Багануурын хорих ангиас хоёр хоригдол оргож, бөөн дуулиан дэгдээгээд байна. Нэгийг нь баривчлаад, нөгөөг нь эрэн хайж байгаа талаар ШШГЕГ-аас мэдээлсэн. Тодруулбал, гуравдугаар сарын 4-5 нд шилжих шөнө Багануур дүүрэх дэх Хорих 427 дугаар ангиас хоёр хоригдол оргожээ.

     Энэ талаар ШШГЕГ-ын холбогдох албан тушаалтантай холбогдож тодруулахад "Өнгөрсөн шөнө Багануурын хорих ангиас хоёр хоригдол оргосон нь үнэн. Тухайн хоёр хоригдол уурын зууханд галчаар ажиллаж байгаад оргосон. Нэг хоригдлыг нь Багануур дүүрэг орчмоос баривчлан сатуулсан. Нөгөөг нь эрэн хайж байна. Мөрдөн шалгах ажиллагаа явуулж байгаа учир дэлгэрэнгүй мэдээлэл өгөх боломжгүй" гэсэн юм.

Тэгвэл эрэн сурвалжлагдаж байгаа хоригдол Б.Ганчулуун нь 31 настай, 150-155 см өндөртэй, 70-75 кг жинтэй, бор царайтай, өргөн духтай, нарийн хар хөмсөгтэй, шулуун жижиг хамартай, жижиг, нарийн уруултай, дэлдэн чихтэй этгээд ажээ. Зугтсан газар нь Улаанбаатар, Хэнтий, Дорнод, Төв аймагт байж болзошгүй гэнэ.

       Хоригдол Б.Ганчулуун гэж хэн, хэрхэн, хэзээ, ямар хэргээр хорих ял сонссон гэдгийг хүргэж байна. Тэрбээр 2022 оны гуравдугаар сарын 23-нд малын хулгай хэргээр гурван жилийн хорих ял сонсжээ. Өмнө нь хоёр удаа ял сонсож байсан аж. Тодруулбал, Дорнод аймаг дахь Сум дундын шүүхийн 2009 оны хоёрдугаар сарын 9-ний 04 дугаартай шийтгэх тогтоолоор Эрүүгийн хуулийн тусгай ангийн 145 дугаар зүйлийн 145.2 дахь хэсэгт зааснаар хоёр жил арав хоногийн хорих ял ногдуулж, тогтоол биелүүлэхийг нэг жилийн хугацаагаар хойшлуулж байжээ. Мөн 2019 онд Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.1-д зааснаар 3.5 хорих ялаар, 2020 онд гурван жилийн хорих ялаар шийтгүүлж байжээ. Тэрбээр ял эдэлж байх хугацаандаа Өршөөл үзүүлэх тухай хуульд зааснаар 4.4 хугацааг зорчих эрхийг хязгаарлах ялаар дүйцүүлэн солиулж байжээ. Харамсалтай нь, тэрбээр Өршөөлийн хуульд хамрагдаж, 4.4 жилийн хорих ялаа зорчих эрхээ хязгаарлуулах ялаар солиод байхдаа дахин малын хулгайн гэмт хэрэг үйлджээ. Ингээд зорчих эрхийг нь хязгаарласан 4.4 жилийг хорих ялаар сонсож, малын хулгайн хэрэгт нь дахин гурван жилийн хорих ял оноосон байна. Б.Ганчулуун дөрвөн жилийн дараа суллагдах байжээ.

       Мөн Б.Ганчулуун нь 2021 онд Т.Бямбасүхтэй бүлэглэн айлын бэлчээрт байсан малаас хоёр үхэр хулгайлж, борлуулсан гэмт хэрэг үйлджээ. Тодруулбал, Дорнод аймгийн Чойбалсан сумын 1 дүгээр багийн нутаг дэвсгэрт бэлчээрт байсан иргэн Р.Б-ын хоёр тооны үхрийг хулгайлж, 2.4 сая төгрөгийн хохирол учруулсан байна.

Дорнод аймаг дахь Сум дундын Эрүүгийн хэргийн анхан шатны шүүх:

Эрүүгийн хуулийн тусгай ангийн 17.12 дугаар зүйлийн 2 дахь хэсгийн 2.1, 2.2, 2.4-т зааснаар шүүгдэгч Б.Ганчулуунд гурван жилийн хугацаагаар хорих ял, шүүгдэгч Т.Б хоёр жилийн хугацаагаар хорих ял тус тус шийтгэж,

-Эрүүгийн хуулийн ерөнхий ангийн 6.9 дүгээр зүйлийн 1 дэх хэсэгт заасныг журамлан шүүгдэгч Б.Ганчулуунд Эрүүгийн хуулийн тусгай ангийн 17.12 дугаар зүйлийн 2 дахь хэсгийн 2.1, 2.2, 2.4-т зааснаар ногдуулсан гурван жилийн хорих ял дээр өмнөх шийтгэх тогтоолоор оногдуулсан 4 жил 1 сар 7 хоногийн хорих ялаас эдлээгүй үлдсэн 3 жил 10 сар 22 хоногийн хорих ялыг нэмж нэгтгэн нийт эдлэх ялыг 6 жил 10 сар 22 хоногийн хорих ялаар,

Эрүүгийн хуулийн ерөнхий ангийн 5.6 дугаар зүйлийн 3, 4 дэх хэсэгт зааснаар шүүгдэгч Б.Ганчулуунд ногдуулсан 6.1 жилийн хорих ялыг, шүүгдэгч Т.Б-д ногдуулсан 3.1 жилийн хорих ялыг тус тус нээлттэй хорих байгууллагад эдлүүлэх шийдвэр гаргасан байна.

Б.Ганчулуун нь 1993 оны хоёрдугаар сард Дорнод аймгийн Чойбалсан суманд төрсөн, 29 настай, эрэгтэй, бүрэн бус дунд боловсролтой, мэргэжилгүй, эрхэлсэн тодорхой ажилгүй, ам бүл гурав, эцэг, эхийн хамт амьдардаг байжээ.