Увс аймгийн цагдаагийн газрын дарга А.Амарбаттай холбоотой мэдээлэл цахим сүлжээнд цацагдаад байна. Тодруулбал, А.Амарбат дарга эрх мэдэл, албан тушаалын байдлаа урвуулан ашиглаж, цагдаагийн албан хаагчаа дарамталж, зам тээврийн ноцтой осол гаргахад нөлөөлсөн байж болзошгүй гэх.

Цахим сүлжээнд “Увс аймгийн Хяргас нуурын хөвөөнд байрлах цагдаагийн постонд үүрэг гүйцэтгэж байсан албан хаагч согтуу жолоочийг зогсоожээ. Гэтэл Увс аймгийн цагдаагийн газрын дарга А.Амарбат согтуу жолоочийг зогсоож, шалгасан албан хаагчаа дарамталж, нөгөө жолоочоо суллаж явуулах үүрэг өгсөн байгаа юм. Согтуу жолооч нь Хяргасаас Увс чиглэлд явж байгаад зам тээврийн осол гаргаж, амиа алджээ. Мөн зорчигчид нь гэмтэж, амиа алдсан байгаа юм. Хэрэв А.Амарбаттай дарга эрх мэдэл, албан тушаалын байдлаа урвуулан ашиглаагүй, цагдаагийн албан хаагч үүргээ биелүүлсэн бол ийм асуудал гарах байсан уу. Энэ асуудлыг прокурорын байгууллагаас шалгахгүй байгаа гэнэ. Зөвхөн нас барсан жолоочийг шалгаж байгаа гэнэ” гэжээ.

       Өөр нэг эх сурвалжийн мэдээлснээр “Зам тээврийн осол гаргаж, амиа алдсан жолооч нь Увс аймгийн цагдаагийн газрын дарга А.Амарбатын эгчийнх нь нөхөр, хүргэн ах нь байсан. Уг харамсалтай зам тээврийн осол өнгөрсөн зун Увс аймгийн замд гарсан” гэлээ.

Тэгвэл бид мэдээллийг тэнцвэртэй хүргэх үүднээс Увс аймгийн цагдаагийн газрын дарга А.Амарбаттай холбогдож, тодрууллаа.

-Таны хүргэн ах өнгөрсөн зун зам тээврийн осолд орж, амиа алдсан уу?

         -Тийм ээ, хүргэн ах минь амиа алдаад дөрвөн сар ч хүрээгүй байна. Эхнэр, хүүхэд нь хэцүү байдалтай байна.

-Талийгаач тухайн үед согтуу байсан. Осолд орохоосоо өмнө цагдаагийн албан хаагчид баригдсан. Тэгээд тань руу ярьж, цагдаад баригдлаа гэдгээ хэлсэн. Таныг ахыгаа зогсоосон албан хаагч руу залгаад явуул гэсэн чиглэл өгсөн гэдэг мэдээлэл гарчээ. Энэ талаар тодруулж болох уу?

       -Энэ асуудлаар би шууд мэдээлэл өгөх боломжгүй байна. Хэргийн материал нь шалгагдаад, прокурорын хяналтад байгаа. Хоёрдугаарт, Хэвлэл мэдээллийн төв манай ажиллагаатай холбоотой мэдээллийг өгнө. Гэхдээ энэ асуудлыг хардлага, сэрдлэгээр гаргаж ирж байгаа юм шиг байна лээ. Би төрийн тусгай алба хаадаг учраас албан хаагчаа дарамтлахгүй. Тэгж утсаар ярьж, ахыг минь явуул гэсэн үүрэг өгөөгүй. Үнэн зөв нь тогтоогдох байлгүй дээ.

-Талийгаач тухайн үед согтуу явсан нь үнэн юм уу?

         -Согтууруулах ундааны зүйл хэрэглэсэн эсэх нь нотлох баримтаар авагдсан байгаа. Энэ мэдээллийг прокурорын зөвшөөрлөөр өгнө шүү дээ.