ХОТЫН ДАРГА АСАН Ц.БАТБАЯР, НӨХГ-ЫН ДАРГА Ч.САЙХАНБАЯР ХОЁРЫН АТГ-Т ДУУДАГДСАН ШАЛТГААН ЮУ ВЭ

Ц. АМУНДРА:
Эрэн сурвалжлах

2023-11-02, 1970

Хотын дарга Х.Нямбаатар өөрөөсөө өмнөх үе үеийн Хотын дарга нарын автобусны шахаа, газрын наймаатай холбоотой материалуудыг хар хавтсанд хийгээд АТГ-т шалгуулахаар аваачаад өгчихсөн. АТГ-ынхан эхлээд Хотын дарга асан М.Энхболдыг дуудаж байцаалт авсан. Араас нь Хотын дарга асан Ц.Батбаярыг Нийслэлийн тээврийн газрын дарга асан Г.Сайханбаяртай хамт баривчлав. Зүй тогтлыг нь харвал, үе үеийн Хотын дарга асангууд хамтрагчдаа "хөтлөөд" ар араасаа АТГ-ын зүг цуврах нь бололтой.

Ц.Батбаяр, Ч.Сайханбаяр хоёрын хоршил хамтрал эртнийх. Ц.Батбаяр Багахангай дүүрэгт 15 жил засаглахад Ч.Сайханбаяр хамтрагч нь байсан. Улмаар 2005 онд Ц.Батбаяр Хотын дарга болохдоо Ч.Сайханбаярыг Нийслэлийн тээврийн газрын даргаараа дэргэдээ ажиллуулж байв. Дараа нь, 2008 онд Ц.Батбаяр УИХ-ын гишүүн сонгогдож, харин Ч.Сайханбаяр Сонгинохайрхан дүүргийн Засаг даргаар томилогдож байлаа.

Ч.Сайханбаярын хувьд, Сонгинохайрхан дүүргийн Засаг дарга болохын тулд гадаадад ОХУ-ын Моксвагийн Замын дээд сургууль, дотоодод Төрийн захиргаа, удирдлагын институт буюу одоогийн Удирдлагын академийг төгссөн гэх хоёр хуурамч диплом үйлдсэн нь 2009 онд ил болж, хэсэгтээ л хэвлэлээр гол баатар болж байв. Ч.Сайханбаяр ОХУ-д сургууль төгсөөгүй, харин ОХУ-аар дамжуулж Польшоос автомашинтай зөөдөг ажил хийдэг байсан юм билээ. Хуурамч дипломтойг нь ийнхүү АТГ-аас шалгаад тогтоосон учраас Засаг даргын албан тушаалаасаа ч чөлөөлөгдсөн. Гэвч Улаанбаатар бизнес хөгжлийн төвийн дарга болж, дараа нь Нийслэлийн нийтийн тээврийн газрын даргаар дахин томилогдож, хамгийн сүүлд 2022 онд Нийслэлийн өмчийн харилцааны газрын даргаар сэлгэн томилогдсон нэгэн.

Харин Ц.Батбаярын хувьд, 2014 онд хувьчлалын хулгайн хэрэг нь сөхөгдөж ял сонссон. Тодруулбал, Ерөнхийлөгч асан Н.Энхбаярт "Улаанбаатар таймс" сонин, "Өргөө" зочид буудлыг хувьчилж өгсөн хэрэгтээ 2.1 жилийн ял сонссон. Чанга дэглэмтэй хорих ангид жил гаруй хоригдоод 2015 оны сүүлээр магадлангаар суллагдсан. Харин өчигдөр АТГ-т дахин саатуулагдлаа. Тэдний намтар товчхондоо ийм.

Тэгвэл АТГ-аас “Хотын дарга асан Ц.Батбаярыг автобусны шахаатай холбоотой хэрэгт шалгаж эхэлсэн” гэх тайлбар хийсэн. Судлаад үзвэл, Ц.Батбаярт АТГ-т шалгагдах автобустай холбоотой асуудлууд олон бий ажээ.

АТГ-т шалгагдаж буй 2009 оны 400 автобусны “автор” нь Ц.Батбаяр байсан уу

Ц.Батбаяр 2007 онд Хотын даргаас бууж, 2008 онд Ц.Батбаяр УИХ-ын гишүүн болсон. Ингээд 2008 оны намар 2009 оны төсвийг хэлэлцэж эхлэх үеэр Ц.Батбаяр М.Энхболдын “даалгавар”-аар нийслэлийн нийтийн тээвэрт автобус худалдаж авах саналаа дахин гаргаж, 10 тэрбум төгрөг төсөвт суулгуулахаар зүтгүүлж байв. Гэтэл аз болж яг тэр үед буюу 2008 оны арваннэгдүгээр сарын 5-нд Ерөнхий сайд С.Баяр нийслэлийн нийтийн тээвэрт 400 автобусаар парк шинэчлэлт хийхийг ЗТ-ийн сайд Х.Баттулгад, шаардагдах 38.7 тэрбум төгрөгийг 2009 оны төсөвт тусгуулахыг Сангийн сайд С.Баярцогтод даалгасан 27 дугаартай тогтоол гаргасан. Ингэж “10 тэрбумыг өгөөч, автобус авъя” гээд сууж байсан Ц.Батбаярт С.Баярын энэ тогтоол дэмжлэг болж, улмаар Ц.Батбаяр, С.Баярцогт хоёр 2009 оны төсөвт 38.4 тэрбум төгрөг суулгах “лобби”-г хамтран гүйцэтгэсэн аж.

Түүгээр зогсохгүй, Ц.Батбаяр БНСУ-аас 38.7 тэрбум төгрөгөөр 400 автобус худалдаж авах ажиллагаанд Х.Баттулгатай хоршсон, 400 автобус орж ирснийх нь дараа хувь, хувьсгалын 10 компани хуваарилж тараах ажиллагаанд ч голлон оролцсон гэх. Эргэн шүүж үзвэл, Ц.Батбаяр 2012 оны УИХ-ын сонгуулийн үеэр “400 автобусны парк шинэчлэлтийг би хийсэн” гэх агуулгатай ярилцлага өгч, нийтлэлүүдийг хэвлэлүүдээр цацуулж, өөрийгөө сурталчилж байжээ.

Баабар.мн 2012.06.11

Зиндаа.мн 2012.06.26

Товчхондоо, Ц.Батбаяр 2012 онд “400 автобус оруулж ирсэн хүн нь би” гэж ярьж явжээ. Тэгэхээр өдгөө АТГ-ынханд баривчлагдаад буйн эхний шалтгаан нь 400 автобусны хэрэг байж болзошгүй ажээ.

Ц.Батбаярын “Сити баз консалтинг” ХХК-ийн “явуулын кондуктор”-ууд 2017-2020 онд НТГ-аас 17.1 тэрбум төгрөг авчээ

Хотын дарга асан Ц.Батбаярын “Улаанбаатар капитал санхүүгийн групп” ХХК-ийн харьяанд “Сити баз консалтинг” ХХК гэх охин компани бий. Өдгөө “Сити баз консалтинг” ХХК-ийн Ерөнхий захирлаар Ц.Батбаярын эхнэр М.Мөнхдэлгэр нь ажилладаг. М.Мөнхдэлгэр 2021 он хүртэл Нийслэлийн Эрүүл мэндийн газрын Эмнэлгийн тусламжийн хэлтсийн даргаар ажиллаж байсан нэгэн. Харин “Сити баз консалтинг” ХХК-ийн Гүйцэтгэх захирлаар нь Ш.Энхсайхан гэгч ажилладаг. Ш.Энхсайханы хувьд, Ц.Батбаярыг Хотын дарга байх үед Налайх дүүргийн Засаг даргаар ажиллаж байсан, хуучны хамтрагч, багын найз нь.

Ноцтой нь, “Сити баз консалтинг” ХХК нь 2017 онд Нийслэлийн нийтийн тээврийн газартай “Төлбөр төлөлтийг хянах шалгагч ажиллуулах гэрээ”-г байгуулсан. Ингээд “Сити баз консалтинг” ХХК-ийн “шалгагч” гэх үнэмлэх зүүсэн 340 гаруй ажилчин автобусны буудлууд дээр зогсож иргэд картаа уншуулж байгаа эсэхийг хянадаг болсон. Өөрөөр бол, өмнө нь иргэдийн мөнгийг кондукторууд хурааж авдаг байсан бол 2017 оноос карт уншуулж зорчдог болсноор “Сити баз консалтинг” ХХК-ийн шалгагч нар автобусны буудлууд дээр кондукторын үүрэг гүйцэтгэж эхэлсэн гэсэн үг. Ингэж ажилчдаа шалгагч нэрээр автобусны буудлууд дээр зогсоосныхоо төлбөрт Ц.Батбаярын“Сити баз консалтинг” ХХК нь 2017-2022 оны хооронд Нийслэлийн нийтийн тээврийн газраас 17.1 тэрбум төгрөгийн санхүүжилт авсан байдаг. Өөрөөр хэлбэл, жил тутам 3-4 тэрбум төгрөг авдаг байсан гэсэн үг. Энэ бол Ц.Батбаярын АТГ-т шалгагдах дараагийн том шалтгаан.

Ц.Батбаярын "Сити баз консалтинг" ХХК-ийн шалгагч нар

Ц.Батбаяр “Сити баз консалтинг” ХХК-аараа “Эрдэнэс тавантолгой” ХК-ийн ажилчдыг зөөж, Б.Ганхуягаас жилд 800-900 сая төгрөг авч байжээ

Хотын дарга асан Ц.Батбаяр “Сити баз консалтинг” ХХК-аараа өдгөө “нүүрсний хулгай”-н хэргээр хоригдож буй Б.Ганхуягтай гэрээлж, “Эрдэнэс тавантолгой” ХК-ийн ажилчдад автобусаар үйлчилдэг байжээ. Жишээ нь, Ц.Батбаярын эхнэр, “Сити баз консалтинг” ХХК-ийн Ерөнхий захирал М.Мөнхдэлгэр болон “Эрдэнэс тавантолгой” ХК-ийн Гүйцэтгэх захирал асан Б.Ганхуяг хоёрын 2022 оны дөрөвдүгээр сарын 22-нд байгуулсан 828 сая төгрөгийн үнийн дүнтэй “Зорчигч тээврийн үйлчилгээ үзүүлэх гэрээ” баримтаар хавсаргая. Энэ гэрээгээр Ц.Батбаярын “Сити баз консалтинг” ХХК нь “Эрдэнэс тавантолгой” ХК-ийн ээлжийн ажилчдыг том болон дунд оврын 15 автобусаар Улаанбаатар хот-Өмнөговь аймгийн Цогтцэций суманд байх “Эрдэнэс тавантолгой” ХК-ийн кемп хооронд зөөдөг байсан аж.

Түүгээр зогсохгүй, Б.Ганхуяг Ц.Батбаяраас сар бүр хоёр автобус жолоочтой нь түрээсэлж, “Эрдэнэс тавантолгой” ХК-ийнхаа ажилчдыг өглөө, оройдоо уурхай руугаа зөөдөг байсан. Сонирхуулахад, Ц.Батбаярын “Эрдэнэс тавантолгой” ХК-д үйлчилдэг автобуснууд нь Япон, Солонгост үйлдвэрлэгдсэн, хамгийн сүүлийн үеийн тоноглолтой аж.

Ц.Батбаяр Б.Ганхуягт автобусаар үйлчилснийхээ хариуд “Эрдэнэс тавантолгой” ХК-аас “Улаанбаатар тээвэр” ХХК-аараа нүүрс зөөдөг байжээ

Ц.Батбаяр “Эрдэнэс тавантолгой” ХК-ийн ажилчдад автобусаар үйлчилж, Б.Ганхуягаас жилд тэрбум орчим төгрөг авдаг байсан ч үүндээ ханаагүй бололтой. Тодруулбал, Ц.Батбаяр 2018 онд өөрийн “Улаанбаатар капитал санхүүгийн групп” ХХК-ийн харьяанд “Улаанбаатар тээвэр” ХХК-ийг БНХАУ-ын “Хай Ган Шин Фэн”, “Чунчиү эрчим хүч” компаниудтай хамтран байгуулжээ. Өдгөө “Улаанбаатар тээвэр” ХХК-ийн Гүйцэтгэх захирлаар Ц.Батбаярын охин Б.Сэлэнгэ нь ажилладаг аж.

Хамгийн ноцтой нь, Ц.Батбаярын “Улаанбаатар тээвэр” ХХК нь 2018 оноос хойш жил бүр Б.Ганхуягтай гэрээ байгуулж, “Эрдэнэс тавантолгой” ХК-ийн Тавантолгойн уурхайгаас БНХАУ-ын Ганц мод боомт хүртэл нүүрс тээвэрлэж иржээ. Өөрөөр бол, Ц.Батбаяр “Эрдэнэс тавантолгой” ХК-ийн ажилчдыг ч, нүүрсийг нь ч зөөж иржээ.

Ц.Батбаярын Хотын дарга байхдаа хувьдаа авсан газар, барьж худалдсан хотхон, хорооллуудыг нь АТГ шалгах ёстой

Хотын дарга асан Ц.Батбаярт автобуснаас гадна АТГ-т шалгуулах ёстой хотын газрыг худалдаж хөгжсөн асуудлууд ч бий. Тухайлбал, Ц.Батбаяр Хотын дарга байхдаа төрсөн дүү Ц.Бат-Эрдэнийнхээ нэр дээр “Ганьт” ХХК-ийг байгуулж, улмаар “Ганьт” ХХК-даа аль ашигтай гэсэн байршлуудад газар олгож, орон сууц бариулж худалдсан. Жишээ нь, “Ганьт” ХХК нь олны мэдэхээр “Модны 2” автобусны буудлын ард таван блок, 500 айлын “Саруул дэнж” гэх хотхоныг барьж худалдсан. Хотын төвд, “Peaсe mall” худалдааны төвийн ард орон сууц барьж худалдсан, Их дэлгүүрийн зүүн хойно бас нэг орон сууцны барилга бий.

Эцэст нь, илүү ноцтой нэг баримт байгаа нь, Ц.Батбаяр төрсөн дүү Ц.Ганцэцэгийнхээ нэр дээр “Бумбын шовх” ХХК-ийг эзэмшдэг байсан. 2008 онд Ц.Батбаяр УИХ-ын гишүүн болмогцоо “Бумбын шовх” ХХК-даа Хотын дарга Т.Билэгтээр Төв цэнгэлдэх хүрээлэнгийн зүүн хойно 1.8 га газар олгуулж, хав дарсан. Ингээд Ц.Батбаяр саяхан “Бумбын шовх” ХХК-аа “А” зэрэглэлийн 1.8 га газартай нь хамт “М-Ойл групп”-ын эзэн Р.Батбаяр, Б.Пунсалмаа болон “Таванбогд”-ын эзэн Ц.Баатарсайханы төрсөн дүү “Од групп”-ын эзэн Ц.Отгонбаатар нарын дундын “Глобал бридж констракшн” ХХК-д шилжүүлсэн. Төв цэнгэлдэх хүрээлэнгийн зүүн хойно, БНСУ-ын Элчин сайдын яамны баруун талд байрлах өнөөх 1.8 га газар дээр нь “Глобал таун” гэх тансаг зэрэглэлийн дөрвөн блок 22 давхар барилгууд босож буй. Энэ мэтээр хөөвөл Хотын дарга асан Ц.Батбаяр АТГ-т асар удаан ээрэгдэх нь бололтой.

ХОТЫН ДАРГА АСАН Ц.БАТБАЯР, НӨХГ-ЫН ДАРГА Ч.САЙХАНБАЯР ХОЁРЫН АТГ-Т ДУУДАГДСАН ШАЛТГААН ЮУ ВЭ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 12

Сэтгэгдэл үлдээсэн: 2023-12-27 00:13:18

Нийслэлийн Өмчийн Харилцааны газар: НӨХГ эвгүй дээ,тэнд нэг нэг барилгын компанийн эрх ашгийг хамгаалсан, нийслэлийн өмчийг улсад авахгүй барилгын компаниудад зүгээр эзэмшүүлж буй бүлэг сүрэг сууж байгаа
Сэтгэгдэл үлдээсэн: 2023-11-03 15:07:07

гайхашрагч: НҮХЭН ГАРЦЫГ ТЕНДЕРТ" ЯЛСАН" ХУЛХИ КОМПАНИ БАРЬСАН МЕТРООГ ГАДААДЫН МЕТРО БАРЬЖ МЭРГЭШСЭН КОМПАНИ БАРИХ БИЗ. БИТГИЙ САЙН ЮМАНД САДАА ХИЙ. ТАМЫН ҮЛГЭР ШИГ МОНГОЛЫН ЧАНДАГ ТОГООНД ХАРГАЛЗАГЧ БАЙХГҮ байсан яагаад ГЭВЭЛ ҮХЭР МОНГОЛЧУУД БИЕБИЕНЭЭ ДООШ НЬ ТАТААД ДЭЭШЭЭ ГАРЧ ЗУГТАХ БОЛОМЖ ОЛГОДГҮЙ ГЭНЭ ЛЭЭ
Сэтгэгдэл үлдээсэн: 2023-11-03 14:52:12

ард: Цаазын ялыг сэргээ тэгвэл идэж уухаа больж шудрага болноо Элбэгдорж нэг гайтай амьтан бнаа
Сэтгэгдэл үлдээсэн: 2023-11-02 18:59:42

До: Нартуул захын төмөр замын уулзварыг 20 ьэрбум төгрөгний нэмэлт төсвийг их хуралаар оруулж улаан энхболп нар хувааж идсэн яг барихдаа 2 тэрбум хурэхгуй мөнгөөр бариулаад дуусагсан ыас элэг хөтөлыөр ба маш их мөнгө шаасан паа ми энхболд эд нар батбаяр ухах юм бол ч маш их юм гарнаах
Сэтгэгдэл үлдээсэн: 2023-11-02 18:59:41

До: Нартуул захын төмөр замын уулзварыг 20 ьэрбум төгрөгний нэмэлт төсвийг их хуралаар оруулж улаан энхболп нар хувааж идсэн яг барихдаа 2 тэрбум хурэхгуй мөнгөөр бариулаад дуусагсан ыас элэг хөтөлыөр ба маш их мөнгө шаасан паа ми энхболд эд нар батбаяр ухах юм бол ч маш их юм гарнаах
Сэтгэгдэл үлдээсэн: 2023-11-02 16:54:01

Шударга: Мангар царайлчихаад бас айхтар золиг байна хөөе.
Сэтгэгдэл үлдээсэн: 2023-11-02 14:03:59

Зочин: Хулгай хиисэн нь нотолгоотой юм бол Ард түмнии шүүхэээр цааш нь харуулчих хэрэгтэй
Сэтгэгдэл үлдээсэн: 2023-11-02 12:45:07

S: SEKSY TANILTSI80955877
Сэтгэгдэл үлдээсэн: 2023-11-02 12:43:58

S: SEXSDN80955877 45DESH XALYYTSTLAA
Сэтгэгдэл үлдээсэн: 2023-11-02 10:30:12

Хөгийн новш : Алим чинь ёстой нууц ноёнтон байсан байна. Сайн шалгаарай ингэхээр энэ хот чинь хүн болгон лчихыг хүсдэг газар мөн байх нээ.
Сэтгэгдэл үлдээсэн: 2023-11-02 10:15:38

иргэн: албан тушаалаа ашиглан нилээд дураараа загнасан байна даа.
Сэтгэгдэл үлдээсэн: 2023-11-02 10:14:39

улаан: овоо том гар болжээ багахангайд байх үеэс тасарсан баян болж