ЭРГЭЛТ.МН МЭДЭЭЛЛИЙН САЙТЫН “ЭРЭН СУРВАЛЖЛАХ НЭГДЭЛ”-ЭЭС 1999 ОНООС ХОЙШИХ УЛААНБААТАР ХОТЫН ҮЕ ҮЕИЙН ЗАСАГ ДАРГА, ИТХ-ЫН ДАРГА, ЕРӨНХИЙ АРХИТЕКТОРУУД ҮГСЭН ХУЙВАЛДАЖ, НИЙСЛЭЛИЙН ГАЗРЫГ ЭРХ МЭДЭЛ, АЛБАН ТУШААЛАА УРВУУЛАН ӨӨРСДИЙНХӨӨ ХАМААРАЛ БҮХИЙ ЭТГЭЭДҮҮДЭД ХУУЛЬ БУСААР ОЛГОЖ, ОФФИС, ОРОН СУУЦНЫ ХОТХОН БАРИХ ЗАМААР ХАЛААСАА ТҮНТИЙЛГЭСЭН БАЙЖ БОЛЗОШГҮЙ БАРИМТУУДЫГ ЦУВРАЛААР ДЭЛГЭЖ БАЙНА.
Ардын намын булхайг А, Б-гүй илчилсэн алдарт “60 тэрбум”-ын бичлэгээр Ц.Сандуй хэмээх залуу олны танил, “од” болж байв. Түүнээс өмнө ч Ц.Сандуй барилгын бизнесийнхний дунд “Газрын Сандуй” хочоороо хэдийнэ танил болсон байсан юм билээ л дээ. Арга ч үгүй юм, Ц.Сандуй 1997 онд Ж.Наранцацралт агсныг Хотын дарга байх үед Нийслэлийн газрын албанд ахлах мэргэжилтнээр анх ажилд орсон. Ингээд 2001 онд М.Энхболдыг Хотын дарга байх үед Нийслэлийн газрын албаны Кадастрын хэлтсийн дарга, 2006 онд Ц.Батбаярыг Хотын дарга байх үед Нийслэлийн газрын албаны орлогч дарга, 2008 онд Т.Билэгтийг Хотын дарга байх үед Нийслэлийн газрын албаны даргаар тус тус ажиллаж байв. Товчхондоо, 2000 оноос хойш олгогдсон бүх газрын гэрчилгээ Ц.Сандуйгийн гарын үсэгтэй гээд хэлчихэд хилсдэхгүй.
Ц.Сандуй Г.Доржзодовт “тонгоруулсан” шигээ тийм ч гэнэн эр биш. Өөрийнхөө нэр дээр нэг ч бизнесгүй, төсвийн цалинтай төрийн албан хаагчийн дүрээр хөрөнгө орлогын мэдүүлгээ гаргаж ирсэн нэгэн. Харин Ц.Сандуйгийн бүх бизнесийг төрсөн дүү Ц.Сэргэлэн нь гардан хариуцдаг. Ингэхдээ дүү нь Монголбанкны Ерөнхийлөгч Б.Лхагвасүрэнгийн төрсөн дүү Б.Лхагвадоржтой бүх бизнесээ хамтран явуулдаг. Тодруулбал, Ц.Сэргэлэн, Б.Лхагвадорж хоёр “Их түмэн трэйвел” ХХК, “Элс партнерс” ХХК, “Нью сил” ХХК,“Сэлбэ партнерс” ХХК-уудыг хамтран эзэмшиж ирсэн. Дээрх дөрвөн компани нь ямар үйл ажиллагаа явуулж, ямар хөрөнгө эзэмшиж байгааг нь тус бүрчлэн танилцуулъя. 2000 оноос хойш Улаанбаатар хотыг газар олголтыг ганцаараа шахуу хариуцсан Ц.Сандуйгийн төрсөн дүү Ц.Сэргэлэн хотын хамгийн үнэтэй байршлуудад барилгуудтай, ресторан, баар цэнгээний газартай, тэр бүү хэл 18 давхар оффистой болсны цаана газрын наймааны мөнгө угаалт ч байж болзошгүй ажээ.
Замын цагдаагийн гүүрний урд доор байрлах, төв замын тэг голд баригдсан, түгжрэлийн гол зангилаа “Хоум плаза” барилгын Ц.Сандуйгийн эзэмшлийнх гэж олон жил ярьсан. Харин Ц.Сандуй “Минийх биш, надтай хамаагүй” гэж гүрийсээр өдий хүрсэн. Тэгвэл Ц.Сэргэлэн, Б.Лхагвадорж хоёрын “Элс партнерс” ХХК нь “Хоме плаза” барилгын II, IV дүгээр давхрыг бүхэлд нь эзэмшдэг бөгөөд “One Event Hall” нэртэйгээр хурим найр, хурал цуглаан, хүлээн авалтын заал хэлбэрээр ашигладаг. Харин Ц.Сэргэлэн, Б.Лхагвадорж хоёрын “Их түмэн трэйвэл” ХХК нь “Хоум плаза” барилгын зүүн жигүүрийн I дүгээр давхрыг эзэмшдэг бөгөөд “Минт” нэртэй баар ажиллуулдаг. Товчхондоо, “Хоум плаза” барилга Ц.Сандуйгийнх гэхэд хилсдэхгүй аж.
Тайлбар: Замын цагдаагийн гүүрний урд уулзварт байрлах Ц.Сандуй, Б.Лхагвасүрэн хоёрын дүү нарын эзэмшлийн "Хоум плаза"
Цаашилбал, Ц.Сэргэлэн, Б.Лхагвадорж хоёрын “Ньюсил” ХХК нь Сүхбаатар дүүргийн I хороо, Төв номын сангийн дэргэд байрлах “Mazzy” гэх зургаан давхар шилэн барилгын эзэмшдэг. Дотор нь 24 цагийн сүлжээ дэлгүүр, ресторан, паб бүгд бий.
Тайлбар: Төв номын сангийн урд байрлах Ц.Сэргэлэн, Б.Лхагвадорж хоёрын "Маззи" барилга
Хамгийн ноцтой нь, Ц.Сэргэлэн, Б.Лхагвадорж хоёрын “Сэлбэ партнерс” ХХК нь одоо Чингэлтэй Дүүргийн V хороо, Баянбүрдийн тойргоос Гэсэр сүм явах зам дагуу, Тасганы овооны зүүн доор “Тасган тауэр” гэх 16 давхар оффисын барилгыг барьж буй. Он гармагц бүрэн ашиглалтад оруулахаар төлөвлөжээ. “Тасган тауэр” барилга нь 31м2-74м2 хүртэлх өрөөний сонголттой нийт 400 оффисын өрөөтэй, хажуудаа долоон давхар авто зогсоолтой. Зөвхөн 31м2 талбайтай оффис нь л гэхэд 200 сая төгрөгөөр захиалгаа аваад эхэлчихсэн байна. Энэ үнээр дунджилж тооцож үзвэл 400 ширхэг оффисын өрөөг багадаа 200 тэрбум төгрөгөөр худалдана гэсэн үг юм. Бүхэл бүтэн 200 тэрбум төгрөгийн барилгыг Ц.Сэргэлэн, Д.Лхагвадорж хоёр хэрхэн санхүүжүүлж байгааг хууль хяналтынхан шалгахад илүүдэхгүй. М.Энхболд, Ц.Батбаяр, Т.Билэгт, Г.Мөнхбаяр нарын үед Нийслэлийн газрын албаны даргын сэнтийд дархлагдаж, оффшор данстай болтлоо хөрөнгөжсөн Ц.Сандуйгийн мөнгө угаалт ч байж болзошгүй гэж хардах бүрэн үндэслэлтэй.
ҮРГЭЛЖЛЭЛ БИЙ...
НИТХ-ЫН ДАРГА АСАН Ц.САНДУЙГИЙН ТӨРСӨН ДҮҮ Ц.СЭРГЭЛЭН, Б.ЛХАГВАСҮРЭНГИЙН ТӨРСӨН ДҮҮ Б.ЛХАГВАДОРЖ НАР ХАМТРАН “ТАСГАН ТАУЭР” ГЭХ 18 ДАВХАР ОФФИС БАРЬЖ БАЙНА |
|