Түгжрэлийн сайд асан Ж.Сүхбаатарын татаасаар нийслэлд “шургасан” Ч.Батзориг анх удаа НИТХ-ын төлөөлөгчөөр сонгогдоод байгаа. Хотын дарга асан Д.Сумъяабазар 2022 оны нэгдүгээр сарын 1-нд “Улаанбаатар хотын Авто замын түгжрэл бууруулах нэгдсэн төсөл хэрэгжүүлэх нэгж” гээчийг байгуулж, захирлаар нь Ч.Батзоригийг томилсон байдаг. Үнэндээ, Ч.Батзориг Түгжрэлийн сайд асан Ж.Сүхбаатарыг “Улаанбаатар эрдэм” дээд сургуульд эрх зүйн багш байхад гарын шавь нь байсан учраас ийм томилгоо “амархан” хийсэн гэсэн үг.

   Ч.Батзориг компанигүй, бизнесгүй, гэр бүлийнх нь гишүүд ажилгүй, орлогогүй гэж АТГ-т мэдүүлсэн байдаг. Гэсэн ч өөрийнх нь жилийн орлого 69 сая төгрөг, 1.5 тэрбум төгрөгөөр үнэлэгдэх хоёр орон сууцтай, 319 сая төгрөгийн автомашинтай, хоёр газартай, 80 сая төгрөгийн хадгаламжтай, үнэт эдлэлтэй гэжээ.

Сонирхолтой нь, Ч.Батзоригийг Хотын даргын зөвлөх, Түгжрэл бууруулах төслийн нэгжийн захирлаар ажиллаж байхад нь төрсөн дүү Ч.Мөнхбатынх нь эхнэр Г.Жаргалын “Эм Ти Юу” ХХК компани 8.3 тэрбум төгрөгийн тендерт ялж байжээ.

   Тодруулбал, 2023 оны гуравдугаар сард Нийслэлийн худалдан авах ажиллагааны газраас Улаанбаатар хотын түгжрэлийг бууруулах хүрээнд “Их багтаамжийн зогсоол шинээр барих” нэртэй 8.3 тэрбум төгрөгийн тендер зарласан. Уг тендерт Ч.Батзоригийн бэр дүү Г.Жаргалын “Эм Ти Юу” ХХК ганцаараа оролцож, шалгарчээ. Ингээд 2023 оны дөрөвдүгээр сарын 28-нд НЗДТГ, “Эм Ти Юу” ХХК-тай гэрээ байгуулсан. Гэрээнд долдугаар сарын 1-нд их багтаамжтай зогсоол барих ажлаа эхлүүлж, 2024 оны аравдугаар сарын 21-нд ашиглалтад оруулахаар заасан байдаг ч өнөөдрийг хүртэл өнөөх зогсоол ашиглалтад ороогүй байна.

      Угтаа, 2022 онд “Улаанбаатар хотын Авто замын түгжрэл бууруулах нэгдсэн төсөл хэрэгжүүлэх нэгж”-ээс дээрх тендерийг хоёр ч удаа зарласан. Энэ тендер Ч.Батзоригийн мэдлийнх байсан гэсэн үг. Гэвч Ч.Батзориг хоёр ч удаа тендер зарлаж, бэр дүүгийнхээ компанийг хассан болж харагдуулаад, хүчингүй болсон тендерээ Нийслэлийн худалдан авах ажиллагааны газар руу шилжүүлсэн. Ингэхдээ бэр дүүгийнхээ компанийг шалгаруулах “тохироотой” байсан байж таарна. Учир нь, өөрийнх нь удирдаж байгаа нэгжийн тендерт бэр дүүгийнх нь компани шалгарвал асуудал үүснэ гэж тооцоолсон гэсэн үг л дээ.

Энэ нь ганц удаагийнх биш юм. Тодруулбал, Ч.Батзоригийг нэгжийн даргаар ажиллаж байх үед буюу 2022 онд бэр дүүгийнх нь “Эм Ти Юу” ХХК нийслэлийн гурван ч тендерт шалгарчээ. Үүнд,

-Нийслэлийн нутгийн захиргааны байгууллагуудын төрийн албан хаагчдын орон сууцны инженерийн дэд бүтцийн ажлын зураг төсөл, барилга угсралтын ажил- 1.8 тэрбум,

-Маршал таун хотхоноос Гэрлүг хотхон хүртэлх авто зам (Улаанбаатар хот, Хан-Уул дүүрэг)- 552 сая,

-Нарны замаас 31 дүгээр сургуулийн зүүн талаар шинэ төгөл хотхон хүртэлх зам (Улаанбаатар хот, Сүхбаатар дүүрэг, 2 дугаар хороо)- 560 сая төгрөгийн тендерт “Эм Ти Юу” ХХК тус тус шалгарсан нь санамсаргүй тохиолдол гэхэд итгэх хүн олдохгүй л болов уу.

Ноцтой нь, бэр нь авсан тендерийнхээ ажлыг гүйцэтгэж амжаагүй байхад нь Ч.Батзориг ажлаа өгч, өдгөө НИТХ-ын төлөөлөгчөөр ажиллаж байна.