МОНГОЛЫН ЦАГДАА НАР  ХАР ТАМХИ ХИЛЭЭР ОРУУЛЖ ИРДЭГ ГЭМТ ХЭРГИЙН БҮЛЭГЛЭЛИЙГ ИЛРҮҮЛЖ ЧАДАХ УУ

     “Томчуудын хүүхдүүд хар тамхи хэрэглэсэн, хэрэглээгүй, тэдэнд ял өгнө, өгөхгүй “ гэж цахимаар нэг шуугиж байна. Харин хэрэгт холбогдсон хүмүүсийн цаана хэн байсан, хэнээс, яаж хар тамхи худалдаж авсан, хэн нь хэрэглэсэн гэдгийг тогтоох ажиллагаа үргэлжилж байгаа. Хэрвээ тэднийг хэнээс хар тамхи авсан бэ гэдгийг илрүүлж чадах юм бол хар тамхины хамгийн том сүлжээ задарч болно. Ингэж л үр үндсээр нь шалгаж, илрүүлж, улс дамнасан маш ноцтой гэмт хэргийн бүлэглэлийг таслан зогсоож чадахгүй юм бол Монголд хар тамхи хэрэглэгчид гаарсаар байна. Хар тамхи хэрэглэгчдэд оногдуулах ялыг чангатгаад ч хүссэн үр дүнд хүрч чадахгүй. Хар тамхинд донтогсод, хар тамхиар баяжигсад өдөр өдрөөр нэмэгдсээр байна. Хамгийн гол нь, сүүлийн үед хар тамхийг хилээр яаж оруулж ирж байна вэ, ямар аргаар зарж, хэчнээн тэрбум төгрөгийг хэрхэн эргэлдүүлж байна вэ гэдгийг бүрэн утгаар нь илрүүлж, таслан зогсоох ажил юу юунаас илүүтэй чухал болоод байна. Энэ ажлын үр дүнг бид цагдаа нараас хүлээх болчихоод байна. Мэдээж хэрэглэсэн гэгдэх хүмүүсээс хар тамхины сорил авч, хэрэглэсэн нь тогтоогдох юм бол тохирох ял оногдуулах нь ойлгомжтой. Өмнө нь олны танил хүмүүс хар тамхи хэрэглээд ял авч байсан. Гарч ирээд дахиад л хэрэглэж байгаад баригдсан жишээ олон. Тэд бол олон нийтэд ил болсон цөөн жишээний нэг. Харин бидний мэдэхгүй хэчнээн хүн ял авч, ялаа дуусчихаад дахин хэрэглэж, дамлан зарж байгааг таашгүй. Тэгэхээр хар тамхи дамлан зардаг гэмт хэргийн толгойг нь олж, илрүүлэх нь ЦЕГ, Хар тамхитай тэмцэх газрынхны нэн тэргүүний ажил болчихоод байгааг сүүлд гарсан хэргийн жишээ бүрэн харууллаа. 

ХАР ТАМХИ, МАНСУУРУУЛАХ БОДИСТОЙ ХОЛБООТОЙ ГЭМТ ЭТГЭЭДЭД ХҮЛЭЭЛГЭХ ЯЛ ШИЙТГЭЛИЙН БОДЛОГЫГ ЧАНГАТГАНА

       Мансууруулах эм, сэтгэцэд нөлөөт бодисын наймаа нь НҮБ-ын Үндэстэн дамнасан зохион байгуулалттай гэмт хэргийн эсрэг конвенцод заасанчлан үндэстэн дамнасан, нарийн зохион байгуулалттай, нууц, далд аргаар үйлдэгддэг гэмт хэрэг юм. Энэ төрлийн гэмт хэрэг үйлдэх арга, зохион байгуулалт боловсронгуй болж, манай улсын үндэсний аюулгүй байдалд аюул занал учруулах шинжтэй болж байна. Хар тамхи, мансууруулах болон сэтгэцэд нөлөөлөх бодистой тэмцэх арга хэмжээний талаар Засгийн газрын өнөөдрийн хуралдаанаар хэлэлцээд дараах шийдвэрийг гаргалаа. Үүнд:

-Хар тамхи, мансууруулах эм, сэтгэцэд нөлөөт бодисын хууль бус эргэлттэй тэмцэх төрийн байгууллагуудын үйл ажиллагааны уялдаа холбоо, нэгдмэл байдлыг хангаж, мансууруулах эм, сэтгэцэд нөлөөт бодистой холбоотой гэмт хэрэг, зөрчлөөс урьдчилан сэргийлэх, олон нийт, ялангуяа хүүхэд, залуучуудад мансууруулах эм, сэтгэцэд нөлөөт бодисын хор хөнөөлийн талаар таниулах эрх зүйн орчныг боловсронгуй болгох зорилгоор УИХ-аас 2002 онд баталсан Мансууруулах эм, сэтгэцэд нөлөөт бодисын эргэлтэд хяналт тавих тухай хуулийн шинэчилсэн найруулгын төслийг шуурхай эцэслэн боловсруулж, энэ оны наймдугаар сард багтаан танилцуулахыг Хууль зүй, дотоод хэргийн сайд Л.Мөнхбаатар, Монгол Улсын сайд, Засгийн газрын Хэрэг эрхлэх газрын дарга С.Бямбацогт нарт тус тус даалгав. Энэ ажлын хүрээнд мансууруулах эм, сэтгэцэд нөлөөт бодисын хууль бус эргэлттэй холбоотой гэмт хэргийн шалтгаан, нөхцөл, гэмт хэрэг үйлдэгдсэн байдлыг судлан үзэж, гэмт этгээдэд хүлээлгэх хариуцлагыг мансууруулах эм, сэтгэцэд нөлөөт бодисын хэмжээ, үйлчлэл болон бусад обьектив талыг харгалзан ялгамжтай тогтоож, ял шийтгэлийн бодлогыг чангатгана.

-Монгол Улсын хилээр хар тамхи, мансууруулах болон сэтгэцэд нөлөөлөх бодисыг хууль бусаар нэвтрүүлэхийг таслан зогсоох, хязгаарлах зорилгоор Бүгд Найрамдах Турк, Бүгд Найрамдах Солонгос Улс, Америкийн Нэгдсэн Улс, Оросын Холбооны Улс, Тайланд, Вьетнам Улс болон олон улсын байгууллагатай хамтран ажиллах;

-Цагдаагийн ерөнхий газрын Хар тамхитай тэмцэх газрыг бие даасан, хараат бус байгууллага болгон бэхжүүлэх асуудлыг судалж, саналаа ирэх сард багтаан Засгийн газарт танилцуулах;

-Мансуурах донтой иргэдийг эмчлэх, сэтгэлзүйн тусламж үйлчилгээ үзүүлэх, нийгэмшүүлэх төвийг Эрүүл мэндийн яамны харьяанд байгуулах асуудлыг судалж Засгийн газарт танилцуулах, Монгол Улсад хориглосон, хязгаарласан, хяналтад байх шаардлагатай мансууруулах эм, сэтгэцэд нөлөөт эмийн жагсаалтыг шинэчлэн батлах;

-Мансууруулах эм, сэтгэцэд нөлөөт бодисын хэрэглээний тархалтын тандалт, судалгаа хийж, бүх шатны боловсролын байгууллагын сургалтын хөтөлбөрт урьдчилан сэргийлэх нөлөөллийн ажлыг зохион байгуулахыг Засгийн газрын холбогдох гишүүдэд даалгалаа.

Мөн хүүхэд, залуучуудын чөлөөт цагийг зөв өнгөрүүлэх чиглэлээр соёл, спортын үйл ажиллагааг тогтмол зохион байгуулах Соёл, спорт, аялал жуулчлал, залуучуудын сайд, аймаг, нийслэлийн Засаг дарга нарт, манай улсад ургадаг мансууруулах эм, сэтгэцэд нөлөөт ургамлын тархцыг хумих ажлыг эрчимжүүлж, бүрэн устгах арга хэмжээ авахыг Цагдаагийн ерөнхий газарт үүрэг болгов.

ЦАГДАА НАР ХАР ТАМХИТАЙ ТЭМЦЭХ АЖЛАА ХИЙЖ ЭХЛЭВ ҮҮ

        Ерөнхий сайдын өгсөн үүрэг чиглэлийн хүрээнд хар тамхитай тэмцэх бие даасан агент байгуулах асуудлыг холбогдох газруудтай хамтран тооцоо судалгаа, олон улсын жишиг, хамтын ажиллагааны хүрээнд судалж үзээд үйл ажиллагааг эхлүүлэх хэрэгтэй. Наймдугаар сард багтааж дээрх ажлыг Засгийн газарт танилцуулж тодорхой шийдвэр гаргуулна. Бие даасан агент байгуулахад тодорхой хугацаа хэрэгтэй. Хууль гарч байж агент байгуулах ажил яригдана. Тэр болтол Хар тамхитай тэмцэх газрыг өргөжүүлж ажиллах ёстой гэдгийг ХЗДХ-ийн сайд Л.Мөнхбаатар мэдэгдсэн. Харин Монголын цагдаа, хууль хяналтынхан хар тамхины эсрэг хэрхэн тэмцэж, яаж ажиллахыг ард түмэн харах, хүлээх үлдлээ.