Тун удахгүй Төрийн ордонд “газрын наймаа”-ны нээлттэй сонсгол болно. М.Энхболдоос эхлээд үе үеийн Хотын дарга нар, газрын албаны дарга нар хамсаатнуудтайгаа хамт дуудагдана. Улаанбаатар хотыг бетенон ширэнгэ, түгжрэлийн голомт болгосон “хэрэгтэн”-үүд цөм цуглана гэсэн үг. Өмнө нь бид нэг дор хамгийн том газартай буюу Дүнжингаравын уулзвараас Амгалангийн гүүрний уулзвар хүртэлх 170 га газрыг бүхэлд нь эзэмшдэг УИХ-ын гишүүн асан Б.Наранхүүгийн газрын наймааны баримтыг дэлгэж байсан.
Тэгвэл энэ удаад хамгийн олон байршилд, хамгийн их газар эзэмшдэг гэр бүлийг танилцуулж байна. Энэ бол олны мэдэхээр Улсын их дэлгүүр, “Эрдэнэт хивс”-ийн эзэд буюу “Номин”-гийн гэр бүл юм. “Номин”-г өдий болтол “зөвлөх” нэрээр удирдаж яваа А.Шагдарсүрэн 2000-2004 онд УИХ-ын гишүүнээр ажиллаж, М.Энхболд, Т.Бадамжунай хоёртой тохой нийлүүлэн сууж асан нэгэн. Тиймдээ ч А.Шагдарсүрэнгийн барилгын, газрын бизнес гараа нь М.Энхболдын гувчуулсан газартай шууд холбогддог. Тэгэхээр “газрын наймаа”-ны нээлттэй сонсголд М.Энхболдын хажууд А.Шагдарсүрэн ба түүний хөвгүүд суух болов уу. Сонирхуулахад, “газрын наймаа”-ны нээлттэй сонсголыг удирдах явуулах Түр хорооны дарга, Хууль зүйн сайд Б.Энхбаяр 2000 оны эхээр А.Шагдарсүрэнгийн туслах байлаа.
Түүх сөхвөл, М.Энхболд тэртээ 2001 онд А/165, 2004 онд А/360 тоот захирамжуудаар ХУД-ийн 17-р хороо, Маршалын гүүрнээс баруун тийших, Туул голын эрэг дагуух 222,000м2 газрыг найз Д.Батаагийнхаа “Стандарт групп” ХХК-д бэлэглэчихэж байв. Энэ газар дээр нь А.Шагдарсүрэн “Номин констракшн” ХХК-аараа тансаг зэрэглэлийн “River garden” хотхоныг барьж, 2006 онд ашиглалтад оруулж байв. М.Энхболдын Д.Батаад бэлэглэсэн “хулгай”-н газар дээр “River garden” хотхоныг барьж эхлэхдээ А.Шагдарсүрэн УИХ-ын гишүүн байв.
Түүнээс хойш А.Шагдарсүрэн, түүний хүү Ш.Баярсайхан нар “River garden” хотхоныхоо хаяаг залгуулан “Time square” хотхон, “River plaza” цогцолбор, Богдхан уулын Зайсангийн аманд “Цэцээ гүн” хотхон, Арцатын аманд “Casa Da Vinchi” хотхон, “Garden city” хотхоныг тус тус барьж худалдсан. Одоо дуулиант “Суруга Монгол” ХХК-ийн эзэмшилд байсан 60,977м2 газар дээр тансаг зэрэглэлийн “Vega city” хотхоныг барьж буй.
Тэгвэл тэртээ 2000 оны эхээр М.Энхболдын гувчуулсан газар дээр барилгын бизнесээ эхлүүлж байсан А.Шагдарсүрэнгийн хөвгүүд өдгөө хамгийн олон байршилд, хамгийн том газар эзэмшдэг болцгоожээ.
“НОМИН”-ГИЙН АХ ДҮҮСИЙН ЭЗЭМШДЭГ ГАЗАР ЗҮҮНХАРААГИЙН АЙЛУУДЫН ЭЗЭМШДЭГ ГАЗАРТАЙ ТЭНЦЭНЭ
А.Шагдарсүрэн гурван хүүтэй. Том хүү нь Ш.Уламбаяр, удаах нь Ш.Баярсайхан, бага нь Ш.Энхбаяр. Тэгвэл А.Шагдарсүрэнгийн гурван хүүгийн нэр дээрх 33 компани 4,326,301м2 буюу 420 га газар эзэмшиж байна. Нэг өрх 0,7 га газар эзэмшдэг гэж тооцвол 6180 айлын хашааны газартай тэнцэх хэмжээний газрыг “Номин”-гийн ах дүүс эзэмшиж байна гэсэн үг. Энгийн жишээгээр тайлбарлавал, Сэлэнгэ аймгийн Мандал сум буюу Зүүнхараа 7000 орчим өрх айлтай. Тэгэхээр “Номин”-гийнхний эзэмшиж буй газар нь Зүүнхараагийн нийт айл өрхийн газартай бараг дүйнэ гэсэн үг. Ингээд жагсаалтаар танилцуулъя.
1“Номин констракшн” ХХК нь гурван байршилд 62,257м2
2. “Мэжик инвест” ХХК нь ХУД-ийн 4-р хороонд 35,815м2
3. “Өлзийт голын ус” ХХК нь ХУД-ийн 4-р хороонд 233,084м2
4. “Бросс консалтинг” ХХК нь ХУД-ийн 4-р хороонд 71,909м2
5. “Будын эх” ХХК нь СХД-ийн 32-р хороонд 99,920м2
6. “ГЛ” ХХК нь БЗД-ийн 11-р хороонд 81,027м2
7. “Цэц оньс” ХХК нь ХУД-ийн 14-р хороонд 1,199,411м2
8. “Номин реалтор” ХХК нь 54 байршилд 483,467м2
9. “Номин холдинг” ХХК нь дөрвөн байршилд 33,136м2
10. “Ухаалаг эрчим хүч” ХХК нь СХД-ийн 20-р хороонд 23,005м2
11. “Хөвсгөл усан зам” ХХК нь 18,742м2
12. “Уорлд констракшн” ХХК нь СБД-ийн 15-р хороонд 141,633м2
13. “Улсын их дэлгүүр” ХК нь ЧД-ийн 3-р хороонд 10,700м2
14. “Натурал текстайл групп” ХХК нь 34 байршилд 318,408м2
15. “Эрдэнэт хивс” ХХК нь хоёр байршилд 89,433м2
16. “Ашид талс” ХХК нь ХУД-ийн 4-р хороонд 37,856м2
17. “Бумбат тур” ХХК БЗД-ийн 11-р хороонд 105,058м2
18. “Булган отог тур” ХХК нь БЗД-ийн 14-р хороонд 99,999м2
19. “Хүннүжин энх” ХХК нь ХУД-ийн 4-р хороонд 49,881м2
20. “ТМДТ” ХХК нь ХУД-ийн 3-р хороонд 79,936м2
21. “Соргог байгаль” ХХК нь ХУД-ийн 4-р хороонд 100,038м2
22. “Юмэко” ХХК нь БГД-ийн 24-р хороонд 1600м2
23. “Энх ногоон дэлхий” ХХК нь ХУД-ийн 4-р хороонд 95,303м2
24. “Бат амар болор” ХХК нь СХД-ийн 34-р хороонд 99,920м2
25. “Арган” ХХК нь 68,549м2
26. “Цэлмэг тэнгэр трейд” ХХК нь БЗД-ийн 11-р хороонд 421,286м2
27. “Тагийн эх” ХХК нь СХД-ийн 34-р хороонд 99,923м2
28. “Эрхэс мөнх инвестмэнт” ХХК нь ХУД-ийн 15-р хороонд 33,000м2
29. “Эмэралд терра” ХХК нь ХУД-ийн 14-р хороонд 74,845м2
30. “Зол инвест” ХХК нь ХУД-ийн 15-р хороонд 27,977м2
31. “Үжин ресурс” ХХК нь ХУД-ийн 4-р хороонд 21,672м2
32. “Ай проперти ай” ХХК нь 3513м2
33. “Битум наран” ХХК нь БГД-ийн 24-р хороонд 3998м2
Товчхондоо, тун удахгүй Төрийн ордонд болох “Газрын наймаа”-ны нээлттэй сонсголд А.Шагдарсүрэн, М.Энхболдтой “хөтгөлцөөд”, хөвгүүдээ дагуулаад очих бололтой.
“НОМИН”-ГИЙН А.ШАГДАРСҮРЭНГИЙН ХӨВГҮҮД 6180 АЙЛЫН ХАШААНЫ ГАЗАРТАЙ ТЭНЦЭХ 420 ГА ГАЗАР ЭЗЭМШИЖ БАЙНА |
|