Төрд үүрлэсэн хулгайч нартай төр өөрөө хоёр жил гаруй тэмцэв. Тэмцэл эхлүүлсэн нь сайн ч торны цаана суулгасан нь одоогоор Б.Ганхуяг, С.Батдөл мэтийн хоёр, гуравхан “хурган” дарга л байна. Томчууд нь аанай л ард нь нуугдчихаад, хуулиар хамгаалалт хийчихээд сууцгааж буй. Гэхдээ авууштай нь, өнгөрсөн хоёр жилийн хугацаанд хөгжлийн банкны болон нүүрсний хулгай, газрын наймаа, тендер, төсвийн тонуул, улаан, ногоон автобусны цавчаа гээд төрийн бүх том хулгай, луйврыг төрийн томчууд, тэдний хамаарал бүхий этгээдүүд үйлдсэнийг бид хангалттай харлаа, бас сонслоо.
Тэгвэл төр одоо “элит ангийнхан” гэгдэх болсон элчин сайдууддаа онцгойлон анхаарах цаг нь болжээ. Өөрөөр бол, УИХ-ын гишүүд, Засгийн газрын сайдуудаасаа илүү харьд суугаа Элчин сайдууд гэж хагартлаа хөлжицгөөсөн, анги давхарга болтлоо алсарсан, хууль “хүрдэггүй” хэсэг болчихсон байна. Эх орноо харьд төлөөлөх үүрэгтэй элчин сайдын албан тушаалыг ялсан нам нь хөгшдөө дэвшүүлэн зайлуулах, өөрт зүтгэснээ шагнах, өр төлөх хэрэгсэл болгосон. Үр дүнд нь нэг бол насаараа нам дагаж төрийн өндөр алба хашсан хууччуул, нэг бол ногоон паспорт сарвайж гадаадад амьдрах хүсэлтэй толгой баячууд, нэг бол элчин сайд аснуудын хүүхдүүд, нөгөө бол хэн нэгэн том хүний гар хөл л Элчин сайдаар томилогддог болчихсон байна. Ингээд зогсохгүй тэд хөрөнгө чинээгээрээ саарал ордныхныг хол хаях аж.
Иймд эргэлт.мн мэдээллийн сайдын “эрэн сурвалжлах нэгдэл”-ээс “БИЕ НЬ ХАРЬД Ч, БИЗНЕС НЬ МОНГОЛД ЦЭЦЭГЛЭСЭЭР БУЙ ХАМГИЙН ХӨРӨНГӨЛӨГ ЭЛИТ ЭЛЧИН САЙДУУД” цувралыг бэлтгэн хүргэж байна. Энэ удаад С.Золжаргал, У.Нямхүү, Н.Тулга гэх гурван элчин сайдыг онцолж байна.
“БАРИЛГАЧИН” ЭЛЧИН САЙД С.ЗОЛЖАРГАЛ
Бүгд Найрамдах Куба Улсад суух онц бөгөөд Бүрэн Эрхт Элчин сайдаар Сэсээрийн Золжаргал гэх залуу өнгөрөгч 2023 оны хавар томилогдсон. 2005 оноос хойш төрд ажиллаж, Хятад дахь Элчин сайдын яаманд консулын ажилтан, Орос дахь Элчин сайдын яаманд зөвлөх, Гадаад харилцааны яаманд Төрийн захиргаа, удирдлагын газрын даргын албыг хашиж ирсэн С.Золжаргал 1.3 тэрбум төгрөгийн хадгаламжтай, хөрөнгөлөг сайдуудын нэг. Учир нь С.Золжаргал “Санни нүхт” ХХК-ийг эзэмшдэг. “Санни нүхт” ХХК-ийнхаа нэр дээр Төв цэнгэлдэх хүрээлэнгийн зүүн талд Эрчим хүчний сайд Б.Чойжилсүрэн, Ерөнхийлөгч асан Н.Багабанди хоёртой айлсуулан газар авч, “SN residence” нэртэй 16 давхар орон сууцны хотхон барьж худалдсан. Мөн Нүхтийн аманд хэд хэдэн тансаг зэрэглэлийн хаусууд барьж худалдсан гэх. Тэгэхээр 1.3 төгрөгийн хадгаламжтай байх нь аргагүй биз. Гэхдээ Төв цэнгэлдэхийг тойрсон газрын наймаанд зөвхөн томчууд л оролцож ирсэн. Тэгэхээр С.Золжаргал өөрөө Төв цэнгэлдэхийн хажууд газартай болж, орон сууц барьсан гэхэд эргэлзээтэй.
Тэгвэл С.Золжаргалыг консулын ажилтнаас Элчин сайд болтол дээш татсан хүн нь Ц.Элбэгдорж гэх. Тэд нэг нутгийнх бөгөөд Ц.Элбэгдоржийг УИХ-ын гишүүн байх үед нь туслах, зөвлөхийнх нь үүргийг гүйцэтгэдэг байж. Өдгөө ч Ц.Элбэгдорж, С.Золжаргал хоёрт хамаатах сэжим олон. Жишээ нь, С.Золжаргал Даяндоржийн Жаргалсайхан гэгчтэй “Нью пайз” ХХК-ийг хамтран эзэмшдэг. Харин Д.Жаргалсайхан гэгч нь Ц.Элбэгдоржийг Ерөнхийлөгч байх үед Тамгын газрын дарга нь байсан П.Цагааны эхнэрийнх нь төрсөн дүү. Мөн Д.Жаргалсайхан нь П.Цагааны алдарт “Ачит ихт” ХХК-ийн дэд захирлаар ажилладаг аж. Цаашилбал, С.Золжаргалын төрсөн дүү С.Одончимэг нь Ц.Элбэгдоржийн хүү Э.Эрдэнэтэй “Оксфорд кэмбрижийн төгсөгчдийн холбоо”-г хамтран үүсгэн байгуулж, удирдаж буй ажээ.
17 СУУЦ, ДӨРВӨН ОФФИСТОЙ ЭЛЧИН САЙД У.НЯМХҮҮ
Бүгд найрамдах Франц Улсад суух Онц бөгөөд Бүрэн Эрхт Элчин сайдаар Уламбаярын Нямхүү гэх бүсгүй 2021 оноос хойш ажиллаж буй. 2007 онд Францад Олон улсын харилцааны сургууль төгсөж, 2010 оноос хойш Гадаад харилцааны яаманд нэг, хоёр, гуравдугаар нарийн бичгийн даргаар ажиллаж байгаад 2021 онд ийн Францад Элчин сайдаар очсон. Тухайн үед УИХ-ын гишүүн Ц.Мөнх-Оргил “Яах вэ, франц хэлтэй эмэгтэй юм байна. Гэхдээ яаж ердөө нарийн бичгийн дарга хийж байсан намтартай хүнийг Элчин сайдаар томилох санал оруулж ирж чадав аа. Энэ хүнийг чинь францчууд хүлээж авах уу” хэмээн голонгуй шүүмжилж байв.
Гологдон байж томилогдсон У.Нямхүү өдгөө Элчин сайдуудыг хөрөнгөөрөө тэргүүлж буй. Тодруулбал, У.Нямхүү өнгөрсөн онд нэр дээрээ 5.5 тэрбум төгрөгийн 17 орон сууцтай, нэг зусланийн хаус, оффисын дөрвөн барилга, үйлдвэрийн нэг барилгатай гэж мэдүүлжээ. Мөн нөхөр А.Даваадоржийнхоо хамт “Үүр тээл” ХХК, “Жи Пи Экспресс” ХХК, “Фарго монголиа” ХХК, “Ийст коул майнинг” ХХК, “Ай Би Эй групп” ХХК, “Монгол машин байгууламж” ХХК, “Монгол машин байгууламж сервис” ХХК, “Эко ложистик” ХХК, “Номгон оюу авто бирж” ХХК-уудыг эзэмшдэг гэж мэдүүлжээ. Дээр дурдсан компаниуд заримынх нь үйл ажиллагааг сонирхвол, автобусны “шахаа”, хотын төвийн газар гээд одоо олны анхааралд ороод буй “хэрэг”-үүд рүү чиглэх аж. Тухайлбал, “Ай Би Эй групп” ХХК нь саяхан дэлбэрэлтэд өртсөн Дүнжингаравын уулзварт 6964м2 газар эзэмшдэг бөгөөд орон сууцны хотхоны барилгын ажил эхлүүлээд буй ажээ. Харин “Монгол машин байгууламж” ХХК нь 2019 онд нэг бүр нь 495 сая төгрөгийн хоёр ширхэг “Мон-30” нэртэй ногоон автобус нийслэлд нийлүүлсэн байна.
ХӨГЖЛИЙН БАНКНЫ ХУЛГАЙН “ХАМТРАГЧ” ЭЛЧИН САЙД Н.ТУЛГА
1987 онд Гадаад харилцааны яаманд туслах ажилтнаар ажилд орж, тэр цагаас хойш Сингапур, БНХАУ, АНУ дахь Элчин сайдын яаманд зөвлөхөөр ажиллаж, 2013-2017, 2018-2021 онд хоёр удаа Англид Элчин сайдаар суусан Нархүүгийн Тулга гэж бий. Ноцтой нь, өнгөрсөн 30 гаруй жил Монголдоо бараг л амьдраагүй шахуу намтартай Н.Тулга хамгийн хөрөнгөлөг элчин сайд.
Тодруулбал, Н.Тулга ТЕГ-ын дарга асан Б.Хурцын хамаатан. Тиймдээ ч Н.Тулгын хүү Т.Эрдэнэ нь өдгөө Б.Хурцын эхнэр Ү.Сарнаатай “Сарнайх” ХХК-ийг, Б.Хурцын бэр Э.Золзаяатай “Изинис эйрвэйз” ХХК-ийг хамтран эзэмшиж буй. Ноцтой нь, Б.Хурцын бэр Э.Золзаяа, Н.Тулгын хүү Т.Эрдэнэ хоёрын “Изинис эйрвэйз” ХХК нь Хөгжлийн банкнаас 22 тэрбум төгрөгийн зээл аваад эргүүлж төлөөгүй. Улмаар Хөгжлийн банкны хулгайн нээлттэй сонсголоор “Изинис эйрвэйз” ХХК нь Хөгжлийн банкнаас авсан мөнгөнөөсөө 1.0 тэрбум төгрөгийг “Бадрах-ойл” ХХК-д шилжүүлж, зориулалтын бусаар зарцуулсан болох нь ил болсон. Харин “Бадрах-ойл” ХХК-ийг Н.Тулга эзэмшиж байгаад хүү Т.Эрдэнэдээ шилжүүлсэн байдаг. Өөрөөр хэлбэл, Б.Хурц, Н.Тулга хоёр Хөгжлийн банкны хулгайн хамтрагчид болж таарч байгаа юм.
Цаашилбал, Н.Тулга 2017 онд “Хүннүжин-энх” ХХК, “Талын эрдэс” ХХК, “Наран бетон зуурмаг” ХХК тэргүүтэй компаниудыг эзэмшиж байгаад 2019 оноос хүү Т.Эрдэнэдээ шилжүүлж, өөрийгөө “цэвэрлэсэн”. Сонирхвол, “Хүннүжин-энх” ХХК нь 2011 онд Арцатын аманд 4.9 га газар авсан. Улмаар уг компани газартайгаа хамт 2018 онд “Номин”-гийн эзэн Ш.Энхбаярт шилжжээ. Ингээд өнөөх 4.9 га газар дээр нь “Гарден сити” хотхон баригдсан. “Наран бетон зуурмаг” ХХК нь нийслэлийн орон сууц, оффисын барилгууд, замын ажлуудыг цементээр хангадаг. Харин “Талын эрдэс” ХХК нь Дорнод аймгийн Халх гол сумын нутаг, Монгол-Хятадын хилийн бүсэд “Ширэн овоо” гэх төмрийн хүдрийн орд эзэмшдэг ажээ.
30 гаруй жил төрд, тэр тусмаа дипломат албанд зүтгэж, эх орондоо бараг л амьдраагүй шахуу Н.Тулга энэ хэмжээний хөрөнгийг хэрхэн цуглуулсныг хууль хяналтынхан шалгахад гэмгүй биз ээ.
Үргэлжлэл бий.
БИЕ НЬ ХАРЬД Ч, БИЗНЕС НЬ МОНГОЛД ЦЭЦЭГЛЭСЭЭР БУЙ ХАМГИЙН ХӨРӨНГӨЛӨГ ЭЛИТ ЭЛЧИН САЙДУУД-I |
|