Орон нутгийн сонгуульд оролцоод буцаж явсан оюутнууд осолдсон харамсалтай хэрэг гараад байна. Тодруулбал, Говь-Алтай аймгийн Тонхил суманд сонгууль өгөөд, Улаанбаатар руу зорчиж явсан таван оюутан зам тэврийн осолдсон ноцтой осол гарчээ. Ослын улмаас 20, 21 настай хоёр эрэгтэй газар дээрээ амиа алдаж, гурван эрэгтэй Говь-Алтай аймгийн нэгдсэн эмнэлэгт хүргэгджээ. Осолд орсон залуусын биеийн байдал тааруу, хүнд байгаа талаар эх сурвалж мэдээлэв. Залуучууд хувийн унаагаар зорчиж явсан бөгөөд Дэлгэр сумын нутагт осолджээ.

Талийгаач залуус аравдугаар сарын 11-нд Тонхил суманд очиж, өчигдөр орой Улаанбаатар руу хөдлөсөн байжээ.

        Бид бодит мэдээллийг уншигч танд хүргэх үүднээс зам тээврийн ослын улмаас амиа алдсан Б-гийн ээжтэй холбогдоход “Бид одоогоор ямар ч мэдээлэл өгөх боломжгүй байна. Хүүгээ алдсан аав, ээж цочролд орж, хүнд нөхцөл байдалтай байна. Гэнэтийн маш аймшигтай осол боллоо. Амьд үлдсэн гурван хүүхдийн биеийн байдал ямар байгааг мэдэхгүй” гэлээ.