Д.Өнөрболор сумын шадар туслахаар ажиллаж байсан 62 настай, Ц гэх эмэгтэй нас барсан харамсалтай хэрэг гарсан. Тодруулбал, өнгөрсөн долоо хоногт Төв аймгийн Баяндэлгэр сумын иргэн зуурдаар амиа алдсан юм. Талийгаач УИХ-ын сонгуулийн дөрөвдүгээр тойрогт МАН-аас нэр дэвшиж буй Д.Өнөрболор гишүүний шадар туслахаар ажиллаж байсан. Талийгаач тэр өдөр сумын айлуудаар явж, ухуулга, сурталчилгаагаа хийж, намын байрандаа тайлангаа тавиад явсан. Ингээд шөнө нас барсан юм.

      Энэ талаар Төв аймгийн Баяндэлгэр сумын Засаг даргын орлогчоос тодруулахад “Талийгаач Д.Өнөрболор гишүүний шадар туслахаар ажиллаж байсан юм байна лээ. Намын байрандаа тайлангаа тавьчихаад, гэр рүүгээ явсан гэсэн. Тэгээд өглөө нь нас барсан байсан гэсэн. Хэргийг Төв аймгийн цагдаагийн газарт шалгаж байгаа. Шалтгаан нөхцлийг нь хууль хяналтын байгууллага тогтооно байх. Талийгаач ганцаараа амьдардаг байсан. Ганц хүүтэй, хүү нь оюутан” гэсэн.

Харин ЦЕГ-ын Хэвлэл мэдээллийн төвөөс өгсөн мэдээллээр “Төв аймаг Баяндэлгэр сумын нутаг … тоотод хүн нас барсан байна” гэсэн мэдээллийг зургадугаар сарын 21-ний 04:54 цагт ирсэн. Дуудлагын дагуу шалгалтын ажиллагаа явуулахад “Баяндэлгэр сумын дугаар тоотод суух 62 настай эмэгтэй Ц нь  ил харагдах гэмтэл, шархгүй нас барсан байсан. Хэргийг Төв аймгийн цагдаагийн газар шалгаж байна. Урьдчилсан байдлаар талийгаач эрүүл мэндийн шалтгааны улмаас нас барсан” гэв.

Х.АНАНД: БООМТЫН САЙД Б.ТУЛГА ИРЭЭД ЯВСАН. ЭЭЖИЙН АЖИЛЛАЖ БАЙСАН Д.ӨНӨРБОЛОР ГИШҮҮН ИРЭЭГҮЙ, ЗАЛГААГҮЙ

Бид талийгаач Ц-ийн хүү Х.Анандтай холбогдож, дараах мэдээллийг авлаа.

-Ээж нь нас барсан хэцүү үед холбогдож байна. Гүн эмгэнэл илэрхийлье, ажил нь амжиж байна уу?

-Олны хүчинд амжиж, ажил явдал нь давгүй сайхан болж байна. Маргааш (өнөөдөр) үүрээр ээжийгээ хөдүүлнэ дээ. Гэнэтийн зүйл учраас дээшээ тэнгэр хол, доошоо газар хатуу гэгчээр л байна. Ээжийн минь ах, дүү, нутаг орныхон, шавь нар бүгд ирцгээсэн.

-Ээж нь ямар ажил хийдэг байсан юм бэ?

-Насаараа Баяндэлгэр сумын ерөнхий боловсролын сургуулийн захирлаар ажилласан. Тэтгэвэрт гарсан учраас сүүлийн жилүүдэд бага ангийн багшаар ажиллаж байсан юм. Би оюутан учраас ээж гэртээ ганцаараа амьдардаг байсан.

-Ээж нь бурхан болох үедээ ганцаараа байсан юм уу?

-Би хамт байсан. Миний дадлагын хугацаа дуусаад гэртээ ирчихсэн байсан юм. Тэр өдөр манай найз манайд хоносон. Ээж бид гурав хамт хоносон гэсэн үг.

-Юу болсон талаар ярьж болох уу?

-Ээж УИХ-ын гишүүн Д.Өнөрболорын шадар туслах, ухуулагчаар нь ажиллаж байсан. Хэд хоногийн өмнө сургуулийнхаа ажилтнуудтай Манжуур аялаад ирсэн. Ирсэн өдрөө л ухуулагчийн ажилдаа орсон юм. Ухуулагчаар ажлаад гурав хонож байсан байх. Өглөө үүрээр гараад, орой 22:00, 23:00 цагийн үед гэртээ орж ирдэг. Өдөржин айлуудаар яваад, орой нь тайлан мэдээгээ нэгтгэдэг байсан юм шиг байна лээ. Хол замд явж ирээд, ухуулагчийн ажил хийсэн учраас маш их ядарч байсан. Ачаалал ихтэй, ядраад байна гэдгээ ч өөрөө хэлсэн. Би уг нь “Ээж, сонгуулийн ажлаа орхиод гэртээ амрах юм уу” гэж хэлсэн. Урьдчилгаа мөнгө, төлбөрөө авчихсан учраас больж болохгүй байх шиг байсан. Тэр өдөр 23:00 цагийн үед гэртээ ирсэн. Бие нь зовиуртай л харагдсан. Тэгээд намайг “Сүлжээгээ салгаад эртхэн унтаарай” гээд унтаад өгсөн. Би найзтайгаа байсан учраас орой болтол унтаагүй. Шөнө 03:00 цагийн үед амьсгаа нь давчдаад, бие нь хачин болчихсон. Нөгөө талын өрөөнд байхад амьсгаадаад байхаар нь гүйгээд очтол нь бие нь таталт өгч, сонин болчихсон байсан. Тэгээд түргэн дуудсан ч ээж маань амьсгал хураачихсан. Надад юу ч хэлж чадаагүй.

-Бие нь өвддөг байсан уу?  

-Тийм ээ, зүрх нь бага зэрэг өвддөг байсан. Эмчилгээ хийлгэж, эм ууж байсан.

-Чи эхээс хэдүүлээ вэ?

-Би айлын ганц хүү. Ах, дүү байхгүй учраас надад хэцүү л байна. Ээж маань миний төлөө л амьдарч байсан. Гэнэтхэн бурхан болчихсонд нь итгэж чадахгүй, хэцүүхэн л байдалтай байна даа.

-Оюутан юм байна тэ?

-Тийм ээ, МУБИС-д сурдаг. Одоо хоёр жил сураад сургуулиа төгсөнө. Ээж миний сургалтын төлбөрийг төлөх гэж тэтгэврийн зээл авсан байсан. Нас барсных нь дараа тэтгэврийн зээлтэй гэдгийг нь мэдлээ. Ар гэрийнхэн нь зээлийг нь төлөх ёстой байдаг юм байна. Ээж байхгүй учраас бүх зүйл байхгүй мэт л байна.

-Оршуулгын зардал олгосон уу?

-Улсаас хоёр сая төгрөг өгдөг юм шиг байна лээ. Бичиг, баримт бүрдүүлээд ажлын өдрөөр авдаг юм байна лээ. Ээжийгээ хөдөөлүүлчихээд энэ асуудлыг нь хөөцөлдөнө.

-Ээж нь УИХ-ын гишүүн Д.Өнөрболорын ухуулагчаар ажиллаж байсан гэсэн шүү дээ. Энэ хүний Ажлын албанаас ирж уулзсан уу?

-Сумын МАН-ын хорооныхон буяны ажилд нь ирж оролцсон. Мөн Төв, Сэлэнгэ, Дархан аймагт Д.Өнөрболор гишүүнтэй хамт нэр дэвшиж байгаа Боомтын сайд Б.Тулга гэж хүн ирээд уулзаад явсан. Эмгэнэл илэрхийлж, буяны ажилд нь хандив өгсөн байна лээ. Харин ээжийн ажиллаж байсан Д.Өнөрболор гишүүний Ажлын албанаас гэж нэг ч хүн холбогдоогүй.