МҮЭ-ийн холбооны харьяа Монголын эрчим хүч, геологи, уул уурхайн Үйлдвэрчний эвлэлийн холбооны удирдалгаар ажиллаж байсан Х.Буянжаргал, Д.Долгор нарын 11 хүнийг хууль хяналтын байгууллагаас шалгаж эхэлсэн билээ. Тодруулбал, тус холбооны удирдлагууд цалингийн зээл нэрээр татвар төлөгчдийн хөрөнгөнөөс 260 гаруй сая төгрөг залилж, хувьдаа завшсан нь баримтаар ил болсон байдаг. Тухайлбал, МҮЭХ-ны Ерөнхий нарийн бичгийн дарга асан Х.Буянжаргал 197 сая,  Д.Долгор 14 сая,  МҮЭХ-ны дэд ерөнхийлөгч Б.Рагчаа хоёр сая, Монголын Эрчим хүч, Геологи, уул уурхайн ҮЭ-ийн холбооны хуулийн мэргэжилтэн А.Дагвадорж 37.6 сая, нарийн бичгийн дарга О.Баярхүү 57 сая, нягтлан Н.Ариунболд 11.9 сая, ажилтан Б.Ариунбаатар 30 сая, Хөвсгөл аймгийн ҮЭ-ийн холбооны дарга Ц.Ганболд зээл нэрээр 17.8 сая төгрөгийг эргэн төлөгдөх нөхцөлгүйгээр цалингийн зээл нэрээр авсан байдаг. Мөн үүнээс гадна, холбооны хөрөнгө болох автомашиныг бүлэглэн хувьдаа завшсан байж болзошгүй. Санхүүгийн баримтгүйгээр холбооны данснаас их хэмжээний мөнгө гаргасан нь хууль хяналтын байгууллагын шалгалтаар тогтоогдсон юм.

Хамгийн ноцтой нь, Х.Буянжаргал, Д.Долгор нар МҮЭХ-ны хөрөнгөөр баригдсан “Үйлдвэрчин” хотхоноос дөрвөн орон сууц хувьдаа авсан болзошгүй баримт байгаа юм. Мөн холбооны удирдлагуудад хахууль өгдөг, холбооны хөрөнгөнөөс ах, дүү амраг садан, танил, өөрийн хамаарал бүхий этгээдүүддээ орон сууцны дэмжлэг болгож, 5-10 сая төгрөг хууль бусаар өгсөн байж болзошгүй зэрэг баримт нь хууль хяналтын байгууллагад шалгагдаж байсан юм.

    Х.Буянжаргал, Д.Долгор нарын 11 хүнийг яллагдагчаар татан шалгаж, бүлэг этгээдэд хилийн хориг тавьж, хоорондоо уулзахгүй байх саналыг нийслэлийн прокуророос Дүүргийн Эрүү, Иргэний хэргийн хялбар ажиллагааны анхан шатны тойргийн шүүхэд гаргасан юм. Тэгвэл дээрх нэр дурдагдсан этгээдүүдэд холбогдох хэргийг шүүхэд шилжүүлжээ.