Хотын дарга Хан-Уул дүүргийнхэнтэй нягт хоршиж байгаагийн нэг илрэл А.Амартүвшин. Хотын орлогчоороо Хан-Уул дүүргийн Засаг даргын орлогч байсан А.Амартүвшинг сонгож, баруун гараа болгосон. А.Амартүвшингийн тухайд Д.Дэмбэрэлийн үед буюу 2008 онд УИХ-ын Тамгын газрын Захиргааны хэлтсийн зохион байгуулагчаар ажиллаж байсан түүхтэй.

     А.Амартүвшингийн аав Цэвэгмидийн Амгаланбаяр нь Бригадын генерал цолтой, МАН-ын дарга асан М.Энхболдын үй зайгүй найз. Тодруулбал,  Ц.Амгаланбаяр М.Энхболдыг Хотын дарга байх хугацаанд буюу 2000-2006 онд  Замын цагдаагийн газрын даргаар ажилласан. Улмаар 2007 оны арванхоёрдугаар сард М.Энхболд Шадар сайд бөгөөд Улсын онцгой комиссын дарга болсноос хэдхэн хоногийн дараа ОБЕГ-ын даргаар Ц.Амгаланбаярыг томилж байв. ОБЕГ нь Шадар сайдын харьяанд байдгийг тайлбарлах хэрэггүй мэдэх байх. Ингээд 2012 онд М.Энхболд Шадар сайдаас бууж, Ц.Амгаланбаяр ч ОБЕГ-ын даргаас зэрэг шахам чөлөөлөгдөж байлаа. Дараа нь, 2016 онд МАН үнэмлэхүй ялж, М.Энхболд УИХ-ын дарга болж, улмаар Ц.Амгаланбаяр ШШГЕГ-ын даргаар ажилласан. Гэвч 2019 оны хоёрдугаар сард Цагдах хорих 461 дүгээр ангид хоригдож байсан Гавьяат шүүгч Л.Бямбаа амиа хорлосон. Улмаар сарын дараа буюу 2019 оны гуравдугаар сард Ц.Амгаланбаярыг ШШГЕГ-ын даргаас нь чөлөөлж байв. Гэсэн ч Ц.Амгаланбаяр 2020 оноос Дотоод хэргийн их сургуулийн Удирдлагын академийн Тэргүүлэх профессороор ажиллаж байгаа.

       Ноцтой нь,  Ц.Амгаланбаяр нь Боловсролын зээлийн сангаас 14500 ам.долларын зээл авч, 1998-2000 онд ОХУ-ын ДЯЯ-ны Удирдлагын академид сурсан байдаг. Одоогийн ханшаар авсан зээл нь 50 сая төгрөг гэсэн үг. Үүн дээр зээлийн хүү, хүүгийн төлбөр гэж нэмэгдэнэ. Гэвч зээлээр сурсан сургалтын төлбөрөө төлөхгүй явсаар 2008 онд Засгийн газрын тогтоолоор тэглүүлж, чөлөөлөгджээ.

       Аавынх нь ийм замналын дараа хүүгийнх нт томилгоонууд үргэлжилнэ. 2016 онд М.Энхболд УИХ-ын дарга болж, А.Амартүвшинг нь УИХ-ын Тамгын газрын зөвлөх болгосон. Ингээд хэдхэн сарын дараа буюу 2016 оны намар А.Амартүвшин Хан-Уул дүүргийн Засаг дарга Ж.Алдаржавхлангийн орлогчоор томилогдож байлаа. А.Амартүвшин нэр дээрээ компанигүй, бизнесгүй ч өдгөө жилийн орлого нь 462 сая, 2.3 тэрбум төгрөгөөр үнэлэгдэх зургаан орон сууцтай гэж хөрөнгө орлогтоо мэдүүлжээ