захирал Өлзийгийн Гантөр

Түүний жилийн орлого 493 сая төгрөг. Тэгэхээр сард 41 сая төгрөг олдог гэсэн үг. Тэр хувьдаа компанигүй, харин “Тэтгэврийн ууган сан” ХХК-ийн 1 хувь, “Мандал ассет менежмент” ХХК-ийн 0.02 хувийн хувьцааг эзэмшдэг.

“Монголын төмөр зам” ТӨХК-ийн гүйцэтгэх захирал Отгоны Батчулуун

Түүний жилийн орлого 408 сая төгрөг. Хувьдаа “МТС” ХХК, “Чаргайт” ХХК гэх хоёр компанитай.

“Эрчим хүчний эдийн засгийн хүрээлэн” ТӨҮГ-ын захирал Махбалын Түмэнжаргал

Түүний жилийн орлого 383 сая төгрөг. Нэр дээрээ компанигүй. Сард 31.9 сая төгрөг олдог гэсэн үг.

“Эрдэнэс тавантолгой” ХК-ийн гүйцэтгэх захирал Хүүгийн Мөнхжаргал

Түүний жилийн орлого 343 сая төгрөг. Хувьдаа компанигүй. Тэгэхээр энэ 343 сая төгрөг нь зөвхөн цалингийн орлого буюу сард 28.5 сая төгрөг авдаг гэсэн үг. “Эрдэнэс тавантолгой”-н өмнөх гүйцэтгэх захирал Б.Ганхуяг сард 28 сая төгрөгийн цалинтай гэгддэг байсан. Ямартай ч Х.Мөнхжаргал өмнөх гүйцэтгэх захирал Б.Ганхуягтайгаа адилхан цалин авч буй ажээ.

“Диспетчерийн үндэсний төв” ТӨХК-ийн гүйцэтгэх захирал Гомборагчаагийн Балжинням

Түүний жилийн орлого 289 сая төгрөг. Хувьдаа компанигүй. Тэгэхээр сард 24 сая төгрөг авдаг болж таарч байна.

“Монгол шуудан” ТӨХК-ийн гүйцэтгэх захирал Гэрэлтийн Тэлмэн

Түүний жилийн орлого 252 сая төгрөг. Хувьдаа компанигүй. Тэгэхээр сард 21 сая төгрөг авдаг болж таарч байна.

ТАНИЛЦ: ТӨРИЙН ӨМЧИТ КОМПАНИУДЫН ТЭРБУМ ДАВСАН ОРЛОГОТОЙ ЗАХИРЛУУД

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.