Гаалийн ерөнхий газрын дарга, бригадын генерал Р.Отгонжаргалын эгчтэй холбоотой мэдээлэл цахим сүлжээнд цацагдаад өнгөрдөг уламжлалтай. Арга хэмжээ авсан нь тодорхойгүй, аваагүй нь ч тодорхойгүй байсаар дарагддаг гэхэд хилсдэхгүй болов уу. Тодруулбал, Гаалийн ерөнхий газрын дарга Р.Отгонжаргалын эгч Р.Бурмаа, хүргэн ах Л.Өлзийбаяр нар Замын-Үүдэд “эзэн” сууж, гаалийн байцаагч шиг авирлаж, иргэдийн хилээр оруулж ирсэн ачаанд гаалийн бүрдүүлэлт хийх нэрээр мөнгө авдаг гэх мэдээлэл гардаг. Энэ тухай хэд хэдэн бичлэг, мэдээлэл цахим сүлжээнд цацагдаж байсан билээ. Хууль хяналтын байгууллагынхан гаалийн байцаагчийн ажлыг Р.Бурмаа, Л.Өлзийбаяр нар хууль бусаар хийж байгааг мэддэг ч мэдээгүй юм шиг өнгөрдөг. Иргэд өч төчнөөн гомдол, мэдээлэл гаргаж байсан ч шалгадаггүй өнөөдөрт хүрч байгаа гэх. Тэгвэл саяхан хууль хяналтын байгууллагад энэ хүмүүстэй холбоотой ноцтой баримт ирж, шалгалтын ажиллагааг эхлүүлэх гэж байгаа гэнэ.

Р.БУРМАА, Л.ӨЛЗИЙБАЯР НАР ГААЛИЙН БҮРДҮҮЛЭЛТ ХИЙЖ, ИРГЭДЭЭС ИХ ХЭМЖЭЭНИЙ МӨНГӨ АВДАГ

Энэ талаар эх сурвалжийн мэдээлснээр “Замын-Үүдийнхэн Р.Бурмаа, Л.Өлзийбаяр нарыг андахгүй. Олон жилийн өмнөөс л хилээр оруулж ирж байгаа ачаа бараанд гаалийн бүрдүүлэлт хийх нэрээр иргэдийг дарамталж мөнгө авдаг байсан гэнэ лээ. Угтаа иргэд гаалийн бүрдүүлэлтээ хийж, гаалийн байцаагч шалгаж, тулгах ёстой.

      Гэтэл Р.Бурмаа, Л.Өлзийбаяр нар хувийн боомт шиг авирлаж, “Биднээр гаалийн бүрдүүлэлтээ хийлгэж, мөнгө өг” гэдэг. Хэрэв иргэд өөрсдөө гаалийн бүрдүүлэлтээ хийвэл хууль хяналтын байгууллагад худал мэдээлэл өгч, иргэдийг шалгуулдаг. Жишээлбэл, өргөдөл бичих үйлчилгээ үзүүлдэг хүмүүс байлаа гэж бодъё. Үйлчлүүлэгчид өргөдөл бичдэг хүмүүсээр бичүүлэхгүй, өөрсдөө биччихвэл өргөдөл хүлээж авдаг газарт нь очоод “Наад өргөдөл чинь буруу байна. Наад хүн чинь энэ мэдээллийг нуун дарагдуулсан, үг, үсэг нь буруу, худал байна” гээд түмэн алдаа тоочиж, дахиж бичүүлэх, эсвэл шалгуулдагтай адилхан гэсэн үг. Өөрөөр хэлбэл, иргэд машиндаа “100 ширхэг буйдан, 100 ширхэг хогийн сав ачсан” гэж мэдүүлсэн байвал үүнийг нь үгүйсгэж, шалгуулдаг. Иргэд ийм хэл амнаас айсандаа Р.Бурмаа, Л.Өлзийбаяр нарт мөнгө өгч, бүрдүүлэлтээ хийлгэдэг юм билээ” гэсэн юм.

Р.ОТГОНЖАРГАЛЫГ ГЕГ-ЫН ДАРГААР ТОМИЛОГДСОНООС ХОЙШ ЭГЧ Р.БУРМАА, ХҮРГЭН АХ Л.ӨЛЗИЙБАЯРЫН БИЗНЕС “ЦЭЦЭГЛЭСЭН” ҮҮ

     Угтаа Р.Бурмаа, Л.Өлзийбаяр нар гаалийн бүрдүүлэлт хийж, иргэдээс мөнгө авдаг байжээ. Харин өнгөрсөн жилээс хойш утасны цаанаас ажлаа амжуулдаг болсон гэнэ. Учир нь, төрсөн дүү нь Гаалийн ерөнхий газрын даргаар томилогдсонтой холбоотой байж болзошгүй ажээ.

            Энэ талаар эх сурвалжийн өгсөн мэдээллээр “Замын-Үүдийн Гаалийн газрынхан ажлаа бардаггүй юм уу, эсвэл Р.Бурмаа, Л.Өлзийбаяр нарт “атгуулчихсан” юм уу, мэдэх юм алга. Олон жил л энэ хоёр хүнтэй үнэн, худал нь мэдэгдэхгүй мэдээлэл гардаг. Хууль хяналтын байгууллага нь шалгадаг ч үгүй, яадаг ч үгүй нь хоржоонтой. Одоо бүүр дүү нь мөнгө олдог газрын нь хамгийн том дарга нь болчихоор дийлдэхгүй болсон юм шиг байна лээ. Улаанбаатар хотоос утсаар яриад л “Наад машинаа гарга, наадхаа битгий шалга” гээд байж байдаг сурагтай. Гаалийн бүрдүүлэлтийг худал мэдүүлж, юу ачсан нь тодорхой олон машин хилээр орж байгаа болов уу гэхээс айдас төрж байна. Монголын ирээдүйг бүрхэг болгоход оролцож байна гэсэн үг шүү дээ. Тодруулбал, дурын буюу авлига, хахууль өгсөн өөрсдийнхөө машиныг ямар ч шалгалтгүй хилээр нэвтрүүлж байна гэнэ. Өдөрт гэхэд л хоёроос дээш, 100 тонноос илүү ачаатай машин шалгалтгүй орж байгаа гэдгийг иргэд ярьж байна. Үүнийг нь хууль хяналтын байгууллагынхан шалгаад тогтоох хэрэгтэй. Хэрэв энэ хардлага бол асуудлыг нэг талд нь гаргаж, иргэдэд зөв мэдээлэл өгөх ёстой” гэлээ.

“Р.БУРМАА ГААЛИЙН БАЙЦААГЧДЫГ “ХАХУУЛЬ АВСАН БАРИМТЫГ ЧИНЬ АТГ-Т ӨГНӨ ШҮҮ” ГЭЭД ЗАГНАДАГ ЮМ БИЛЭЭ”

       Иргэн Р.Бурмаа, Л.Өлзийбаяр нартай холбоотой хэд хэдэн бичлэг цахим сүлжээнд цацагдаж байсан гэдгийг бид дээр дурьдсан. Тэгвэл тус бичлэгийн сэтгэгдэл хэсэгт иргэд тэдний хууль бус баримтыг гэрэл зураг, бичлэгээр илчилж, сэтгэгдэл үлджээ.

Тухайлбал, иргэд “Биднийг жаахан байхад л улсын начны эхнэр Р.Бурмаа хоолны мөнгө өгөхгүй гээд хашхираад явж байдаг байсан. Гаалийн бүрдүүлэлтээ энэ хоёроор хийлгэхгүй бол дарамталж, цагдаагийн байгууллага болон бусад газарт гомдол гаргадаг. Энэ жудогийн Ө.Дүүрэнбаярын аав, ээж байна. Замын-Үүдэд хүн шантаачилж, мөнгө олдог гэж сонссон. Хүргэн нь улсын гарьд Бат-Эрдэнэ шүү дээ. Гаалийн байцаагчид энэ хоёроос айдаг юм билээ. “Наймаачдаас авсан авлигыг чинь АТГ-т баримттай нь өгнө шүү” гээд загнаж байхыг хоёр чихээрээ сонсож байлаа. Ингэж шантааж хийж амьдардаг хүмүүс байгаа юм” гэх зэргээр бичжээ.

Р.БУРМАА, Л.ӨЛЗИЙБАЯР НАР НЬ МУГТ Ө.ДҮҮРЭНБАЯРЫН ААВ, ЭЭЖ АЖЭЭ

        Иргэдийг шантаачилж, хахууль авдаг, гаалийн бүрдүүлэлт нэрээр их хэмжээний мөнгө нэхдэг зэрэг “хэрэг”-т нэр нь холбогдоод байгаа Р.Бурмаа, Л.Өлзийбаяр нар нь МУГТ Ө.Дүүрэнбаярын аав, ээж ажээ. Р.Бурмаа нь ГЕГ-ын дарга, бригадын генерал Р.Отгонжаргалын төрсөн дүү. Түүний дүү нь улсын заан Рэгжийбуугийн Давааням билээ.

Харин Л.Өлзийбаяр нь Архангай аймгийн Баян-Улаан сумын харьяат, олонд “тавхай” нэрээрээ алдаршсан, улсын заан Д.Лувсангийн хүү ажээ. Мөн Л.Өлзийбаяр нь өөрөө улсын начин цолтой гэнэ.

Хууль хяналтын байгууллага болон ГЕГ-ын дарга Р.Отгонжаргалд эгч, ахынхаа хууль бус ажиллагааг шалгах эрхийг үлдээе.

Үргэлжлэл бий.