-НАЙМАН НАСТАЙ Ж.СЭРЖМЯДАГ ОХИНЫГ АЛГА БОЛОХООС ЕСӨН САРЫН ӨМНӨ Г.ГАНТУЛГА ХОРИХООС СУЛЛАГДЖЭЭ-

        Дорноговьчууд айдастай байгаа. Учир нь, сургуульд явахаар гэрээсээ гарсан найман настай Д.Сэржмядаг охин сурагггүй алга болоод зургаан жил өнгөрлөө. Үүгээр зогсохгүй хэдхэн хоногийн өмнө Сайншандад сургуульд явахаар гэрээсээ гарсан 12 настай охин сураггүй алга болж, гурав хоногийн дараа цогцсыг нь олсон. Талийгаач охины хэрэгт Г.Гантулга гэх залууг саатуулан шалгаж байна.

Тодруулбал, Дорноговь аймгийн Сайншанд сумаас аравдугаар сарын 3-нд 12 настай охин сураггүй болсон. Охиныг эрлийн багийнхан гурав хоног хайж, цогцсыг нь олсон байдаг. Эрлийн багийнхан 12 настай охины цогцсыг Дорноговь аймгийн Мандах, Өмнөговь аймгийн Манлай сумын чиглэлээс олж, эрэн сурвалжлах ажиллагааг зогсоосон байдаг. Цагдаагийн байгууллагаас хэргийн газарт үзлэг хийж, 47 настай Г.Гантулгыг хойшлуулашгүй ажиллагаагаар цагдан хорьсон юм.

     Өөрөөр хэлбэл, Г.Гантулга гэгч этгээд нь 12 настай охиныг гэрийнх нь гаднаас машиндаа суулгаж, орон нутгийн чиглэлд авч яван хүчирхийлж, эцэст нь амийг нь хөнөөгөөд, газарт булсан гэх. Үүгээр ч зогсохгүй унаж явсан автомашиныхаа өнгийг будаж, эд мөрийн баримтаа устгасан. Охиныг булсан газраа олохгүй хугацаа алдсан гээд уг хэрэгт хүний санаанд багтамгүй олон эргэлзээ бий. Тэгвэл 12 настай охиныг хөнөөсөн Г.Гантулгыг Замын-Үүд сумаас зургаан жилийн өмнө алга болсон Д.Сэржмядаг охины хэрэгт шалгаж эхэлжээ. Цагдаагийн албан хаагчид маш ноцтой сэжүүрийг илрүүлж, шалгаж эхэлсэн талаар эх сурвалж мэдээлэв.

Тодруулбал, Дорноговь аймгийн Замын-Үүд суманд найман настай Д.Сэржмядаг охин 2017 оны арваннэгдүгээр сарын 2-ны өдөр хичээлдээ явахаар гараад сураггүй алга болсон билээ. Д.Сэржмядаг охин хамгийн сүүлд алга болдог өдрийнхөө 12:30 цагийн орчимд ээжийнхээ утас руу дөрвөн удаа залгасан боловч ээжийнх нь утасны цэнэг нь дуусч байсан учраас авч чадаагүй байдаг. Хэсэг хугацааны дараа ээж нь охин руугаа залгахад охины утас холбогдохгүй болсон байсан.

Охиныг алга болсныг ар гэр нь мэдсэн даруйдаа орон нутгийнхаа цагдаад өргөдөл гаргаж, тухайн өдрийн 18.00 цагаас хойш 200 гаруй хүн, цагдаагийн алба хаагч хүч нэмэгдүүлсэн самналт хийсэн боловч олоогүй юм. Охин Замын-Үүд сумын хоёрдугаар сургуулийн 3а ангид суралцдаг байсан бөгөөд тухайн өдөр сургууль дээрээ огт очоогүй, сураггүй алга болсон билээ. Охиныг хамгийн сүүлд гэрээсээ гараад сургууль руугаа явж байхыг хөрш айлынх нь хүүхэд харсан байдаг. Охин сураггүй алга болоод зургаан жил боллоо.

ДОРНОГОВЬ АЙМГААС АЛГА БОЛСОН ХОЁР ОХИНЫ ХЭРЭГТ СЭЖИГЛЭГДЭЖ БАЙГАА Г.ГАНТУЛГА ГЭЖ ХЭН БЭ

     Зургаан жилийн дараа сэжүүр гарч, Г.Гантулгыг шалгаж эхэлжээ.

   Дорноговь аймгаас алга болсон хоёр ч охины хэрэгт саатуулагдсан шалгагдаж байгаа Г.Гантулга нь1976 онд Улаанбаатар хотод төрсөн, 47 настай. Баянзүрх дүүрэгт оршин суух хаягтай, эрхэлсэн тодорхой ажилгүй нэгэн. Ганбаатарын Гантулга гэгч нь 19 настайгаасаа гэмт хэрэг үйлдэж, хорихоос удаа удаа оргож байсан. Зургаан удаагийн хэргээр ял шийтгэл эдэлж байсан. Тодруулбал, Г.Гантулга нь 19 настайдаа буюу 1995 онд хулгайлах гэмт хэрэг үйлдэж, зургаан сарын ял сонсож байжээ. Үүнээс хойш гурван жилийн дараа буюу 1998 онд насанд хүрээгүй хүүхдийг хүчиндэх, хулгайлах, дээрэмдэх гэмт хэргүүдийг үйлдэж 12 жилийн хорих ял сонсож байжээ. Дараа нь, 1999 онд ял эдэлж байхдаа хорих ангиас оргож, хулгайлах гэмт хэрэг давтан үйлджээ. Ингээд хууль хяналтын байгууллагаас хоригдол Г.Ганхуягт 2.3 жилийн хорих ял нэмж оноосон байна. Тэрбээр хорих ангид байхдаа хоёр ч удаа оргож байжээ. Хүүхэд хулгайлах, хүчиндэх гэмт хэрэг үйлдэж, хоригдож байхдаа 2009 онд мөн оргож, зургаан жилийн хорих ялаар шийтгүүлсэн байна. Үүгээр зогсохгүй 2014 онд гар утас худалдааны төвд танхайрч, олон тооны утас хулгайлсан хэрэгт зургаан жилийн хорих ял сонсож байжээ. Ингээд 2016 оын есдүгээр сард Төв аймгийн Баян сум дахь Хорих 415 дугаар ангиас сайн засарч хүмүүжсэн гэх магадлангаар суллагдсан байдаг.

Г.ГАНТУЛГА ЗУРГААН ЖИЛИЙН ӨМНӨ ЗАМЫН-ҮҮД СУМ РУУ НЭВТЭРСЭН ХЭД ХЭДЭН СЭЖҮҮР ОЛДЖЭЭ

      Тэгвэл Ж.Сэржмядаг охиныг алга болохоос есөн сарын өмнө Г.Гантулга хорих ангиас суллагджээ. Суллагдсанаасаа хойш хэд хэдэн удаа Замын-Үүд сум руу нэвтэрсэн байж болзошгүй нөхцөл байдал илрээд байгаа гэнэ.

Г.Гантулга нь 1997 онд цэвэр ус ашиглалтын гэрээ хийх нэрийдлээр айлуудаар орж, гэмт хэрэг үйлддэг байсан гэх. Эх сурвалжийн бидэнд өгсөн мэдээллээр “Г.Гантулга гэмт хэрэг үйлдэхдээ сайтар судалж, тооцоолол хийдэг байсан гэдгийг баривчилж байсан цагдаа нь ярьсан байна лээ. Тэр бол засрашгүй гэмт хэрэгтэн. Долоон жилийн өмнө хорихоос суллагдсан даруйдаа Замын-Үүд сум руу явж, Д.Сэржмядаг охиныг ар гэрийг судалсан байж болзошгүй. Сая Дорноговь аймагт аймшигт хэрэг үйлдэхдээ мөн л судалгааг сайтар хийсэн гэсэн. Охины ар гэрийг судалж, олон өдөр таксинд явсан байна гэнэ лээ. Тэгээд охиныг таксинд суудаг газраас нь авч яваад, хүчирхийлээд хөнөөчихсөн” гэв.

Д.СЭРЖМЯДАГ ОХИНЫ ЭЭЖ Б.ХОРОЛМАА: Охиноо Өвөрмонгол айлд мал маллаж байж магадгүй гэж боддог

       Д.Сэржмядаг охины ээж Б.Хоролмаа охиныхоо талаар хамгийн сүүлд манай сайтад дараах ярилцлагыг өгсөн байдаг. Тэрбээр “Эрэн сурвалжлах ажиллагаа үргэлжилж, интерполоор хайж байгаа гэсэн.  Гаднын улс орны цагдаагийн газар руу охины минь зургийг явуулж, хайж байгаа юм билээ. Гэхдээ охиныг минь хайх ажлын хэсэг олон удаа солигдсон. Өнгөрсөн хугацаанд Эрээний цагдаа нар манай цагдаа нартай хамтарч ажилласан. Тэгэхдээ “Хилээр гарсан ул мөр байхгүй” гэх мэдээллийг бидэнд өгсөн. Бид байдгаа бараад л сууж байна. Лам, бөө, үздэг, мэргэлдэг хүн дээр очихоос өөрийг хийж чадахгүй юм. Өнгөрсөн хугацаанд маш олон хүнд үзүүлсэн. Бидэнд очиж үзүүлээгүй лам, бөө гэж бараг байхгүй. Тэд ихэнх нь “Амьд байна, хилээр гарчихсан байна, автомашинаар мөргөчихөөд аваад явсан байна” гэж хэлдэг. Хамгийн сүүлд өнгөрсөн наймдугаар сард зурхайч, ламд очиж үзүүлсэн. Гэтэл охиныг минь “Хилийн цаана амьд байна. Эргэж ирнэ. Гэхдээ хугацаа нь болоогүй байна” гэсэн. Түүнийг сонсоод их баярлаж, охин минь ороод ирэх юм шиг итгэл найдвар төрж байгаа. Гэхдээ үхэн үхтлээ охиноо хүлээх байхдаа хэмээн урам хугарах үе ч байна. Хэрвээ охин минь амьд бол хаана байгаагаа, юу хийхээ мэдэхгүй айж, сандраад биднийгээ ямар их санаж байгаа бол гэхээс зүрх, сэтгэл урагдах шиг болдог. Бидэнд охинтойгоо уулзана гэх маш их итгэл найдвар байгаа учраас Монголын цагдаа нар сайн, нягталж шалгаад, эрж хайгаад охиныг минь олоод өгөөч гэж гуйж байна. Охиныгоо Өвөрмонгол айлд мал маллаж байж магадгүй гэж боддог. Өвөрмонголын цагдаагийн газар хандаж, охиноо хайна гэж бодож байгаа. Мэдээж биднийг охиноо хайх явцад хүндрэлтэй зүйл их тохиолдох байх. Охин минь ч том болж, өөрчлөгдсөн байх болов уу. Гэхдээ ээж нь юм чинь охиноо танилгүй яах вэ дээ” гэсэн юм.