Монголын залуус дөрвөн өдөр наадаж, наргилаа. Харамсалтай нь, “Playtime” фестивалд оролцож, уран бүтээлээ хүргэсэн нэр бүхий хамтлагийн гишүүн хар тамхи хэрэглэсэн байж болзошгүй бараан мэдээ өнгөрсөн өдрүүдэд түгэх боллоо.

Тодруулбал, ЦЕГ-ын Хар тамхитай тэмцэх хэлтсийн албан хаагчид дөрвөн хүнээс шинжилгээ авчээ. Шинжилгээнд хамрагдсан нэг хүний хариу эерэг гарсан байна. Одоогийн байдлаар тухай хүн нь ямар төрлийн бодис хэрэглэсэн эсэх нь тодорхойгүй байна. Урьдчилсан байдлаар мансууруулах төрлийн бодис хэрэглэсэн нь тогтоогдсон тул нарийн шинжилгээнд хамруулжээ. Шинжилгээний эцсийн хариу 14-21 хоногийн дараа гарах ажээ.

“MXRNINGSTAR” ХАМТЛАГИЙН ГИШҮҮДЭЭС ХАР ТАМХИНЫ ШИНЖИЛГЭЭ АВЧЭЭ

     Хар тамхи хэрэглэсэн байж болзошгүй үндэслэлээр шалгагдаж байгаа этгээд нь “Mxrningstar” гишүүн гэнэ. Тухайн хамтлагийн гишүүдээс шинжилгээ авах нь нэг нь бүдэрсэн бололтой. Энэ талаар эх сурвалжийн бидэнд өгсөн мэдээллээр “Mxrningstar” хамтлагийн гишүүний шинжилгээний хариу эерэг гарсан гэнэ. Тэд өнгөрсөн зургадугаар сард Төв цэнгэлдэхэд тоглолтоо хийж, залуучуудыг байлдан дагуулсан. Гэвч харамсалтай нь, ийм зүйлд холбогдчихлоо. Хамтлагийн бусад гишүүдийн хувьд ч нэр хүндэд нь халтай зүйл боллоо. Хар тамхитай тэмцэх хэлтсийнхэн иргэний дуудлага, мэдээллийн мөрөөр шалгалтын ажиллагаа явуулсан юм билээ. Ингээд мансуураад удаагүй байхад нь барьсан байж болзошгүй. Ямартай ч “Mxrningstar” хамтлагийг уран бүтээлээ хүргэснээс хойш болсон зүйл. Гэнэтхэн нь цагдаагийн тусгай багийнхан уран бүтээлчдийн асар руу ороод ирсэн. Ингээд дөрвөн хүнийг аваад явчихсан” гэсэн юм.

ЦЕГ: PLAYTIME ФЕСТИВАЛД ОРОЛЦСОН НЭГ ХҮНИЙ ШИНЖИЛГЭЭНИЙ ХАРИУ ЭЕРЭГ ГАРСАН

Харин энэ талаар ЦЕГ-ын Хэвлэл мэдээллийн төвөөс тодруулахад “Дөрвөн хүнээс хар тамхины шинжилгээ авсан нь үнэн. Харамсалтай нь, нэг хүнийх нь шинжилгээний хариу эерэг гарсан. Мөрдөн шалгах ажиллагаа явагдаж байна. Хувь хүний нууцын асуудалтай холбоотой учраас тухайн хүнийг хэн болох, ямар ажил эрхэлдэг, хамтлагийн дуучин эсэхийг хэлэх боломжгүй” гэлээ.

 “MXRNINGSTAR” ХАМТЛАГИЙН ГОЦЛОЛ ДУУЧИН Б.АЗЗАЯА ХАР ТАМХИНЫ ХЭРГЭЭР ЯЛ ЭДЭЛЖ БАЙЖЭЭ

   "Morningstar" хамтлагийн гоцлол дуучин Б.Аззаяад хар тамхины хэргээр 2024 оны нэгдүгээр сард нэг жилийн хорих ял сонсож байсан. Залуу уран бүтээлч Б.Аззаяаг сэтгэцэд нөлөөлөх бодисыг хууль бусаар худалдаалах зорилгогүйгээр хадгалах гэмт хэргийг бүлэглэж үйлдсэн гэм буруутайд тооцож, нэг жилийн хугацаагаар хорих ял оноосон байдаг. Тэрбээр давж заалдах шатны шүүхэд хандаж, ялыг хэвээр үлдээсэн юм. Харамсалтай нь, хууль хяналтын байгууллагаас ногдуулсан ялын хугацаа дөнгөж дуусаад байхад хамтлагийнх нь гишүүн хар тамхины хэрэгт холбогдлоо.

“MXRNINGSTAR” ХАМТЛАГТ ХЭН ХЭН БАЙДАГ ВЭ

Б.Аззаяа өмнө нь "Morningstar" нэрээр соло карьераар олонд танигдсан. Харин гурван жилийн өмнөөс "Mxrningstar" хэмээх амьд хөгжмийн хамтлаг байгуулж, эхний цомгоо олон нийтэд хүргээд байгаа юм.

Тус хамтлагт бөмбөрчин Н.Эрдэнэбаяр, басс гитарчин Г.Эрдэнэбаяр, соло гитарчин З.Оюунболд, даралтат хөгжимчин Н.Эрдэнэсайхан нар хамрагддаг билээ.