Улсын харцага Г.Ганхуяг ЗГХЭГ-ын дарга Н.Учрал, доктор Н.Тэгшбаяр нарын аминд заналхийлсэн утга бүхий постыг өөрийн цахим хаягтаа оруулсан байдаг. Тодруулбал, тэрбээр “Үхэлтэй нүүр тулаад олны хандиваар арай гэж амьд үлдсэн хүмүүс сүнсээ худалдчихаад ирсэн байдгийг Н.Учрал, Н.Тэгшбаяр хоёрын жишээн дээр нүдээрээ харлаа. Хэнд ч хэрэггүй нууц төлөвлөгөө боловсруулж байгаад эх орноо зарсан, эх орноосоо урвасан, уран сурталчилсан, ураны хуулийг батлалцсан хэдэн мөнгөний боолуудыг амжиж хороочихоод бахархалтайгаар инээж үхнэ. Хэн үхэх ялтай вэ" гэх пост оруулсан юм. Ингээд төд удалгүй устгасан ч түүнийг хууль хяналтын байгууллагаас шалгаж эхэлсэн билээ. Мөн ТЕГ, ЦЕГ-аас Г.Ганхуягийг хойшлуулшгүйгээр баривчилж, цагдан хорьсон. Түнийг төрийн өндөр албан тушаалтны биед халдахыг завдсан, заналхийлсэн гэх үндэслэлээр хойшлуулшгүйгээр цагдан хорьсон юм.

Тэгвэл 50 гаруй хоног цагдан хоригдсон улсын харцага Г.Ганхуягийг суллажээ. Тэрбээр цахим хуудсаараа дамжуулан хандив хүсэж, хүүгээ тэмцээнд явуулахаар болсон гэдгээ мэдэгдсэн байна. Мөн цагдан хоригдож, үүнийнхээ дараа эмнэлэгт хэвтсэн учир санхүүгийн хямралд орсон гэжээ. Түүний хүү Г.Галт-Эрдэнэ чөлөөт бөхөөр Ази тивийн аварга шалгаруулах тэмцээнд оролцож, дараа нь ДАШТ-нд зодоглох ажээ.