Цэргийн төв эмнэлгийн бөөрний диализын аппаратад ороод нас барсан иргэн ДОХ-той байсан нь тодорхой болж, эрсдэлтэй нөхцөл байдал үүсээд байгааг бид мэдээлсэн билээ. Тодруулбал, талийгаач тус эмнэлэгт 10 хоног хэвтэн эмчлүүлсэн. Ингэхдээ ДОХ-той гэдгээ хэлээгүй бөгөөд архины хорлого, бөөрний дутагдалаар эмчилгээ хийлгэжээ. Мөн Цэргийн төв эмнэлгийнхэн талийгаачаас цусны шинжилгээ авахдаа ДОХ-ын эсрэг шинжилгээ аваагүй, мэдээгүй гэх хариуцлагын асуудал яригдаж байгаа юм. Талийгаачийн орсон гемодиализын аппаратаар цус сэлбүүлсэн иргэд, задлан шинжилгээ хийсэн эмч нар ДОХ-ын халдвар авсан эсэхийг шинжилж байгаа. Эрүүл мэндийн сайд Т.Мөнхсайхан Ажлын хэсэг гарган, шалгалтын ажиллагаа явуулж эхэлсэн.

Энэ талаар Цэргийн төв эмнэлгийн дарга Б.Энх-Одоос тодрууллаа.

-Талийгаачийн орсон гемодиализын аппаратаар цус сэлбүүлсэн иргэд, задлан шинжилгээ хийсэн эмч нараас шинжилгээ авсан уу?

            -Манай эмнэлэг шаардлагатай бүх арга хэмжээг авсан. Эмч, эмнэлгийн ажилтнуудаас шинжилгээ авсан. Холбогдох бүх шинжилгээг авч, хариу нь сөрөг гарсан.

            -Одоо ямар нөхцөл байдал өрнөж байгаа вэ?

-Эрүүл мэндийн яам болон бусад холбогдох албанаас Ажлын хэсэг гарган, манай эмнэлэгт шалгалтын ажиллагаа явуулж байна. Шалгалтаар хариуцлага алдсан уу, үгүй юу гэдэг нь тодорхой болно.

            -Эмч, эмнэлгийн ажилтнуудаас ДОХ-ын эсрэг шинжилгээ авах хүртэл нь хариуцлага алдсан уу. Хариуцлагын асуудал яригдаж байгаа юу?

            -Хариуцлага алдсан эсэхийг шалгалтаар тогтооно.

-Хэчнээн хүнийг эрсдэлд оруулсан гэж үзэж байгаа вэ, судалгаагаар. Мөн хэдэн хүнээс ДОХ-ын эсрэг шинжилгээ авсан бэ?

-Холбогдох бүх ажилтан, албан хаагчаас шинжилгээ авсан. Яаралтай тусламж, хэвтэж байсан тасгийн ажилтнууд хамрагдсан.