Т.Батцогт 2012 оноос Баянзүрх дүүргийн ИТХ-ын төлөөлөгч, 2016 оноос НИТХ-ын төлөөлөгчөөр ажиллаж байгаа. УИХ-д нэр дэвшиж, ойчихоороо нийслэлийг бараадаад найман жил өнгөрлөө.

    Т.Батцогтын эхнэр П.Тунгалаг нь “Мон тун фарм” ХХК-ийг эзэмшдэг.  Угтаа “Мон тун фарм” компанийг Т.Батцогт өмнө нь “И эм си эйч инженеринг” нэрээр удирддаг байсан. Гэсэн ч улс төрд хүч үзэхийн тулд нэр, эзэмшлийг нь өөрчилсөн гэсэн үг. Уг компани “Чингис хаан” нисэх буудлын “Ковид-19 цар тахлын нэг удаагийн хамгаалах хэрэгсэл”-ийн 195 сая,  “Улаанбаатар цахилгаан түгээх сүлжээ” ТӨХК-ийн “Холбогч, хавчаар”-ын 130 сая төгрөгийн тендерт шалгарч байжээ.

     Үүнээс гадна  “Мон тун фарм” ХХК нь “Хаппи фарм” гэх сүлжээ эмийн сан ажиллуулдаг. Нэг салбар нь Төрийн тусгай эмнэлэгт үйл ажиллагаа явуулдаг. Хоржоонтой нь, ЭМДЕГ-аас олон жил санхүүжилт авч, иргэдэд даатгалаар үйлчилж ирсэн байдаг. Өөрөөр хэлбэл, төрийн тусгай эмнэлэгт үйл ажиллагаагаа явуулж, даралтны эмнээс эхлээд иргэдийн талх шиг “иддэг” эмийг даатгалаар олгодог, үүнийхээ хариуд улсаас их хэмжээний хөнгөлөлт авдаг гэсэн үг.

Т.Батцогт НИТХ-ын төлөөлөгчөөр сонгогдсон цагаасаа Х.Баттулгын ивээлд багтаж, дотноссон. Улмаар 2020 оны УИХ-ын сонгуульд Х.Баттулгын дэмжлэгээр Баянзүрх дүүрэгт З.Энхболдтой ханьсаж нэр дэвшээд унасан. Мөн 2023 оны арваннэгдүгээр сард Х.Баттулгын дэмжлэгээр Нийслэлийн Ардчилсан намын даргаар сонгогдсон гэж яригддаг. Түүнчлэн хоёр ч удаагийн УИХ-ын сонгуульд үзэж, хүч, хөрөнгө хаясан ч төрийн босго давж чадаагүй. Ингээд эцэстээ, НИТХ-ын сонгуульд ч намдаа суудал авч чадахгүйдээ тулсан учир даргын суудлаасаа буух нь тодорхой болоод байна.

     Сонирхуулахад, Т.Батцогтын эхнэр П.Тунгалаг нь УИХ-ын гишүүн С.Бямбацогттой “Ховд аймгийн Нутгийн зөвлөл” ТББ-ыг 2012 онд хамтран байгуулж, удирдаж ирсэн. “Ховд аймгийн Нутгийн зөвлөл” ТББ-ын Удирдах зөвлөлийн даргаар 2020 он хүртэл УИХ-ын гишүүн С.Бямбацогт ажилласан бол, 2020 оноос хойш Т.Батцогтын эхнэр П.Тунгалаг ажиллаж байгаад 2023 онд татан буулгасан байдаг. Мөн П.Тунгалаг нь “Ховд аймгийн Нутгийн зөвлөл” ТББ-ын эзэмшдэг “Буянт карт” ХХК-ийн хувьцаа эзэмшигч, гүйцэтгэх захирлаар ажилладаг. Эндээс харвал, Т.Батцогт АН-аас Х.Баттулгын фракцад зүй ёсоор багтаж, эхнэрээрээ дамжуулан МАН-ын С.Бямбацогттой ойрхон байж болзошгүй ажээ.