Цагдаагийн ерөнхий газрын Хар тамхитай тэмцэх газраас 2020 оны нэгдүгээр сарын 12-нд гүйцэтгэх ажиллагаа явуулж, хар тамхи хэрэглэсэн бүлэг этгээдийг дайчлан баривчилсан байдаг. Тодруулбал, нийслэлийн Хан-Уул дүүргийн нутаг дэвсгэр “Viva city” хороолол орчимд байрлах нэр бүхий зочид буудлаас мансуурсан этгээдүүдийг саатуулж, хэргийн газраас метамфетамин буюу ”мөс” гэх мансууруулах, сэтгэцэд нөлөөт бодис, хар тамхи татах хэрэглэлүүдийг эд мөрийн баримтаар хураан авч байлаа. Баривчлагдсан этгээдүүдээс биологийн цус болон шээсний шинжилгээ авахад мансуурсан болох нь тогтоогдсон байдаг.

Хамгийн ноцтой нь, мансуурсан этгээдүүд дунд Эрүүл мэнд, спортын дэд сайд асан Т.Болдбаатарын охин Б байсан гэх. Тэрбээр өмнө нь хар тамхи, сэтгэц нөлөөт бодис хэрэглэсэн гэх үндэслэлээр цагдаагийн байгууллагад шалгагдаж байсан юм. Өөрөөр хэлбэл, 2020 онд давтан хэрэглэж, цагдаагийн албан хаагчдад баригдсан гэсэн үг. Тодруулбал, 2015 оны аравдугаар сард Т.Болдбаатарыг Эрүүл мэнд, спортын дэд сайдаар ажиллаж байхад түүний охин Б  хар тамхины 2-3 төрлийн бодис хэрэглэсэн нь тогтоогдсон хэмээн  цагдан хорьж, шалгаж байсан. Тухайн үед уг хэргийн талаах Эрүүгийн цагдаагийн газрын Хар тамхитай тэмцэх хэлтсийнхэн олон удаагийн үйлдэлтэй, өмнө нь ял шийтгэл эдэлж байсан хар тамхины бүлэглэлийг илрүүллээ хэмээн мэдээлж байсан билээ.

            Тэгвэл давтан хар тамхи хэрэглэж, бусдад борлуулдаг байж болзошгүй бүлэглэлийн хэрэг хэрхэн шийдэгдсэн гэдэг нь тодорхойгүй байна. Т.Болдбаатарын охин Б-ийн олон удаагийн хар тамхины хэрэг цагаадсан уу, шийдэгдсэн үү, замхарсан уу.