“Асуудал” үүсгэсэн Өмнөговь аймгийн Засаг даргын орлогч нарыг чөлөөлөхөөр болсон гэв үү. Тодруулбал, тус аймгийн Засаг дарга Р.Сэддорж УИХ-ын гишүүн Д.Бат-Эрдэнийн “захиалга”-аар Уул уурхай, дэд бүтэц, хөдөө аж ахуй, байгаль орчны асуудал хариуцсан орлогч дарга Н.Энхбат, Эдийн засаг, нийгмийн асуудал хариуцсан орлогч дарга Ч.Баяржаргал нарыг чөлөөлөхөөр болсон тухай бор шувуу нисэж эхэллээ. Үүгээр ч зогсохгүй орлогчийн орон тоог цөөлж, нэг орлогчтой байхаар болсон гэнэ. Учир нь, Төрийн хэмнэлтийн хуулийн дагуу аймгийн данхайсан бүтцийг цөөлж, орон тооны нэг л орлогчтой байхаар болжээ.

       Энэ талаар эх сурвалж мэдээлэхдээ “Хэдхэн хоногийн өмнө Засаг дарга Р.Сэддорж Улаанбаатар хотод ажилласан юм билээ. Ингэхдээ УИХ-ын гишүүн Д.Бат-эрдэнэтэй уулзаж, үүрэг даалгавар авсан гэнэ лээ. Тэрбээр тун удахгүй хоёр орлогчоо чөлөөлж магадгүй гэсэн. Тэгэхээр Өмнөговь аймаг удахгүй өөр орлогчтой болох бололтой” гэлээ.

ӨМНӨГОВЬ АЙМГИЙН ЗАСАГ ДАРГЫН ОРЛОГЧООР ТОМИЛОГДОХ  УИХ-ЫН ГИШҮҮН Д.БАТ-ЭРДЭНИЙН ТУСЛАХ АСАН, ИТХ-ЫН ТӨЛӨӨЛӨГЧ Ц.ДЭНЭЭДОРЖ ГЭЖ ХЭН БЭ

         Харин Засаг даргын орлогчоор Өмнөговь аймгийн ИТХ-ын төлөөлөгч Ц.Дэнээдоржийг томилох тохироо хийгдсэн ч гэх мэдээлэл байна. Орлогчийн албан тушаалд очихоор яригдаж байгаа Ц.Дэнээдорж нь 2012-2016 онд УИХ-ын гишүүн Д.Бат-Эрдэнийн шадар туслахаар ажиллаж, 2020 оноос аймгийн ИТХ-ын төлөөлөгчөөр сонгогдон ажиллаж байгаа аж.

Эх сурвалж энэ талаар хэлэхдээ “Ажнай” Д. Бат-Эрдэнийн туслахаар ажиллаж байсан Ц.Дэнээдорж гэх залуу гэнэт л албан тушаал огцом дэвшиж, Өмнөговь аймгийн ИТХ-ын төлөөлөгчөөр сонгогдсон. Өмнөговь дахь “Ажнай” Д.Бат-Эрдэнийн бүлэглэлийн залгамж халаа болон “бойжиж” буй залуучуудаас хамгийн ирээдүйтэй нь гэгддэг юм билээ. Одоогоор тэр ИТХ-ын төлөөлөгчөөр ажиллахын сацуу “Ажнай” Д.Бат-Эрдэнийн эхнэр Г.Ганчимэгтэй хамт “Төв ази поло клуб” ТББ-ын УЗ-ийн гишүүнээр ажиллаж буй” гэлээ.

ӨМНӨГОВЬ АЙМГИЙН ЗАСАГ ДАРГЫН ОРЛОГЧИЙН АЛБАН ТУШААЛААС БУУХ Н.ЭНХБАТ, Ч.БАЯРЖАРГАЛ ГЭЖ ХЭН БЭ

     Ямартай ч Өмнөговьд улс төрийн хөдөлгөөн хийгдэж, Засаг даргын орлогчдоо чөлөөлөхөөр болж, ИТХ-ын төлөөлөгч залууг оронд томилохоор зэхэж байгаа ажээ. Харин албан тушаалын суудлаасаа буухаар болсон Н.Энхбат, Ч.Баяржаргал гэж хэн бэ гэдгийг сонирхуулъя.

      Орлогч дарга Н.Энхбат нь Улсын баяр наадмын үеэр улсын заан Н.Жаргалбаяртай утсаар ярьж, даваа наймаалсан хэрэгт нэр нь холбогдсон байдаг. Тэрбээр улсын заан Н.Жаргалбаяр руу залгаж, “Жаргалбаяр заан уу, би Өмнөговь аймгийн Засаг даргын орлогч байна. Манай нөгөө аймгийн арслан Э.Нямааг авчих. Чи тоогоо хэл” гэх зэргээр утсаар ярьсан нь орон даяар шууд цацагдсан билээ. Засаг даргын орлогчийн нэр холбогдсон уг хэргийг АТГ-аас хэрэг бүртгэл нээн шалгаж байсан юм. Өөрөөр хэлбэл, Н.Энхбат орлогчийг эрх мэдэл, албан тушаалын байдлаа урвуулан ашигласан байж болзошгүй үндэслэлээр хууль хяналтын байгууллагаас шалгасан гэсэн үг. Мөн уг хэрэгтэй холбогдуулан түүнийг орлогчийн албан тушаалаас нь чөлөөлөхөөр болсон байж болзошгүй байна. Н.Энхбат нь Өмнөговь аймгийн ХААН банкны захирлаар 2010-2020 он хүртэл 10 жил ажилласан, Өмнөговь аймгийн ИТХ-д 2012, 2016, 2020 онд гурван удаа сонгогдсон намтартай нэгэн.

Харин Эдийн засаг, нийгмийн асуудал хариуцсан орлогч дарга Ч.Баяржаргалыг ямар шалтгааны улмаас чөлөөлөх гэж байгаа нь тодорхойгүй байна. Ч.Баяржаргал нь Өмнөговь аймгийн ИТХ дахь АН-ын бүлгийн дарга Ч.Жаргалсайханы төрсөн дүү. Түүнийг орон нутгийн сонгуулийн дараа Улаанбаатар хотоос Өмнөговьд аваачиж, аймгийн Засаг дарга Р.Сэддоржийн орлогчоор томилсон байдаг.