Сүхбаатар аймгийн удирдлагуудыг АТГ-аас шалгаж эхэлжээ. Тодруулбал, Сүхбаатар аймгийн Засаг дарга М.Идэрбат, ИТХ-ын дарга Д.Хосбаяр, Газрын харилцаа, барилга, хот байгуулалтын газрын дарга Э.Төгөлдөр нарыг эрх мэдэл, албан тушаалын байдлаа урвуулан ашиглаж, бусдад давуу байдал олгосон, авлига авсан байж болзошгүй үндэслэлээр шалгаж байгаа гэнэ. Тэр бүү хэл нэр дурдагдсан хүмүүсийг цагдан хорьж, яллагдагчаар татан шалгаж байна.  

СҮХБААТАР АЙМГИЙН ЗАСАГ ДАРГА М.ИДЭРБАТ, Э.ТӨГӨЛДӨР НАР НЭР БҮХИЙ УИХ-ЫН ГИШҮҮНИЙ ДҮҮД ХУУЛЬ БУСААР ГАЗАР ОЛГОЖ, ХАХУУЛЬД НЬ ГУРВАН ӨРӨӨ БАЙР АВСАН БАЙЖ БОЛЗОШГҮЙ

          Эх сурвалжийн мэдээлж буйгаар Сүхбаатар аймгийн Засаг дарга М.Идэрбат эрх мэдэл, албан тушаалын байдлаа урвуулан ашиглаж, нэр бүхий УИХ-ын гишүүний дүүд аймгийнхаа газраас хууль бусаар олгосон байж болзошгүй гэнэ. Мөн үүгээр ч зогсохгүй хадам дүүгийнхээ нэр дээр их хэмжээний газар олгож, бусдад борлуулсан хэрэгт холбогджээ. Уг үйлдэлд нь Сүхбаатар аймгийн Газрын харилцаа, барилга, хот байгуулалтын газрын дарга Э.Төгөлдөр нар оролцжээ.

         Энэ талаар АТГ-ын Хэвлэл мэдээлэл, олон нийттэй харилцах ажилтан, комиссар Н.Тэмүүлэнгийн өгсөн мэдээллээр “Сүхбаатар аймгийн удирдлагуудыг мөрдөн шалгаж байгаа. Аймгийн Засаг дарга, ИТХ-ыг даргыг 2023 оноос эхэлж шалгасан. Сүхбаатар аймгийн Засаг дарга нь нэр бүхий УИХ-ын гишүүний үеэл дүүгийн эзэмшлийн буюу Баруун-Урт сумын гуравдугаар багийн байрлалтай, 6700 метр кв, мөн 1359 м кв хэмжээтэй хоёр байрлалын газрын зориулалтыг өөрчилсөн. Ингэхдээ Газрын тухай хууль, Газар эзэмших, ашиглах эрхийн гэрчилгээ олгох журмыг зөрчсөн. Бусдад давуу байдал олгосон байж болзошгүй нөхцөл байдал тогтоогдож байгаа.  Мөн тэрбээр өөрийн хадам дүүгийн Баруун-Урт сумын хоёрдугаар багийн нутаг дэвсгэрт байрлалтай, 2635 м кв хэмжээтэй газрыг авто угаалга, гараажийн зориулалттай газрыг төлбөр төлөөгүй байхад бусдад шилжүүлж, бусдад давуу эрх олгосон.Нэр бүхий УИХ-ын гишүүний Баруун-Урт дахь 3211 м кв газрын эзэмших эрхийг Газрын тухай хууль, холбогдох журмыг зөрчин, түүний хамаарал бүхий этгээдэд шилжүүлсэн. Архитектур төлөвлөлтийн даалгаваргүй, батлагдсан зураг төсөвгүй, барилгын ажил эхлүүлэх зөвшөөрөлгүй, нэр бүхий компанийн захиралтай Шинэ суурьшлын бүс байгуулах, түлхүүр гардуулах нөхцөлтэй, ажил гүйцэтгэх гэрээ байгуулсан. 1.4 тэрбум төгрөгийн санхүүжилт авах нөхцөлийг бүрдүүлсний хариуд Улаанбаатар хотын Баянзүрх дүүрэгт байрлалтай гурван өрөө байрыг хахуульд авсан байж болзошгүй” гэв.

СҮХБААТАР АЙМГИЙН ИТХ-ЫН ДАРГА Д.ХОСБАЯРЫН ХУУЛЬ БУС ҮЙЛДЛҮҮД

      Харин Сүхбаатар аймгийн ИТХ-ын дарга Д.Хосбаяр эрх мэдэл, албан тушаалаа урвуулан ашиглаж, тус аймгийн Баруун-Урт сумаас явуулсан тендерт өөрийн хамаарал бүхий этгээдийн компанийг шалгаруулсан хэрэгт холбогджээ. Гэрээний гүйцэтгэл, техникийн нөхцөл гэх мэт тендерийн шалгуурыг хангаагүй, өөрийн эзэмшлийн хөрөнгийг шилжүүлж, өөртөө болон бусдад давуу эрх үүсгэсэн байж болзошгүй. Мөн өөртөө давуу байдал олгож, БНХАУ-д аялсан Сүхбаатар аймгийн төрийн болон хувийн хэвшлийн 29 хүний зардлыг нэр бүхий хятадын компаниар төлүүлжээ. Уг аялалд нь Сүхбаатар аймгийн хууль хүчний байгууллагын ажилтан хамрагдсан гэнэ.

Албаны эх сурвалжийн мэдээлж буйгаар “Сүхбаатар аймгийн эрх бүхий удирдах албан тушаалтнууд гэмт хэргийн замаар олсон мөнгөө нуун дарагдуулах гэж оролдсон. Тэд  хууль бусаар олж авсан мөнгөө нуухын тулд өөрийн хамаарал бүхий иргэдийн данс, картыг ашигласан. Баяр ёслолын үеэр худалдан авсан, ахуйн хэрэглээний эд зүйлийнхээ төлбөрийг төлөөгүй. Мөн албаны нэр нөлөөгөө ашиглан тус аймгийн ашигт малтмал олборлогчоос гэрээнд заагаагүй төлбөр авсан” гэлээ.

       Сүхбаатар аймгийн ИТХ-ын дарга Д.Хосбаяр нь “1998 оны төгсөгчдийн клуб” ТББ-ын ТУЗ-ийн гишүүн ажээ. Түүний удирддаг уг клубийн гишүүд Сүхбаатар аймгаас зарласан, өндөр үнэ бүхий сонгон шалгаруулалтад удаа дараа шалгарчээ.

М.ИДЭРБАТ ГЭЖ ХЭН БЭ

Эрх мэдэл, албан тушаалын байдлаа урвуулан ашиглаж, газрын наймааны хэрэгт холбогдож, яллагдагчаар татагдсан Сүхбаатар аймгийн Засаг дарга М.Идэрбат гэж хэн бэ гэдгийг танилцуулъя.

БОЛОВСРОЛ

1987-1997 онд Баруун-Урт сумын 2-р 10-н жилийн сургууль

1997-2001 онд Монгол Улсын Их Сургуулийг Түүхч мэргэжлээр

2001-2003 онд Шинжлэх Ухаан Технологийн Их Сургуулийг магистр

2011 онд БНСУын Төрийн удирдлагын институтэд мэргэжил дээшлүүлсэн

АЖЛЫН ТУРШЛАГА

2002-2005 онд ШУТИС-ийн Сүхбаатар аймаг дахь Технологийн сургуульд багш

2005-2009 онд аймгийн Угсаатны зүйн музейн захирал

2009-2012 онд аймгийн Байгаль орчин, аялал жуулчлалын газрын дарга

2012-2020 онд Баруун-Урт сумын Засаг дарга, хотын захирагч

СОНГУУЛЬТ АЖИЛ

2008-2012 онд Баруун-Урт сумын ИТХ-ын Төлөөлөгч

2008-2017 онд Баруун-Урт сумын Ардчилсан намын дарга

2012-2020 Аймгийн ИТХ-ын төлөөлөгч, тэргүүлэгч

2017 оноос Аймгийн Ардчилсан намын дарга

ГАВЬЯА ШАГНАЛ

АЗХ-ны Тэргүүний Залуу алтан медаль

АЗХ-ны дээд шагнал "Мөнх Монгол" одон

Нутгийн өөрөө удирдах байгууллагын дээд шагнал "Соёмбо" одон

М.ИДЭРБАТ, Д.ХОСБАЯР НАРЫГ 30 ХОНОГ ЦАГДАН ХОРИНО