Орхон аймгийн Засаг дарга М.Түмэнжаргал охинтойгоо, дүү нартайгаа “Эрдэнэт” үйлдвэрийн тендерийг түүж, эрх мэдлээ урвуулан ашиглаж, шахаа хийсэн “хэрэг”-тэй хэцүү нэртийн хаалга татах вий дээ...  

        Аймгийн Засаг даргын орлогчоор дөрвөн жил ажиллаж, Засаг даргын суудалд дөрвөн сарын өмнө томилогдсон М.Түмэнжаргалын тухай таагүй мэдээллүүд хэвлэлийн хуудсанд хөврөх болсон. Эрх мэдэл, албан тушаалын байдлаа урвуулан ашиглаж, мэдээлэлд ойрхон байгаагаа далимдуулж, улсын ганц саалийн үнээ буюу “Эрдэнэт” үйлдвэрээс эгч, дүүгийнхээ компаниар тендер түүдэг гэх.

        Тэр 1998 нд Орхон аймгийн “Эрднэр” ХХК-ийн захирлаар ажиллаж байсан намтартай.  Уг компанийг Орхон аймгийн Засаг дарга М.Түмэнжаргал өөрийн төрсөн дүү М.Нандинзаяатайгаа хамтран эзэмшдэг. Харин “Эрднэр” ХХК-ийн гүйцэтгэх захирлаар М.Түмэнжаргалын охин Т.Нэргүй ажилладаг.  Эрдэнэт хотын захирагч М.Түмэнжаргалын охин Т.Нэргүй нь БНХАУ-д Шаньдун мужид бүртгэлтэй “Weihai Changte Industrial Mining Machinery” компанийн Монгол дахь төлөөлөгчөөр ажилладаг. Илүү ноцтой нь, Хятад бүртгэлтэй “Weihai Changte Industrial Mining Machinery” компани нь 2022 оны нэгдүгээр сард “Эрдэнэт үйлдвэр”-ээс зарласан “Баяжуулах үйлдвэрийн зэсийн даралтат шүүлтүүр нийлүүлэх” нэртэй, 14.2 тэрбум төгрөгийн тендерт шалгарсан баримтыг уншигч танд өмнө нь хүргэсэн.

        Тэгвэл өөр нэг ноцтой баримтыг хүргэх гэж байна. М.Түмэнжаргал БНХАУ-ын Бээжингийн Хэл соёлын дээд сургуульд гурван жил суралцсан байдаг. Энэ схемээр хятадуудтай түншлэл болж, охин Т.Нэргүй болон дүү М.Нандинзаяа, М.Итгэлт нарыг БНХАУ-ын хөрөнгө оруулалттай хэд хэдэн компанийн Монгол дахь албан ёсны итгэмжлэгдсэн төлөөлөгчөөр суулгажээ.

        Дээр дурдсан баримтаас гадна БНХАУ-ын “Hebei Delin Machinery” ХХК-ийн Монголд дахь итгэмжлэгдсэн төлөөлөгчөөр М.Түмэнжаргалын охин Нэргүй, дүү М.Итгэлт нар ажилладаг аж. Дүү М.Итгэлтийн хувьд БНХАУ-д амьдардаг учраас М.Түмэнжаргалын охин Нэргүй Монгол дахь ажлыг нь зохиуцуулдаг ажээ. Хамгийн ноцтой нь, Орхон аймгийн Засаг дарга М.Түмэнжаргалын охин, дүүгийн хариуцаж, зуучилдаг БНХАУ-ын “Hebei Delin Machinery” ХХК “Эрдэнэт” үйлдвэрийн тендерт мөн л гараа дүржээ.

Тус компани нь 2023 онд “Эрдэнэт” үйлдвэрийн долоон тендерт орж, “Их хүчин чадлын насосны сэлбэг” нийлүүлэх 1.6 тэрбумын тендерт ялсан байна. Угтаа уг тендерт Монгол компаниуд оролцсон ч М.Түмэнжаргалын охин, дүүгийн итгэмжлэгдсэн төлөөлөгчөөр ажилладаг хятадын компанийг шалгаруулжээ.

         Энэ мэтээр цааш хөөвөл М.Түмэнжаргалын удам судраараа “Эрдэнэт” үйлдвэрийн тендерийг түүсэн баримт үргэлжилнэ. Өөр нэг ноцтой баримтыг хүргэхэд хятадуудтай нийлж, “Эрдэнэт” үйлдвэрт шахаа хийсэн гэх М.Түмэнжаргалын дүү М.Нандинзаяагийн нэр дээр бүртгэлтэй тансаг зэрэглэлийн зочид буудал Орхон аймагт сүндэрлэж байна. Дөрвөн замын уулзварт, дөрвөн давхар зочид буудал барьж байгаа нь мөн л анхаарал татах асуудал. Уг бүтээн байгуулалтын газрыг хэн олгосон, М.Түмэнжаргал нөлөөлсөн үү гэдэг асуулт урган гарч ирж байгаа юм.

Эрдэнэт хотод баригдаж буй М.Түмэнжаргалын дүү М.Нандинзаяагийн нэр дээр бүртгэлтэй тансаг зэрэглэлийн зочид буудал. 

        Засаг даргын орлогчоор ажиллаж байхдаа л хятадуудтай нийлж, “Эрдэнэт” үйлдвэрт шахаа хийдэг байсан болзошгүй М.Түмэнжаргал одоо Эрдэнэт хотын “хаан” болсон. Хэмжээшгүй эрх мэдлийн үзүүрээс атгачихаад тэр тавихгүй гэж үзэж байгаа. Өөрөөр хэлбэл, Эрдэнэт хотын захирагчаар дахин томилогдох санаархал өвөртөлж, тохироогоо хийчихсэн гэх. Дурын нэг хятадын компани улсын үйлдвэрт насосны сэлбэг, зэсийн даралтад шүүлтүүр шахах нь байдаг л асуудал биш. Ар тал, асаргаа сувилгаа шаардах нь зүйн ёсны хэрэг. Тэгвэл зуучлагч М.Түмэнжаргал бололтой.

        Засаг дарга М.Түмэнжаргал Завхан аймгийн Тосонцэнгэл сумын 10 жилийн дунд сургуулийг төгссөн. Завхан гаралтай, Эрдэнэт хотын захирагч гэсэн үг. Харин “Эрдэнэт” үйлдвэрийн дарга Г.Ёндон Улаанбаатар хотод төрсөн ч Завхан гаралтай гэнэ. Тэд ийм схемээр холбогддог, хамтран ажилладаг байж болзошгүй байна.

Г.Ёндон, М.Түмэнжаргал нар. 

М.Түмэнжаргалыг АТГ-аас шалгах цаг нь болжээ. Засаг даргын суудалд заларчихаад дүү, охиноороо дамжуулан “Эрдэнэт” үйлдвэрээс тендер авч байгаа нь хууль ёсны хэрэг хэрхэвч биш.

Үргэлжлэл бий.