Ерөнхий сайд Л.Оюун-Эрдэнийн санаачилгаар Хэнтий аймгийн Батноров суманд “Хүлэг боорчи-Андлалын өргөө” цогцолбор баригдаж байсан билээ. Тус цогцолбор нь Эзэн Чингис хааны төрсөн нутаг, Хэнтий аймагт хийж байгаа томоохон бүтээн байгуулалтын нэг. Харин 400 сая жуулчин хүлээж авах "том" зорилготой “Андлалын өргөө” цогцолборыг ашиглалтад орохоос нь өмнө нураахаар болжээ. Улсын төсвийн хоёр тэрбум орчим төгрөгөөр баригдаж байгаа тус цогцолборын бүтээн байгуулалтын ажил зогсонги байдалд орж, цахим сүлжээнд багагүй шүүмжлэл дагуулж, эцэст нь нураахаар болсон гэнэ.

Угтаа бол Ерөнхий сайд хэлэхдээ “Холбогдсон дэд бүтцийн цикль дунд үндсэндээ бидний тооцож байгаагаар “400 орчим сая жуулчин ирэх хүчин чадал байна” гэж үзэж байгаа” хэмээсэн. Гэтэл 400 сая жуулчин хүлээж авах чадалтай томоохон бүтээн байгуулалтын ажил ид дундаа явагдаж байгаад загвар хийц, чанарын шаардлага, оюуны өмчийн маргаанаас болж нураах дээрээ тулсан байна. 

Ц.ИДЭРБАТ: “Андлалын өргөө” -г барьсан “Хос санаа” компани гүйцэтгэлийн ажлаа үргэлжлүүлэх боломжгүй болж, хөшөөг нураана

         Энэ талаар Хэнтийн аймгийн Засаг дарга Ц.Идэрбатаас тодруулахад “Манай аймаг түүхэн аялал жуулчлалын бүс гэдгийг хэн хүнгүй мэднэ. Энэ хүрээнд баригдах цогцолборын ажлууд эхлээд үндсэндээ хоёр жил орчим болж байна. Баригдаж байгаа цогцолборын барилгууд эхнээсээ ашиглалтад ороход бэлэн болсон. Харин асуудалтай байгаа цогцолбор нь “Андлалын өргөө”. Анх улсын комиссоос тус барилгыг “Үүрэг даалгаврын биелэлттэй” гэж хүлээж авсан юм билээ. Улсын комисс хүлээж авснаас хойш тус цогцолборт өнөөдрийг хүртэл ямар ч ажил хийгдээгүй. Мөн хийсэн ажил нь чанар муутай байсан. Нөгөө талаас, хөшөөний зураг төсөл шүүмжлэл дагуулаад байгаа шүү дээ. Барилгын зураг төсөл Урлагийн гавьяат зүтгэлтэн, зураач Д.Эрдэнэбилэгийн бүтээл юм. Тэрээр бүтээн байгуулалтын ажил явагдаж байхад таалал төгссөн учраас “Андлалын өргөө”-ний  зураг, төслийн талаар өөр шиг нь тодорхой яриад, хэлээд өгөх хүн алга. Дутуу баригдсан хөшөөний зургийг цахим орчинд тавьж, талийгаачийн сэтгэлээ гаргаж бүтээсэн бүтээлийг шүүмжилж байгаа учир түүний гэр бүлд нь эмзэг тусаж, оюуны өмчийг нь ашиглуулахад хүндрэлтэй болсон юм шиг байна лээ. Түүнчлэн гүйцэтгэгч “Хос санаа” компанийн буруутай үйл ажиллагаанаас болж барилгын ажил дутуу байгаа. Тухайлбал, доторх, гадна талын хээ хуар зэрэг хийх ажил бий, дутуу байгаа гэсэн үг. Гэтэл гүйцэтгэгч компани “Бид Улсын комиссоос өгсөн үүрэг, даалгаврын биелэлтийг ч хийж чадахгүй байгаа учраас хийсэн хөшөөгөө буулгана” гэсэн асуудал ярьсан. Хэрэв тус компани хөшөөг нураах бол улсыг хохиролгүй болгох ёстой. Улсын төсвөөс “Андлалын өргөө”-г барихад хоёр тэрбум төгрөг тусгаж, 1.8 тэрбумыг нь “Хос санаа” компанийн данс руу шилжүүлсэн байдаг юм билээ. “Хос санаа” компани нь Сангийн яамны холбогдох данс руу 1.8 тэрбум төгрөгөө шилжүүлж, улсыг хохиролгүй болгосон учир тус барилгыг нураахаар болсон. Бид цаашид энэ суурин дээр юу барих талаар ярилцах болно” гэв.

Бид Хэнтий аймгийн Засаг дарга Ц.Идэрбатын өгсөн мэдээллийн дагуу "Хос санаа" компанийн удирдлагуудтай холбогдоход "Энэ асуудлаар би сайн мэдэхгүй байна. Компанийн гүйцэтгэх захирал Жавхлангаас тодруулах нь зүйтэй. Гэхдээ хоёр, гурав хоногийн өмнө хөдөө явсан учир утас нь холбогдохгүй" гэсэн юм. 

“Хос санаа” компани нь Сангийн яамны холбогдох данс руу 1.8 тэрбум төгрөгөө шилжүүлж, улсыг хохиролгүй болгосон учир тус барилгыг нураахаар болсон

Зураач Д.Эрдэмбилэгийн ар гэр: Талийгаач минь тэнгэрээс харж байгаа байх

         Тэгвэл бид “Андлалын өргөө” цогцолборын зураг, төслийг гаргасан зураач, талийгаач Д.Эрдэмбилэгийн ар гэрийнхэнтэй холбогдов. Цахим сүлжээнд бичигдсэнээр  талийгаачийн ар гэрийнхэн оюуны өмчийг нь үргэлжлүүлэн ашиглахаас татгалзсан хэмээгээд байгаа юм. Тэд талийгаачийн нэр хүндэд сөргөөр нөлөөлж, ар гэрийнхэнд нь дарамт учирч байгаа тул ийм шийдвэр гаргасан ч гэх мэдээлэл бий. Мөн тэдний хувьд талийгаачийн сэтгэл зүрхээ зориулан байж бүтээсэн бүтээлийг нь муухайгаар харагдуулж, цахим орчинд доромжилж байгаа нь хэрээс хэтэрсэн гэж үзэж байгаа аж.

Талийгаачийн ар гэрийнхэн хэлэхдээ “Талийгаач минь тэнгэрээс харж байгаа байх. Түүнийг минь нэг бол муулаад, нэг бол сайлаад байгаа нь хэрээс хэтэрч байна. Хүмүүс хүний хийсэн бүтээлийг муулж байгаа нь, гаргаж байгаа увайгүй үйлдэл нь үнэхээр залхааж байна. Иймээс бид тайлбар өгөхгүй” хэмээлээ.