Дорнод аймгийн Хэрлэн суманд автомашинаар хүн мөргөж, хэргийн газраас зугтсан хэрэг гарсан. Тодруулбал, тус сумын долдугаар багийн нутаг дэвсгэр, 52А байрны урд долдугаар сарын 21-ний 03:00 цаг орчимд 18 настай эрэгтэй Д “Harrier” маркийн автомашинаар 18 настай эрэгтэй С-ийг мөргөж, биед нь хүнд гэмтэл учруулсан бөгөөд хэргийн газраас зугтсан байдаг.

Автомашинд мөргүүлсэн С-ийн бие хүнд Гэмтэл согог судлалын үндэсний төвд хэвтэн эмчлүүлж байгаад Дорнод аймагт очсон билээ. Бид хүүгийн биеийн байдал ямар байгаа талаар түүний ээжээс тодрууллаа.

         Тэрбээр “Хүү маань гэртээ ирчихсэн байгаа. Би төрөх гэж байгаа учраас хүүгээ аймагтаа аваад ирсэн. Биеийн байдал нь хэвийн гэртээ эмчлүүлж байгаа. Уламжлалт бариа засал хийлгэж байна. Бусдаар өөр эмчилгээ хийсэн зүйлгүй байна. Тэргэнцэр дээр сууж байгаа хэвээрээ. Тэгж аймар мөргүүлж, гэмтсэн юм чинь хөл дээрээ юу гэж явж чадах билээ. Гурван сарын дараа Улаанбаатар хотод очиж үзүүлнэ. Тэр ед цаашид хаана, ямар эмчилгээ хийлгэх нь тодорхой болно. Одоогийн байдлаар гадаад явж эмчлүүлэх тов гараагүй. Мөн одоогийн байдлаар хэргийн шүүх хурал гэж болсон юм алга” гэлээ.